କୋଣାର୍କରୁ ବାଲି କାଢିବା ଘଟଣା, ସମ୍ମତି ପ୍ରକାଶ କଲେ ଆମିକସକ୍ୟୁରି

ବିଶ୍ବ ଐତିହ୍ୟ କୋଣାର୍କ ମନ୍ଦିରରୁ ବାଲି କଢାଯିବା ଘଟଣା । ଆଜି ମନ୍ଦିର ପରିଦର୍ଶନ କରି ଏ ନେଇ ସମ୍ମତି ପ୍ରକାଶ କରିଛନ୍ତି ହାଇକୋର୍ଟଙ୍କ ଆମିକସକ୍ୟୁରି । ଅଧିକ ପଢନ୍ତୁ

ପୁରୀ: ବିଶ୍ବ ଐତିହ୍ୟ କୋଣାର୍କ ସୂର୍ଯ୍ୟ ମନ୍ଦିର ଭିତରୁ ବାଲି କାଢିବାକୁ ନେଇ ମନ୍ଦିର ପରିଦର୍ଶନ କରିଥିଲେ ହାଇକୋର୍ଟଙ୍କ ଆମକିସକ୍ୟୁରି ତଥା କୋର୍ଟ ମିତ୍ର ନଗେନ୍ଦ୍ର କୁମାର ମହାନ୍ତି । ମନ୍ଦିର ସୁରକ୍ଷା ପାଇଁ ବାଲି କଢ଼ାଯିବା (Sand removal from inside of Konark Temple) ନେଇ ସମ୍ମତି ପ୍ରକାଶ କଲେ ଆକିକସକ୍ୟୁରି । ପର୍ଯ୍ୟାୟ କ୍ରମେ ମନ୍ଦିରର ସ୍ଥିତି ଓ ସୁରକ୍ଷା ଉପରେ ନଜର ରଖି ବାଲି କାଢିବା ବ୍ୟବସ୍ଥା କରାଯିବ ବୋଲି ସେ କହିଛନ୍ତି ।

ଦୀର୍ଘ ୧୨୦ ବର୍ଷ ତଳୁ ବ୍ରିଟିଶ ସରକାରଙ୍କ ପକ୍ଷରୁ ମନ୍ଦିର ମୁଖଶାଳା ଭିତରେ ବାଲି ଭର୍ତ୍ତି କରାଯାଇଛି । ଏବେ ସୂର୍ଯ୍ୟ ମନ୍ଦିର ସୁରକ୍ଷା ନେଇ ପ୍ରତ୍ନତତ୍ତ୍ଵ ସର୍ବେକ୍ଷଣ ସଂସ୍ଥା ପକ୍ଷରୁ ବାଲି କାଢିବା ପ୍ରକ୍ରିୟା ଆରମ୍ଭ ହୋଇଛି । ତେବେ ଏ ନେଇ ବିଶ୍ବ ଐତିହ୍ୟ କୋଣାର୍କ ସୂର୍ଯ୍ୟ ମନ୍ଦିର ଭିତରୁ ବାଲି କାଢିବା ନେଇ ଓଡ଼ିଶା ଉଚ୍ଚ ନ୍ୟାୟାଳୟ ପକ୍ଷରୁ ନିଯୁକ୍ତ ଆମିକସକ୍ୟୁରି ତଦାରଖ କରିଛନ୍ତି ।

ବାଲି କାଢିବା ନେଇ ପ୍ରାଥମିକ ପ୍ରକ୍ରିୟା ଜାରି ରହିଛି । ପର୍ଯ୍ୟାୟ କ୍ରମେ ମନ୍ଦିରର ସ୍ଥିତି ଓ ସୁରକ୍ଷା ଉପରେ ନଜର ରଖି ବାଲି କାଢିବା ବ୍ୟବସ୍ଥା କରାଯିବ ବୋଲି ଆମିକସକ୍ୟୁରି ନଗେନ୍ଦ୍ର କୁମାର ମହାନ୍ତି ମତବ୍ୟକ୍ତ କରିଛନ୍ତି । ଅନ୍ୟମାନଙ୍କ ମଧ୍ୟରେ ପ୍ରତ୍ନତତ୍ତ୍ଵ ସର୍ବେକ୍ଷଣ ସଂସ୍ଥାର ଉପଦେଷ୍ଟା କମିଟି ମୁଖ୍ୟ ଡ଼କ୍ଟର ଏନ.ସି ପାଲ, ସୁପରିଟେଣ୍ଡେଣ୍ଟ ଅରୁଣ ମଲ୍ଲିକ, ଅଧିକାରୀ ନିରୋଜ ସିଂ ପ୍ରମୁଖ ଉପସ୍ଥିତ ଥିଲେ ।

ସୂଚନା ଥାଉ କି ୧୯୦୩ ମସିହାରେ ଜଗମୋହନର ସୁରକ୍ଷା ପାଇଁ ତତ୍କାଳୀନ ବ୍ରିଟିଶ ସରକାର ଗର୍ଭଗୃହରେ ବାଲି ଭର୍ତ୍ତି କରିଥିଲେ । କେବେଳ ଜଗମୋହନ ନୁହେଁ । ମନ୍ଦିର ତିନି ଦ୍ବାର ମଧ୍ୟ ବାଲି ପକାଇ ବନ୍ଦ କରି ଦିଆଯାଇଥିଲା । ତେବେ ବର୍ତ୍ତମାନ ଏହାଦ୍ବାରା ମନ୍ଦିର ପ୍ରତି ବିପଦ ସୃଷ୍ଟି ହୋଇଛି । ଏଥିପାଇଁ ମନ୍ଦିର ଭିତରୁ ବାଲି କାଢ଼ିବାକୁ ନିଷ୍ପତ୍ତି ନିଆଯାଇଛି । ଯାହାଦ୍ବାରା ୧୩ଶ ଶତାବ୍ଦୀର ଐତିହ୍ୟ ମନ୍ଦିର ଆହୁରି ୫୦୦ରୁ ୭୦୦ ବର୍ଷ ପର୍ଯ୍ୟନ୍ତ ଅକ୍ଷୁର୍ଣ୍ଣ ରହିପାରିବ ।

କୋଣାର୍କ ମନ୍ଦିର ସହିତ ପୁରୀ ଶ୍ରୀମନ୍ଦିରର ରକ୍ଷାଣବେକ୍ଷଣ ସ୍ଥିତି ସମୀକ୍ଷା କରିଛନ୍ତି ଆମିକସକ୍ୟୁରି । ଏ ନେଇ ଶ୍ରୀମନ୍ଦିର କାର୍ଯ୍ୟାଳୟରେ ଏକ ସ୍ବତନ୍ତ୍ର ବୈଠକ ଆଜି ଅନୁଷ୍ଠିତ ହୋଇଥିଲା । ଶ୍ରୀମନ୍ଦିରରେ ଆଗକୁ କଣ ସବୁ କାମ ହେବାର ଅଛି ସେ ନେଇ ଆଲୋଚନା ହୋଇଥିବା ବେଳେ ରତ୍ନଭଣ୍ଡାର ଖୋଲିବା ନେଇ ଆସନ୍ତା ୨୭ରେ ହେବାକୁ ଥିବା ବୈଠକରେ ଆଲୋଚନା ହେବ ବୋଲି ଆମିକସକ୍ୟୁରି ସୂଚନା ଦେଇଛନ୍ତି ।

ଇଟିଭି ଭାରତ, ପୁରୀ