କଟକ: ସିଲଭରସିଟି କଟକରେ ବେଧଡ଼କ ଭାବେ ଚାଲିଛି ଲୁଟ ଉଦ୍ୟମ । କାହା ଠାରୁ ଲୁଟ କରିବାରେ ସଫଳ ହେଉଛି ଲୁଟେରା ତ ଆଉ କିଏ ଅଳ୍ପକେ ବର୍ତ୍ତିଯାଉଛି ଲୁଟେରାଙ୍କ କବଳରୁ । ଏମିତି ଏକ ଘଟଣା ଆଜି କଟକ ସିଡିଏରେ ଦେଖିବାକୁ ମିଳିଛି । ବୋମା ପକାଇ ଟଙ୍କା ଲୁଟି ନେବା ପାଇଁ ଉଦ୍ୟମ କରିଥିଲେ ଦୁର୍ବୃତ୍ତ।
ସୂଚନା ଅନୁସାରେ, କଟକ ସିଡିଏ ଅଶ୍ବିନୀ ହସ୍ପିଟାଲ ନିକଟରେ ଥିବା ପେଟ୍ରୋଲ ପମ୍ପର କର୍ମଚାରୀମାନେ ସଂସ୍ଥାର 15 ଲକ୍ଷ ଟଙ୍କା ଜମା କରିବା ପାଇଁ ସିଡିଏ ୭ ନମ୍ବର ଯାଉଥିଲେ । ହଠାତ ପେଟାନାଳ ନିକଟରେ ଦୁଇଜଣ ଯୁବକ ଏକ ହୋଣ୍ଡା ସାଇନ ଗାଡ଼ିରେ ଆସି ଉକ୍ତ କର୍ମଚାରୀଙ୍କ ଉପରକୁ ଲଙ୍କାଗୁଣ୍ଡ ମାଡ଼ କରିଥିଲେ । ଯାହା ଫଳରେ କର୍ମଚାରୀମାନେ ରହିଯିବାରୁ ଦୁର୍ବୃତ୍ତମାନେ ଟଙ୍କା ବ୍ୟାଗକୁ ଛଡ଼ାଇବା ପାଇଁ ଚେଷ୍ଟା କରିଥିଲେ ।
ଯାହାକୁ ବିରୋଧ କରିଥିଲେ କର୍ମଚାରୀ । ଏହା ଦେଖି ଘଟଣାସ୍ଥଳେ ଜମିଯାଇଥିଲା ସ୍ଥାନୀୟ ଲୋକଙ୍କ ଭିଡ । ତେବେ ଏହାକୁ ଦେଖି ଭୟଭୀତ ହୋଇ ଲୋକଙ୍କ ଉପରକୁ ବୋମାମାଡ କରି ଟଙ୍କା ବ୍ୟାଗ ଛାଡି ଫେରାର ହୋଇଯାଇଥିଲେ ଦୁର୍ବୃତ୍ତ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଥିବା ସୂଚନା ରହିଛି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
