କଟକ: ବିଶ୍ବ ସ୍ତରୀୟ ହେବ ଏସସିବି ମେଡିକାଲ । ରୋଗୀଙ୍କ ଚିକିତ୍ସା ଠୁ ଆରମ୍ଭ କରି ନୂତନ ଧରଣର ପ୍ରଯୁକ୍ତି ବିଦ୍ୟାରେ ଝଲସିବ ମେଡିକାଲ । ପ୍ରତି ବିଭାଗକୁ କରାଯିବ ସଂପ୍ରସାରଣ । ହେଲେ ଏହାରି ଭିତରେ ସେହି ଗୋଟିଏ ଦୁଃଖ ସମ୍ନାକୁ ଆସୁଛି । ଯାହା ହେଉଛନ୍ତି ବସ୍ତି ବାସିନ୍ଦା ଓ ସରକାରୀ କ୍ବାଟର ରେ ରହୁଥିବା ବ୍ୟକ୍ତିମାନଙ୍କର । ଆଉ ମାତ୍ର କେଇଟା ଦିନ ପରେ ଉଜୁଡି ଯିବ ସେମାନଙ୍କ ବାସ । ଯାହାକୁ ନେଇ ଚିନ୍ତାରେ ବସ୍ତିବାସିନ୍ଦା ।
ଏ ହେଉଛି ମହାନଦୀ କୂଳରେ ଗଢିଉଠିଥିବା କଟକ ହାଡିଆପଠା ବସ୍ତି ଅଞ୍ଚଳ । କଟକ ଏସସିବି ମେଡିକାଲ ସମ୍ପ୍ରସାରଣ ନେଇ ରାଜ୍ୟ ସରକାର ନିଷ୍ପତ୍ତି ନେବାପରେ ରାଜ୍ୟବାସୀ ବେଶ ଖୁସ । କିନ୍ତୁ ଏଥିଯୋଗୁଁ ବିସ୍ଥାପିତ ହେବେ ଏଠାକାର ବସ୍ତିବାସିନ୍ଦା ଓ ସରକାରୀ କ୍ବାର୍ଟରରେ ରହୁଥିବା ଲୋକେ । ଘର ଭଙ୍ଗାଯିବା ନେଇ ଘୋଷଣା ପରେ ସଭିଙ୍କ ମୁହଁରେ କେବଳ ନିରାଶାର ଛାୟା। ଆଗକୁ ମାଟ୍ରିକ ପରୀକ୍ଷା ଥିବାବେଳେ ପିଲାଙ୍କ ପାଠପଢାରେ ବାଧାକୁ ଦେଖି ଚିନ୍ତିତ ପରିବାର ।
ଏହି ମେଗା ପ୍ରୋଜେକ୍ଟ ପାଇଁ ଆସନ୍ତା ଫେବୃଆରୀ 28 ସୁଦ୍ଧା ସରିବ ଜମି ଅଧିଗ୍ରହଣ କାମ । ଏଥିପାଇଁ ଆରମ୍ଭ ହୋଇଗଲାଣି ଜୋରଦାର ପ୍ରସ୍ତୁତି । ଅନ୍ୟପଟେ ଏହି ପ୍ରୋଜେକ୍ଟ ବିକାଶର ଆଲୋକ ହେବ ବୋଲି ହାଡିଆ ପଠା ବୁଲି ଏଭଳି ପ୍ରତିକ୍ରିୟା ଦେଇଛନ୍ତି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ । ଏପଟେ ପର୍ଯ୍ୟାୟକ୍ରମେ ଶେଷ ହେବ ଉଚ୍ଛେଦ ପ୍ରକ୍ରିୟା । ଏଥିଯୋଗୁଁ ପିଲାଙ୍କ ଭବିଷ୍ୟତ ଉପରେ କୌଣସି ଆଞ୍ଚ ଆସିବନି ବୋଲି କହିଛନ୍ତି ଜିଲ୍ଲାପାଳ ।
ଏସସିବି ସମ୍ପ୍ରସାରଣ ହେଲେ ଚିକିତ୍ସା ଠୁ ଆରମ୍ଭ କରି ନୂତନ ପ୍ରଯୁକ୍ତି ବିଦ୍ୟାରେ ଝଲସିବ ମେଡିକାଲ । କିନ୍ତୁ ଏହି ପ୍ରୋଜେକ୍ଟ ହାଡିଆପଠା ବାସୀଙ୍କ ନିଦ ହଜାଇ ଦେଇଥିବାବେଳେ ଆଶା ଆଶଙ୍କାରେ ବିସ୍ଥାପିତ ।
କଟକରୁ ପ୍ରଭୁ କଲ୍ୟାଣ ପାଲ୍, ଇଟିଭି ଭାରତ
