ପୁରୀ: ଆଜି ଶ୍ରାବଣ ମାସ ଚିତାଲାଗି ଅମାବାସ୍ୟା । ଶ୍ରୀମନ୍ଦିରରେ ମହାପ୍ରଭୁଙ୍କ ଚିତାଲାଗି ନୀତି ଅନୁଷ୍ଠିତ ହେବ । ଏନେଇ ଭୋଗ ମଣ୍ଡପ ଶେଷ ପରେ ସର୍ବସାଧାରଣ ଦର୍ଶନ ବନ୍ଦ ରହିବ । ଅପରାହ୍ନ 2ଟାରୁ ସନ୍ଧ୍ୟା 6ଟା ଯାଏଁ 4 ଘଣ୍ଟା ପର୍ଯ୍ୟନ୍ତ ଜଗା ଦର୍ଶନରୁ ବଞ୍ଚିତ ହେବେ ଭକ୍ତ । ଶ୍ରୀମନ୍ଦିର ପ୍ରଶାସନ ପକ୍ଷରୁ ଏନେଇ ସୂଚନା ଦିଆଯାଇଛି ।
ଶ୍ରୀଜିଉଙ୍କ ମଥାରେ ଲାଗୁଥିବା ରତ୍ନଚିତାକୁ ନେଇ ଶ୍ରୀମନ୍ଦିରରେ ଚିତାଲାଗି ଅମାବାସ୍ୟା ପାଳନ କରାଯାଏ । ଦେବସ୍ନାନ ପୂର୍ଣ୍ଣିମା ପୂର୍ବରୁ ଠାକୁରଙ୍କ ମଥାରେ ପଞ୍ଚରତ୍ନରେ ନିର୍ମିତ ରତ୍ନଚିତା ଲାଗି ହୋଇଥାଏ । ଯାହାକୁ ମହାପ୍ରଭୁ ଅଣସର ଘରେ ଥିବା ସମୟରେ କାଢି ଦିଆଯାଇଥାଏ । ରଥଯାତ୍ରା ଶେଷ କରି ଶ୍ରୀଜିଉ ଶ୍ରୀମନ୍ଦିରକୁ ବାହୁଡିଛନ୍ତି । ଆଜି ପୁଣିଥରେ ସେହି ରତ୍ନଚିତାକୁ ଶ୍ରୀଜିଉଙ୍କ ମଥାରେ ଲଗାଯିବ । ଚତୁର୍ଦ୍ଧାବିଗ୍ରହଙ୍କ ସ୍ବତନ୍ତ୍ର ନୀତିକାନ୍ତି ପରେ ପ୍ରଥମ ଭୋଗମଣ୍ଡପରେ ଅପରାହ୍ନ 2ଟାରୁ ସନ୍ଧ୍ୟା 6ଟା ପର୍ଯ୍ୟନ୍ତ ଏହି ଚିତାଲାଗି ନୀତି ଅନୁଷ୍ଠିତ ହେବ ।
ପତିମହାପାତ୍ର ସେବକ ରତ୍ନଚିତାକୁ ଶ୍ରୀଅଙ୍ଗରେ ଲାଗି କରିବେ । ସ୍ନାନପୂର୍ଣ୍ଣିମାରେ ତିନିଠାକୁର ଅଣସରକୁ ବିଜେ ସମୟରେ ଏହାକୁ କଢା ଯାଇଥିଲା । ଭୋଗ ମଣ୍ଡପ ନୀତି ସରିବା ପରେ ଏହି ବିଶେଷ ନୀତି ଅନୁଷ୍ଠିତ ହେବ ।
ଇଟିଭି ଭାରତ,ପୁରୀ
