ପୁରୀ: ରାଜ୍ୟରେ ସାମୁଦ୍ରିକ ଝଡ଼ ‘ବୁଲବୁଲ’ ମାଡ ହେବାର ସମ୍ଭାବନା ନାହିଁ । ତଥାପି ଏହାର ପ୍ରଭାବ ରାଜ୍ୟର ଉପକୂଳବର୍ତ୍ତୀ ଅଞ୍ଚଳରେ ପଡିପାରେ । ଏନେଇ ପାଣିପାଗ ବିଭାଗ ପକ୍ଷରୁ ସତର୍କତା ଜାରି କରାଯାଇଛି । ପୁରୀ, ଗଞ୍ଜାମ, ଯାଜପୁର, ଜଗତସିଂହପୁରରେ ଏହାର ପ୍ରଭାବ ପଡିବା ନେଇ ଅନୁମାନ କରାଯାଉଛି । ସେପଟେ ଏହି ସାମୁଦ୍ରିକ ବାତ୍ୟାକୁ ନଜରରେ ରଖି, ଏହାର ମୁକାବିଲା କରିବା ପାଇଁ ପୁରୀ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି ।
ବାତ୍ୟା ଆଶ୍ରୟ ସ୍ଥଳୀ ସମେତ ବିଭିନ୍ନ କମ୍ୟୁନିଟ ହଲକୁ ଏଥିପାଇଁ ପ୍ରସ୍ତୁତ କରାଯାଇଛି । ବର୍ଷା ଯୋଗୁଁ ପରିସ୍ଥିତି ବିଗିଡିଲେ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ । ଏଥିପାଇଁ ଖାଦ୍ୟ ପାନୀୟର ବ୍ୟବସ୍ଥା କରାଯିବା ସହ ଅତ୍ୟାବଶ୍ୟକ ସାମଗ୍ରୀ ମଧ୍ୟ ମହଜୁଦ ରଖାଯାଇଛି । ଏ ବାତ୍ୟାକୁ ଦୃଷ୍ଟିରେ ରଖି ଶୁକ୍ରବାର ଓ ଶନିବାର ଶିକ୍ଷାନୁଷ୍ଠାନକୁ ଛୁଟି ଘୋଷଣା କରିଛନ୍ତି ସରକାର । ଏହା ସହିତ ସମୁଦ୍ରକୂଳରେ 80ଟି ଲାଇଫ ଗାର୍ଡକୁ ନିୟୋଜିତ କରାଯିବ ସହ ସମୁଦ୍ର ଭିତରକୁ ପର୍ଯ୍ୟଟକଙ୍କୁ ଯିବା ପାଇଁ ବାରଣ କରାଯାଇଛି ।
ବର୍ଷାରେ ଲୋକଙ୍କୁ ଉଦ୍ଧାର କରିବା ପାଇଁ ପ୍ରତି ବ୍ଲକରେ ଓଡ୍ରାଫ ଟିମ ଉପସ୍ଥିତ ରହିଛି । ସେହିପରି ବିଦ୍ୟୁତ ସରବରାହ ଯେଭଳି ବ୍ୟାହତ ନହୁଏ, ସେ ନେଇ ସେସୁ ସହିତ ଆଲୋଚନା ହୋଇଛି । ହସ୍ପିଟାଲକୁ ପ୍ରସ୍ତୁତ ରଖାଯିବା ସହ ସମସ୍ତ ସରକାରୀ ଅଧିକାରୀଙ୍କ ଛୁଟକୁ ମଧ୍ୟ ବାତିଲ କରାଯାଇଛି । ବାତ୍ୟାକୁ ନେଇ କୌଣସି ପ୍ରକାରେ ଭୟଭୀତ ନହେବା ପାଇଁ ଲୋକଙ୍କୁ ପ୍ରଶାସନ ପକ୍ଷରୁ ଜଣାଇ ଦିଆଯାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
