କଟକ: ବ୍ୟାଙ୍କ କର୍ମଚାରୀଙ୍କୁ ମରଣାନ୍ତକ ଆକ୍ରମଣ । ସୋମବାର ବିଳମ୍ବିତ ରାତିରେ କଟକର ନିଶ୍ଚିତକୋଇଲି ଥାନା ବୁହାଳୋ ପଞ୍ଚାୟତ ନାଗାମଠ ନିକଟରେ କେତେକ ଦୁର୍ବୃତ୍ତ ଜଣେ ବ୍ୟାଙ୍କ କର୍ମଚାରୀଙ୍କୁ ମରଣାନ୍ତକ ଆକ୍ରମଣ କରି ୩୦ ହଜାର ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି।
ଜିଲ୍ଲାର ନେମାଳ ଥାନା ଅନ୍ତର୍ଗତ କଳମିଶ୍ରୀ ପଞ୍ଚାୟତ ପୁରୁଣାପାରି ଗ୍ରାମର ରମେଶ ରାଉତ କଟକ କେନ୍ଦ୍ର ସମବାୟ ବ୍ୟାଙ୍କ ସାଲେପୁର ଶାଖାରେ କାର୍ଯ୍ୟ କରନ୍ତି। ବିଳମ୍ବିତ ରାତିରେ ରମେଶ ବାଇକ ଯୋଗେ କେନ୍ଦ୍ରାପଡା କେନାଲ ବନ୍ଧରେ ଫେରୁଥିବାବେଳେ ନାଗାମଠ ନିକଟରେ କିଛି ଦୁର୍ବୃତ୍ତ ତାଙ୍କୁ ଛୁରା ମାଡ କରି ତାଙ୍କ ନିକଟରୁ ୩୦ ହଜାର ଟଙ୍କା ଲୁଟି ନେଇ ଫେରାର ହୋଇଯାଇଥିଲେ।
ଦୁର୍ବୃତ୍ତଙ୍କ କବଳରୁ ନିଜକୁ ବଞ୍ଚାଇବା ପାଇଁ ସେ ବାଇକକୁ ଫୋପାଡ଼ି କେନାଲ ଭିତରକୁ ଡେଇଁ ପଡ଼ିଥିଲେ। ପାଣିରେ ପଡ଼ିବା ପରେ ରମେଶ ଚିତ୍କାର କରିବାରୁ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି 108 ଆମ୍ବୁଲାନ୍ସ ଯୋଗେ ନିଶ୍ଚିତକୋଇଲି ଗୋଷ୍ଠୀସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ।
କଟକରୁ ନାରାୟଣ ସାହୁ, ଇଟିଭି ଭାରତ
