କେନ୍ଦୁଝର: ଦିନକୁ ଦିନ ହୁ ହୁ ହୋଇ ବଢି ଚାଲୁଛି ଖାଉଟି ସାମଗ୍ରୀ ଦରଦାମ । ପନିପରିବା ଠାରୁ ଆରମ୍ଭ କରି ରନ୍ଧନ ଗ୍ୟାସ ଯାଏଁ ସବୁଠି ମହଙ୍ଗା ମାଡ । ସେପଟେ ବିଗତ କିଛି ଦିନ ହେଲା ତୈଳ ଦରରେ ଲଗାଣ ବୃଦ୍ଧି ଦେଶରେ ସବୁ ରେକର୍ଡ ବ୍ରେକ କରିଥିଲା । ଯାହାକୁ ବିରୋଧ କରି ବିଭିନ୍ନ ରାଜନୈତିକ ଦଳ ରାସ୍ତାକୁ ଓହ୍ଲାଇଥିବାବେଳେ ଏହି କ୍ରମରେ ବୁଧବାର କମ୍ୟୁନିଷ୍ଟ ଦଳ କେନ୍ଦୁଝର ଜିଲ୍ଲା ଶାଖା ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି ।
ଖାଉଟି ସାମଗ୍ରୀ ଅହେତୁକ ଦରଦାମ ବୃଦ୍ଧି ସାଧାରଣ ଲୋକଙ୍କୁ କଲବଲ କରୁଛି । ଆଗାମୀ ଦିନରେ ଯଦି ଏହିସବୁ ସାମଗ୍ରୀର ମୂଲ୍ୟ ହ୍ରାସ ନ ହୁଏ ତେବେ ଆନ୍ଦୋଳନକୁ ଜୋରଦାର କରାଯିବ ବୋଲି ଚେତାବନୀ ଦେଇଛି କମ୍ୟୁନିଷ୍ଟ ପାର୍ଟି । ନିକଟରେ ପେଟ୍ରୋଲ-ଡିଜେଲ ଦର ବୃଦ୍ଧି ନେଇ ରାଜ୍ୟରେ ଶାସକ ଦଳ ମଧ୍ୟ ବିକ୍ଷୋଭ କରିଥିଲା ।
ଉଲ୍ଲେଖଯୋଗ୍ୟ, ଦୀର୍ଘ ଦିନର ଲଗାଣ ବୃଦ୍ଧି ପରେ ଦେଶରେ ତୈଳ ଦର ସର୍ବୋଚ୍ଚ ସ୍ତରରେ ରହିଛି । ଏପରିସ୍ଥଳେ କେନ୍ଦ୍ର ସରକାରଙ୍କ ପକ୍ଷରୁ ଦୀପାବଳି ଭେଟି ପୂର୍ବକ ଆଜିଠୁ ପେଟ୍ରୋଲ ଲିଟର ପିଛା ୫ ଟଙ୍କା ଡିଜେଲ ୧୦ ଟଙ୍କା ହ୍ରାସ କରାଯାଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
