କଟକ: ମହାପ୍ରଭୁଙ୍କ ରଥଯାତ୍ରାକୁ ନେଇ ଲାଗି ରହିଛି ସସପେନ୍ସ । ତେବେ ବଡଦାଣ୍ଡରେ ରଥ ଗଡିବ କି ନାହିଁ ଏନେଇ ସୋମବାର ଶୁଣାଣି କରିବେ ସୁପ୍ରିମକୋର୍ଟ । ରଥଯାତ୍ରା ପାଇଁ ଅନୁମତି ପ୍ରଦାନ କରିବାକୁ ସର୍ବୋଚ୍ଚ ନ୍ୟାୟାଳୟରେ ଏବେ ସୁଦ୍ଧା ଏକାଧିକ ପିଟିସନ ଦାଖଲ ହୋଇସାରିଲାଣି ।
ସୋମବାର ଦିନ ୧୧ଟାରେ ସୁପ୍ରମକୋର୍ଟର ଜଣିକିଆ ବେଞ୍ଚ ପୁରୀ ରଥଯାତ୍ରା ମାମଲାର ଶୁଣାଣି କରିବେ । ଭିଡିଓ କନଫରେନ୍ସିଂ ଜରିଆରେ ମାମଲାର ଶୁଣାଣି କରିବେ ଜଷ୍ଟିସ ଏସ ରବୀନ୍ଦ୍ର ଭଟ୍ଟ । ରଥଯାତ୍ରା ପାଇଁ ଅନୁମତି ଦେବାକୁ ଏକାଧିକ ପିଟିସନ ଦାଖଲ କରାଯାଇଛି । ରୀତିନୀତି ଅନୁଯାୟୀ କେବଳ ପୁରୀରେ ରଥଯାତ୍ରା ପାଇଁ ଅନୁମତି ଦେବାକୁ ପିଟିସନ ଦାୟର ହୋଇଛି ।
ଏପଟେ ରଥଯାତ୍ରକୁ ନେଇ ରାଜ୍ୟବାସୀ ଏବେ ବି ଆଶାବାଦୀ ରହିଛନ୍ତି । ମୂଳପୀଠରେ ରଥଯାତ୍ରା ହେବା ନିହାତି ଜରୁରୀ ବୋଲି ଶନିବାର ପୁରୀ ରାଜା ଗଜପତି ଦିବ୍ୟସିଂହ ଦେବ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ । ତେବେ ବଡଦାଣ୍ଡରେ ମହାପ୍ରଭୁଙ୍କ ରଥ ଗଡିବ କି ନାହିଁ ସୋମବାର କୋର୍ଟଙ୍କ ଶୁଣାଣି ପରେ ହିଁ ସ୍ପଷ୍ଟ ହେବ ।
କଟକରୁ ନାରାୟଣ ସାହୁ, ଇଟିଭି ଭାରତ
