କଟକ: ଚୌଦ୍ବାର ଜେଲରେ ପୁଣି ଅପରାଧି ଷଡଯନ୍ତ୍ର । ଜେଲ ଭିତରେ ଥାଇ ଅପରାଧର ମଞ୍ଜି ବୁଣି ଚାଲିଛି ଦୁର୍ଦ୍ଦାନ୍ତ ଅପରାଧି ଲିଟୁଆ ବେହେରା । ଧଳସାମନ୍ତର ପ୍ରମୁଖ ସହଯୋଗୀ କୁହାଯାଉଥିବା ଲିଟୁଆ ବେହେରା ଜେଲ ଭିତରେ ଥାଇ 50 ଲକ୍ଷ ଟଙ୍କା ଦାଦାବଟି ମାଗିବା ସହ ଜୀବନର ମାରିଦେବାକୁ ଧମକ ଦେଉଛି । ଏଭଳି ଅଭିଯୋଗ ଆସିବା ପରେ 4 ଜଣକୁ ଗିରଫ କରିଛି ଚାଉଳିଆଗଞ୍ଜ ପୋଲିସ ।
ମହାନଦୀ ବିହାରର ଗୋପାଳ ଗୁପ୍ତା ନାମକ ଜଣେ ବ୍ୟକ୍ତିକୁ 50 ଲକ୍ଷ ଟଙ୍କା ଦାଦାବଟି ମାଗିବା ସହ ନ ଦେଲେ ଜୀବନରୁ ମାରିଦେବାକୁ ଅଭିଯୋଗ ହୋଇଥିଲା । ଯାହାକୁ ନେଇ ଚାଉଳିଆଗଞ୍ଜ ଥାନାରେ ଏତଲା ଦେବା ପରେ 4 ଜଣକୁ ଗିରଫ କରାଯାଇଥିବାବେଳେ, ଏଥିରୁ ଦୁଇ ଜଣ ଲିଟୁଆର ସହଯୋଗୀ ହୋଇଥିବାବେଳେ, ଅନ୍ୟ ଦୁଇ ଜଣ ଲିଟୁଆର ବାପା ମାଆ ।
ଅନ୍ୟପଟେ, ଏହି ମାମଲାର ଆହୁରି ତଦନ୍ତ ଜାରି ରଖିଛି ପୋଲିସ । ପ୍ରକାଶଯୋଗ୍ୟ, ଲିଟୁଆର ଆହୁରି ସହଯୋଗୀ ସହରରେ ରହୁଛନ୍ତି । ସେମାନଙ୍କୁ ଖୁବ ଶୀଘ୍ର ଗିରଫ କରାଯିବ ବୋଲି କହିଛନ୍ତି ଅତିରିକ୍ତ ଡିସିପି ତିରନାଥ ମିଶ୍ର । ଏହା ବ୍ୟତୀତ ସକିଲର ସହଯୋଗୀ ଓ ତାର ମହିଳାବନ୍ଧୁକୁ ମଧ୍ୟ ଦାଦାବଟି ମାଗିବା ଉଦ୍ଦେଶ୍ୟରେ ଗିରଫ କରାଯାଇଛି । ତେବେ ଜେଲ ମଧ୍ୟରେ କୁଖ୍ୟାତ ଅପରାଧିମାନେ ଜେଲ ରହି କିପରି ଅପରାଧ ଘଟାଇବାକୁ ଉଦ୍ୟମ କରୁଛନ୍ତି ତାହା ଏବେ ସାଧାରଣରେ ବଡ ପ୍ରଶ୍ନବାଚୀ ସୃଷ୍ଟି କରିଛି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
