କେନ୍ଦୁଝର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି(ରବିବାର) ୪ଟି ଜିଲ୍ଲାର ୧୨୮ଟି ହାଇସ୍କୁଲର ରୂପାନ୍ତରଣ କାର୍ଯ୍ୟକ୍ରମର ଶୁଭାରମ୍ଭ କରିବେ । ଏଥିମଧ୍ୟରେ କେନ୍ଦୁଝର ଜିଲ୍ଲାର ୧୦୦ଟି ହାଇସ୍କୁଲ ମଧ୍ୟ ସାମିଲ ହୋଇଛି । ଜିଲ୍ଲାରେ ଅତିରିକ୍ତ ଜିଲ୍ଲା ଖଣିଜ ପାଣ୍ଠିରୁ ଅର୍ଥ ଖର୍ଚ୍ଚ ହୋଇଥିବା ବେଳେ ଏହାକୁ ନେଇ ପ୍ରଶ୍ନ ଉଠାଇଛି ବିଜେପି ।
ଜିଲ୍ଲାର ୧୦୦ଟି ହାଇସ୍କୁଲରେ ରାଜ୍ୟ ସରକାର ଅର୍ଥ ଖର୍ଚ୍ଚ କରିଛନ୍ତି । ଏହା ସହ ଜିଲ୍ଲାରେ ଅତିରିକ୍ତ ଜିଲ୍ଲା ଖଣିଜ ପାଣ୍ଠିରୁ ଅର୍ଥ ଖର୍ଚ୍ଚ ହୋଇଛି । ଏହାକୁ ନେଇ ପ୍ରଶ୍ନ ଉଠାଇଛି ବିଜେପି । ଆଜି ଏ ନେଇ ଜିଲ୍ଲା କାର୍ଯ୍ୟାଳୟ ପରିସରରେ ଏକ ସାମ୍ବାଦିକ ସମ୍ମିଳନୀ କରି ଜିଲ୍ଲା ପ୍ରଶାସନକୁ ଘେରିଛି ବିଜେପି । ରାଜ୍ୟ ସରକାର ଅନ୍ୟ ଜିଲ୍ଲାରେ ରାଜକୋଷରୁ ହାଇସ୍କୁଲ ରୂପାନ୍ତରଣ କରୁଥିବା ବେଳେ କେନ୍ଦୁଝର ଜିଲ୍ଲାରେ DMF କ'ଣ ପାଇଁ ଉପଯୋଗ ହେଉଛି ସେ ନେଇ ପ୍ରଶ୍ନ ଉଠାଇଛି ବିଜେପି ।
ପୂର୍ବରୁ ହାଇସ୍କୁଲ ପାଇଁ ଖର୍ଚ୍ଚ କରିଥିବା ବେଳେ ଜିଲ୍ଲା ଖଣିଜ ପାଣ୍ଠି ବୈଠକରେ ଏହାର ଅନୁମତି ନେଇଥିବା ଅଭିଯୋଗ କରିଛି ବିଜେପି । ଏହା ସହ ସମସ୍ତ ହାଇସ୍କୁଲରେ ସଠିକ କାର୍ଯ୍ୟ ହେଉନଥିବା ବେଳେ ତରବରିଆ ଭାବେ ଭଙ୍ଗା କାନ୍ଥରେ ରଙ୍ଗ ବୋଳି ବିଲ କରୁଥିବା ନେଇ ଅଭିଯୋଗ କରିଛି ବିଜେପି । ଏନେଇ ଆଗାମୀ ଦିନରେ ଆନ୍ଦୋଳନ ଜୋର କରିବ ବୋଲି ବିଜେପି ଚେତାବନୀ ଦେଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
