ପୁରୀ: ପୁରୀ ହାଜତ ମୃତ୍ୟୁ ପ୍ରସଙ୍ଗ । ଏସପିଙ୍କ ନିଲମ୍ବନ ଓ ମୃତକଙ୍କ ପରିବାରକୁ କୋଟିଏ ଟଙ୍କା କ୍ଷତିପୂରଣ ଦାବି କଲା ବିଜେପି । ପୁରୀ ବାସେଳି ସାହି ଥାନାରେ ହାଜତ ମୃତ୍ୟୁ ଅଭିଯୋଗ ପ୍ରସଙ୍ଗକୁ ନେଇ ବିଭିନ୍ନ ମହଲରେ ପୋଲିସକୁ କଡା ସମାଲୋଚନା କରାଯାଇଛି । ଶୁକ୍ରବାର ବିଜେପି ପକ୍ଷରୁ ଦୋଷୀ ପୋଲିସ କର୍ମଚାରୀଙ୍କ ବିରୋଧରେ କଡା କାର୍ଯ୍ୟନୁଷ୍ଠାନ ଦାବିରେ ପୁରୀ ଏସପିଙ୍କ କାର୍ଯ୍ୟାଳୟ ଆଗରେ ଧାରଣା ଦିଆଯାଇଛି।
ମୃତ କେ.ରମେଶଙ୍କୁ ଯେଭଳି ପୋଲିସ ଅତି ଅମାନୁଷିକ ଭାବେ ମାଡ଼ ମାରି ହତ୍ୟା କରିଛି ସେ ନେଇ ପୁରୀ ଏସପି ଙ୍କ ନିଲମ୍ବନ ଦାବି କରିଛି ବିଜେପି । ସେହିପରି ମୃତକଙ୍କ ପରିବାର ଲୋକଙ୍କୁ ଏକ କୋଟି ଟଙ୍କା କ୍ଷତିପୂରଣ ରାଶି ଦେବାକୁ ବିଜେପି ଦାବି କରିଛି । ଏହି ପ୍ରସଙ୍ଗରେ ଭୁବନେଶ୍ୱରରୁ ବିଜେପିର ଏକ ଟିମ ଆସି ପୁରୀ ଏସପି ଅଫିସ ଘେରାଉରେ ସାମିଲ ହୋଇଥିଲେ । ବିରୋଧୀ ଦଳ ନେତା ପ୍ରଦୀପ୍ତ ନାୟକ, ବିଜେପି ରାଜ୍ୟ ସଭାପତି ସମୀର ମହାନ୍ତି, ବରିଷ୍ଠ ବିଜେପି ନେତା ଜୟ ନାରାୟଣ ମିଶ୍ର, ପୁରୀର ବିଜେପି ବିଧାୟକ ଜୟନ୍ତୀ ଷଡଙ୍ଗୀ ଆଦି ପ୍ରମୂଖ ନେତା ଏହି ଧାରଣାରେ ସାମିଲ ହୋଇ ଥିଲେ ।
ପୋଲିସ ଲୋକଙ୍କ ସୁରକ୍ଷା ପାଇଁ ଦାୟିତ୍ୱ ନେଇ ଥିବା ବେଳେ ହାଜତରେ ଅଭିଯୁକ୍ତକୁ ପିଟି ପିଟି ମାରିବା ପୋଲିସର ବର୍ବରଚିତ ପଣିଆ ପୁଣି ପଦାରେ ପଡିଥିବା ରାଜ୍ୟ ବିଜେପି ଅଭିଯୋଗ କରିଛି । ତେବେ ଅଗାମୀ ବିଧାନସଭା ଅଧିବେଶନରେ ଏହି ହାଜତ ମୃତ୍ୟୁ ପ୍ରସଙ୍ଗକୁ ବିଜେପି ସରକାରଙ୍କୁ ଘେରିବ ବୋଲି ବିରୋଧୀ ଦଳ ନେତା ପ୍ରଦୀପ୍ତ ମହାପାତ୍ର କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
