କଟକ: ପରୀକ୍ଷା ପରିଚାଳନା କରିବାରେ ପୁଣି ବିଫଳ ମାଧ୍ୟମିକ ଶିକ୍ଷା ପରିଷଦ । ଓଟିଇଟି ପରୀକ୍ଷା ପରିଚାଳନା ଓ ପ୍ରଶ୍ନପତ୍ରରେ ଅନେକ ତ୍ରୁଟି ଥିବା ପରୀକ୍ଷାର୍ଥୀମାନେ ଅଭିଯୋଗ କରିଛନ୍ତି । ଅଧିକାଂଶ ପ୍ରଶ୍ନପତ୍ର ବିଭିନ୍ନ ଭାଷା ଯଥା ତେଲୁଗୁ, ବଙ୍ଗାଳୀ ଭାଷାରେ ଆସିଥିବାରୁ ପ୍ରଶ୍ନପତ୍ର ବୁଝି ପାରିନଥିଲେ ପରୀକ୍ଷାର୍ଥୀ । ଫଳରେ ଉତ୍ତର ଲେଖିବାରେ ସମସ୍ୟା ଉପୁଜିଥିଲା । ଏଭଳି ଗୁରୁତର ତ୍ରୁଟିକୁ ନେଇ ପରୀକ୍ଷାର୍ଥୀମାନଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ।
ତେବେ କେବଳ ପ୍ରଶ୍ନପତ୍ର ନୁହଁ ଉତ୍ତରରେ ମଧ୍ୟ ତ୍ରୁଟି ରହିଛି । ଏବେ ସଠିକ ମୂଲ୍ୟାୟନ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ତ୍ରୁଟିକୁ ଚ୍ୟାଲେଞ୍ଜ କରିବାପାଇଁ ବୋର୍ଡ ପକ୍ଷରୁ ପରୀକ୍ଷାର୍ଥୀଙ୍କୁ ଆହ୍ବାନ କରାଯାଇଛି । ଆସନ୍ତା ୧୩ ତାରିଖ ମଧ୍ୟରାତ୍ର ପର୍ଯ୍ୟନ୍ତ ଚ୍ୟାଲେଞ୍ଜ କରିବାକୁ ବୋର୍ଡ ପକ୍ଷରୁ ଆହ୍ବାନ କରାଯାଇଛି । ପ୍ରତିଟି ତ୍ରୁଟିକୁ ଚ୍ୟାଲେଞ୍ଜ କରିବାକୁ ପରୀକ୍ଷାର୍ଥୀଙ୍କୁ 500ଟଙ୍କା ଦେବାକୁ ପଡିବ । ଅନ୍ୟପଟେ ଏଭଳି ନିୟମକୁ ବିରୋଧ କରିଛନ୍ତି ପରୀକ୍ଷାର୍ଥୀ । ଏନେଇ ଆଜି କିଛି ପରୀକ୍ଷାର୍ଥୀ ବୋର୍ଡ କର୍ତ୍ତୃପକ୍ଷଙ୍କୁ ଭେଟି ଦାବି ପତ୍ର ପ୍ରଦାନ କରିଛନ୍ତି ।
ସୂଚନାଯୋଗ୍ୟ ଗତବର୍ଷ ମଧ୍ୟ ଓଟିଇଟି ପରୀକ୍ଷା ଚାଲିଥିବା ସମୟରେ ପ୍ରଶ୍ନପତ୍ର ଭାଇରାଲ ହେବାରୁ ପରୀକ୍ଷା ବାତିଲ କରାଯାଇଥିଲା । ତେବେ ଚଳିତ ବର୍ଷ ଏହି ପରୀକ୍ଷାକୁ ଅନଲାଇନରେ କରାଯାଇଥିଲେ ବି ବହୁ ତ୍ରୁଟି ଦେଖିବାକୁ ମିଳିଛି । ତେବେ ଏସମ୍ପର୍କରେ ବୋର୍ଡ କର୍ତ୍ତୃପକ୍ଷ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
