ପୁରୀ: ଆରମ୍ଭ ହୋଇଛି ବଡ଼ଦାଣ୍ଡ ମହୋତ୍ସବ। ଶ୍ରୀକ୍ଷେତ୍ରକୁ ଆସୁଥିବା ଭକ୍ତଙ୍କ ମନରେ ଏକ ଆଧ୍ୟାତ୍ମିକ ଭାବନା ସୃଷ୍ଟି କରିବା ନେଇ ପୁରୀ ଜିଲ୍ଲା ପ୍ରଶାସନ ପକ୍ଷରୁ ଆଜି(ରବିବାର) ଏହି କାର୍ଯ୍ୟକ୍ରମ ଆରମ୍ଭ ହୋଇଛି।
ତେବେ ରବିବାର ସକାଳୁ ଭଜନ ସଙ୍କିର୍ତ୍ତନ, ଝୋଟି ଓ ଚିତ୍ରାଙ୍କନରେ ବଡ଼ଦାଣ୍ଡ ସଜେଇ ହୋଇଥିଲା । ଏଥିରେ ବିଭିନ୍ନ କଳାକାର ସାମିଲ ହୋଇଥିଲେ। ସମସ୍ତଙ୍କ ମନରେ ଭକ୍ତି ଓ ସମର୍ପଣ ଭାବନା ଜାଗ୍ରତ କରିବାକୁ ଏମିତି କିଛି ପ୍ରୟାସ କରିଛି ପୁରୀ ଜିଲ୍ଲା ପ୍ରଶାସନ । ମହାପ୍ରଭୁଙ୍କ ଦର୍ଶନ କରିବା ସହିତ ବଡ଼ଦାଣ୍ଡର ଏହି ଦୃଶ୍ୟ ସମସ୍ତଙ୍କର ମନ ମୋହିଥିଲା ।
ତେବେ ପ୍ରତ୍ୟେକ ରବିବାର ପୁରୀରେ ଅନୁଷ୍ଠିତ ହେବ ବଡ଼ଦାଣ୍ଡ ମହୋତ୍ସବ । ଶ୍ରୀକ୍ଷେତ୍ରରେ ଆଧ୍ୟାତ୍ମିକ ପରିବେଶ ବଜାୟ ରଖିବାକୁ ଏହି ପ୍ରୟାସ ଆରମ୍ଭ ହୋଇଛି । ପୁରୀର ସାହିଯାତ, ଓଡ଼ିଶୀ, ଗୋଟିପୁଅ ନୃତ୍ୟର ଝଲକ ଏହି ମହୋତ୍ସବରେ ପ୍ରଦର୍ଶନ କରାଯାଇଥିଲା । ଅଗାମୀ ଉତ୍ସବରେ ସାମିଲ ହେବାକୁ ଥିବା କଳାକାର ମାନେ ରବିବାର ବଡ଼ଦାଣ୍ଡରେ ପହଞ୍ଚି ସ୍ବତଃ ପ୍ରବୃତ୍ତ ଭାବରେ ସାମିଲ ହେବାକୁ ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
