ପୁରୀ: ସ୍ନାନବେଦୀରେ 108 ଗରା ସୁବାସିତ ଜଳରେ ମହାସ୍ନାନ କରି ହାତୀ ବେଶରେ ଦର୍ଶନ ଦେବା ପରେ ପରମେଶ୍ବରଙ୍କୁ ଜ୍ବର ଧରିଛି, ଅସୁସ୍ଥ ହୋଇ ପଡିଛନ୍ତି ମହାପ୍ରଭୁ । ଶ୍ରୀଅଙ୍ଗକୁ ଲାଗିଛି ବାଧା । ଭାବଗ୍ରାହୀ ଭଗବାନଙ୍କୁ ସ୍ନାନବେଦୀରୁ ସିଧାସଳଖ ଅଣସର ପିଣ୍ଡିକୁ ନିଆଯାଇଛି। ସେଠାରେ ଦଇତା ଆରମ୍ଭ କରିବେ ଗୁପ୍ତ ସେବା । ୧୪ ଦିନ ଅଣସର ଘରେ ରହି ଚାଲିବ ଗୁପ୍ତ ଚିକିତ୍ସା । ତା'ପରେ ରଥଯାତ୍ରା ପୂର୍ବଦିନ ନବଯୌବନ ବେଶରେ ଦର୍ଶନ ଦେବେ ମହାବାହୁ ।
ଆଷାଢ କୃଷ୍ଣପକ୍ଷ ପ୍ରତିପଦା(ସ୍ନାନପୂର୍ଣ୍ଣିମା)ଠାରୁ ପନ୍ଦର ଦିନ ପର୍ଯ୍ୟନ୍ତ, ଶ୍ରୀଜଗନ୍ନାଥ, ମହାପ୍ରଭୁ ଗୁପ୍ତ ବାସ କରନ୍ତି । ଦେବସ୍ନାନ ପୂର୍ଣ୍ଣିମା ଓ ନେତ୍ରୋତ୍ସବର ମଧ୍ୟବର୍ତ୍ତୀ ପନ୍ଦର ଦିନ ଏହି ନିବାସ ଅଟେ । ଏହି ସମୟରେ ଚତୁର୍ଦ୍ଧାମୂର୍ତ୍ତି ଦର୍ଶନ ନିଷିଦ୍ଧ । ଅଣସର ସମୟରେ ଖାଲି ଥିବା ରତ୍ନ ସିଂହାସନରେ ପଟ୍ଟିଦିଅଁ ଓ ଦଶାବତାର ଠାକୁର ପାଆନ୍ତି ପୂଜା ।
ଶ୍ରୀଜଗନ୍ନାଥ ମନ୍ଦିରର କଳାହାଟ ଦ୍ବାର ଏବଂ ଭିତର କାଠ ମଧ୍ୟରେ ଥିବା ସ୍ଥାନକୁ ଅଣସର ଘର କୁହାଯାଏ । ଏହି ଗୁପ୍ତ ଗୃହ ମଧ୍ୟରେ ନୀଳାଦ୍ରିନାଥଙ୍କ ଗୁପ୍ତ ଚିକିତ୍ସା କରାଯାଇଥାଏ । ଶ୍ରୀମନ୍ଦିର ଭିତରେ ଥିବା ବଲ୍ଲଭ ପିଣ୍ଡି ଅଣସର ପିଣ୍ଡି ଭାବେ ଅବିହିତ । ଏହି ପିଣ୍ଡିରେ ଅସୁସ୍ଥ ଠାକୁରମାନଙ୍କୁ ବୈଦ୍ୟଙ୍କ ପରାମର୍ଶ ମୁତାବକ ପତି ମହାପାତ୍ର ଓ ଦଇତାପତି ସେବାୟତମାନେ ଗୁପ୍ତ ସେବା କରିଥାନ୍ତି । ଅଣସରରେ ଥାଇ ଶ୍ରୀବିଗ୍ରହଙ୍କୁ ଜ୍ବରରୁ ଆରୋଗ୍ୟ ନିମନ୍ତେ ସେବନ ପାଇଁ ଦଶମୂଳ ପାଚନ ଅର୍ପଣ କରାଯାଇଥାଏ ।
ଅଣସର ସମୟରେ ଶ୍ରୀଜୀଉଙ୍କୁ କେବଳ ଫଳମୂଳ ଓ ପଣା ଆଦି ଅର୍ପଣ କରାଯାଏ । ଅଣସରନୀତିରେ ମହାପ୍ରଭୁଙ୍କ ସମସ୍ତ ଗୁପ୍ତ ନୀତିକାନ୍ତି ନିହିତ ଥାଏ । ଏହି ଚିକିତ୍ସା ସମୟରେ ପ୍ରବଳ ଜ୍ବରରେ ଠାକୁରଙ୍କ ପାଖରେ ଅବଢା କି କୈାଣସି ପ୍ରକାରର ଶଙ୍ଖୁଡି ଭୋଗ ଲାଗି କରାଯାଇନଥାଏ । ଏହି ସମୟରେ ଶୁଖିଲି ଭୋଗ ଅପର୍ଣ କରାଯାଏ । ସ୍ନାନପୂର୍ଣ୍ଣିମାରେ ଜଳରେ ତିନ୍ତି ଯାଇଥିବା ଅଙ୍ଗବସ୍ତ୍ରକୁ ଫିଟାଇ ଦିଆଯାଏ । ଏହାକୁ ଶ୍ରୀଅଙ୍ଗ ଫିଟା କୁହାଯାଏ । ଶ୍ରୀଅଙ୍ଗରୁ ଝୁଣାରେ ପ୍ରସ୍ତୁତ ଚନ୍ଦନର ଲେପ ଛଡା ଯାଏ । ଏହି ସମୟରେ ଜ୍ବରରେ ଜର୍ଜରିତ ପ୍ରଭୁଙ୍କ ପୀଡା କମିବା ପାଇଁ ଦେହରେ ଫୁଲୁରୀ ତେଲକୁ ଘର୍ଷଣ କରାଯାଏ । ପରେ ପରେ ପର୍ଯ୍ୟାୟ କ୍ରମେ ଚନ୍ଦନ ଲାଗି, ଖଡ଼ି ଲାଗି, ଓଷୁଅ ଲାଗି ଓ ରାଜ ପ୍ରସାଦ ବିଜେ, ଘଣା ଲାଗି ଓ ପାଟ ଡୋରୀ ଖଡ଼ି ପ୍ରସାଦ ଓ ଖଳି ପ୍ରସାଦ , ବନକ ଲାଗି ଏହି ଭଳି ଭାବରେ ମହାପ୍ରଭୁଙ୍କ ଗୁପ୍ତ ନୀତି ସମାପନା କରାଯାଇଥାଏ । ଚତୁର୍ଦଶୀ ରାତ୍ରରେ ଶ୍ରୀଜୀଉଙ୍କ ନବଯୌବନ ବେଶ ଧାରଣ କରି ନେତ୍ରୋତ୍ସବ ଲାଗି ବିଜେ ହୁଅନ୍ତି । ରଥଯାତ୍ରା ପୂର୍ବରୁ ଅଣସର ପରେ ଏହାକୁ ନବଯୌବନ ଦର୍ଶନ ବା ନେତ୍ରୋତ୍ସବ ବୋଲି କୁହାଯାଏ ।
ମହାବିଗ୍ରହଙ୍କ ଅଣସର ସମୟରେ ଅଲାରନାଥଙ୍କ ଦର୍ଶନ କଲେ କୋଟି ପୂର୍ଣ୍ଣଫଳ ମିଳିଥାଏ । ବିଶ୍ବାସ ଓ ଆସ୍ଥା ଯେ ଏହି 15 ଦିନ ଶ୍ରୀ ଅଲାରନାଥଙ୍କୁ ଦର୍ଶନ କଲେ ଚତୁର୍ଦ୍ଧାମୂର୍ତ୍ତିଙ୍କ ଦର୍ଶନ ସମଫଳ ପ୍ରାପ୍ତି ହୋଇଥାଏ ।
ବ୍ୟୁରୋ ଇନ୍ପୁଟ୍ ସହ ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
