କଟକ: ମହାନଦୀରେ ବନ୍ୟା ଜଳ ବୃଦ୍ଧି ପାଇଥିବାରୁ କଟକ ସହରରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି । କାଠଯୋଡ଼ି ବିହାରର ମଝି ସାହିରେ ଥିବା ପ୍ରାୟ ୧୦୦ରୁ ଊର୍ଦ୍ଧ୍ବ ଘର ଜଳବନ୍ଦୀ ଅବସ୍ଥାରେ ରହିଛନ୍ତି । ନଦୀକୂଳରେ ସରକାରଙ୍କ ଜାଗାରେ ରହୁଥିବା ବସ୍ତିବାସିନ୍ଦା ପ୍ରଶାସନର ସହାୟତା ଲୋଡ଼ିଛନ୍ତି ।
ଏ ନେଇ ବସ୍ତିବାସିନ୍ଦା ଲିଟୁ ଜେନା କହିଛନ୍ତି, " ଆଜି ଭୋର ସମୟରୁ ବସ୍ତିରେ ପାଣି ପଶି ଯାଇଥିଲା । ହଠାତ କିଛି ଭାବିବା ପୂର୍ବରୁ ପାଣି ବୃଦ୍ଧି ପାଇବାରେ ଲାଗିଥିଲା । ଚାହୁଁ ଚାହୁଁ ବନ୍ୟାରେ ଘର ଭାସି ଯାଇଥିଲା । ଘରେ ଥିବା ସମସ୍ତ ଆସବାବପତ୍ର ବି ବନ୍ୟା ଜଳରେ ଭାସି ଯାଇଥିଲା । ଆମେ ପାଲରେ ଘର କରି ଦୀର୍ଘ ବର୍ଷ ଧରି ରହୁଥିଲୁ । ମାତ୍ର ବନ୍ୟା, ଆମ ଘରକୁ ନଷ୍ଟ କରିଦେଇଛି । ଆମେ ତ ସରକାରଙ୍କ ଜାଗାରେ ଘର କରି ରହିଥିଲୁ । ଯାହା ସରକାର କରିବେ ।"
ଗତକାଲି ଠାରୁ ପୋଲିସ ସତର୍କ କରାଇଥିଲା । ବସ୍ତି ଛାଡି ଅନ୍ୟତ୍ର ରହିବାକୁ ବି ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଇଛି । ମାତ୍ର ଘରେ ଜିନିଷପତ୍ର ଥିବାରୁ ଘର ଆଗରେ ଅନେକ ବାସିନ୍ଦା ଜଗି ରହିଛନ୍ତି । ସରକାରଙ୍କ ପକ୍ଷରୁ ଖାଦ୍ୟପେୟର ବ୍ୟବସ୍ଥା କରାଯାଇଛି । ନିକଟରେ ଥିବା ସ୍ଥାନୀୟ ସ୍କୁଲରେ ରହିବାକୁ ସରକାରଙ୍କ ପକ୍ଷରୁ ବ୍ୟବସ୍ଥା କରାଯାଇଛି । ତେବେ ପାଣି ଘେରରେ ଟ୍ୟୁବୱେଲ ରହିଥିବାରୁ ସେଥିରୁ ଗୋଳିଆ ପାଣି ବାହାରୁଛି । ଫଳରେ ପିଇବା ପାଣିର ସମସ୍ୟା ଦେଖାଯାଇଛି ବୋଲି ବସ୍ତିର ଅନ୍ୟ ଏକ ବାସିନ୍ଦା କହିଛନ୍ତି ।
ଇଟିଭି ଭାରତ, କଟକ
