ପୁରୀ: ଜିଲ୍ଲାର ସହରାଞ୍ଚଳରେ ବିଭିନ୍ନ ପ୍ରକଳ୍ପର କାର୍ଯ୍ୟ ନେଇ ରାଜ୍ୟ ସରକାର 7 କୋଟି 17 ଲକ୍ଷ ଟଙ୍କା ମଞ୍ଜୁର କରିଛନ୍ତି । ମୁକ୍ତା ଯୋଜନା(Mukta yojana)ରେ ଏହି ଟଙ୍କା ମଞ୍ଜୁର କରାଯାଇଛି । ଏହି ଯୋଜନା ଆଧାରରେ ୨୦୫ଟି ବିକାଶମୂଳକ କାର୍ଯ୍ୟକୁ ସାମିଲ କରାଯାଇଛି ।
ମୁଖତଃ ପୁରୀ ସହରରେ ଥିବା ବିଭିନ୍ନ ୱାର୍ଡରେ କ୍ଷୁଦ୍ର ଉଦ୍ୟାନ, ପବ୍ଲିକ ଜିମ, ଶିଶୁ କ୍ରୀଡା ଉଦ୍ୟାନ, ଚାଲିବା ରାସ୍ତା, ଜଳାଶୟ, ଖେଳ ପଡିଆ, ଶୌଚାଳୟ, ରାସ୍ତାକଡ଼ ବିକ୍ରୟ ସ୍ଥଳୀ ଏହି ବିଭିନ୍ନ 205ଟି ପ୍ରକଳ୍ପ ପାଇଁ 7 କୋଟି 17 ଲକ୍ଷ ଟଙ୍କା ଅନୁଦାନ ଆସିଛି । ମୁଖ୍ୟତଃ ମହିଳା ସୋୟଂ ସହାୟକ ଗୋଷ୍ଠୀର ମହିଳାମାନେ ଏହି ସବୁ ପ୍ରକଳ୍ପ କାର୍ଯ୍ୟ କରିବେ। ଫଳରେ ପ୍ରକଳ୍ପରୁ କିଛି ଲାଭାଂଶ ପାଇ ମହିଳା ସୋୟଂ ସହାୟକ ଗୋଷ୍ଠୀ ମାନେ ଆର୍ଥିକ ସ୍ବାବଲମ୍ବୀ ହୋଇପାରିବେ ।
ଏହା ଛଡା ମୁକ୍ତା ଯୋଜନାରେ ବିଭିନ୍ନ ୱାର୍ଡର ଉନ୍ନୟନମୂଳକ କାର୍ଯ୍ୟ ହେଲେ ପୁରୀ ସହରାଞ୍ଚଳର ମଧ୍ୟ ଭିତ୍ତିଭୂମି ବିକାଶ ହୋଇ ପାରିବ । ତେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁରୀ ସହରର ଉନ୍ନତି ଓ ମହିଳାଙ୍କୁ ଆର୍ଥିକ ସ୍ବାବଲମ୍ବୀ ପାଇଁ ଅନୁଦାନ ଦେଇଥିବା କାରଣରୁ ପୁରୀର ପୁର୍ବତନ ବିଧାୟକ ତଥା ବରିଷ୍ଠ ନେତା ମହେଶ୍ବର ମହାନ୍ତି ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ପ୍ରକାଶ କରିଛନ୍ତି । ବିଶେଷ କରି ମହିଳା ସ୍ବୟଂ ସହାୟକ ଗୋଷ୍ଠୀ ମହିଳାମାନେ ମୁଖ୍ୟମନ୍ତ୍ରୀଙ୍କ ପଦକ୍ଷେପକୁ ଧନ୍ୟବାଦ ଜଣାଇଛନ୍ତି ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
