କଟକ: ଟାଉନହଲ ପରିସରରେ ଜରୁରୀକାଳୀନ ପରିସ୍ଥିତି(Emergency) ରାଜବନ୍ଦୀମାନଙ୍କ ରାଜ୍ୟସ୍ତରୀୟ ସମାବେଶ ଓ ଦ୍ବିତୀୟ ସ୍ବାଧୀନତା ସଂଗ୍ରାମ ସ୍ମାରକ ଦିବସ ପାଳିତ ହୋଇଛି । ଏଥିରେ ପୂର୍ବତନ ମନ୍ତ୍ରୀ ପ୍ରସନ୍ନ ଆଚାର୍ଯ୍ୟ, ଅମର ଶତପଥୀ, ଶଶିଭୂଷଣ ବେହେରା ଓ ବିଜେପି ନେତା ବିମ୍ବାଧର କୁଅଁର ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଏହି ଅବସରରେ ଜରୁରୀକାଳୀନ ପରିସ୍ଥିତି ରାଜବନ୍ଦୀ ମାନଙ୍କ ସମସ୍ୟା ଓ ଏହାର ସମାଧାନ ସଂପର୍କରେ ଆଲୋଚନା କରାଯାଇଥିଲା ।
ଓଡିଶାରେ ଜାରି ରହିଥିବା ବିଜେଡି ସରକାର ୨୦୧୯ ମସିହା ନିର୍ବାଚନ ସମୟରେରେ ଜରୁରୀ ପରିସ୍ଥିତିରେ ଗିରଫ ହୋଇଥିବା ବନ୍ଦୀ ମାନଙ୍କୁ ସହାୟତା ଯୋଗାଇବା ପାଇଁ ନିର୍ବାଚନୀ ଇସ୍ତାହାରରେ ସ୍ଥାନ ଦେଇଥିଲା । ହେଲେ ତାହା ଏଯାବତ ପୂର୍ଣ୍ଣ ହୋଇ ପାରିନାହିଁ । ତେବେ ଅନେକ ସଂଗ୍ରାମୀ ନେତା ଏବେବି ଜୀବିତ ଅଛନ୍ତି ଯେଉଁମାନେ ଏବେ ଦାରିଦ୍ର୍ୟର ସୀମାରେଖା ତଳେ କଳାତିପାତ କରୁଛନ୍ତି । ତେଣୁ ଏହି ଦିଗରେ ରାଜ୍ୟ ସରକାର ଶୀଘ୍ର ନଜର ଦେବାକୁ ସଂଗ୍ରାମୀ ନେତାମାନେ ଦାବି କରିଛନ୍ତି ।
୧୯୭୫ ମସିହା ଜୁନ ମାସ ୨୫ତାରିଖରେ ଦେଶରେ ଘୋଷଣା ହୋଇଥିଲା ଜରୁରୀ ପରିସ୍ଥିତି । ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ସମୟରେ ଦେଶରେ ଜାରି ହୋଇଥିଲା ଏହି କଠୋର ନିଷ୍ପତ୍ତି । ତେବେ ଏହି ପରିସ୍ଥିତିରେ ଅନେକ ବଡ଼ ବଡ଼ ନେତା ଗିରଫ ହୋଇ ଜେଲ୍ ଯାଇଥିଲେ । ଅନେକ ଛାତ୍ର ମାନଙ୍କ ଭବିଷ୍ୟତ ମଧ୍ୟ ନଷ୍ଟ ହୋଇଥିଲା । ସେହି ସମୟରେ ରାଜବନ୍ଦୀମାନଙ୍କୁ କିଛି ରାଜ୍ୟରେ ସଂଗ୍ରାମୀର ମାନ୍ୟତା ଦେବା ସହ ଆର୍ଥିକ ସହାୟତା ଯୋଗାଇ ଦିଆଯାଇଥିଲା । କିନ୍ତୁ କେନ୍ଦ୍ର ଏହି ଦିଗରେ ଏଯାବତ କିଛି ଠୋସ୍ ପଦକ୍ଷେପ ନେଇନି ।
ଇଟିଭି ଭାରତ, କଟକ
