କଟକ: ବାଲିଯାତ୍ରା ତୋରଣ ପଡି ଜଣେ ଯୁବତୀ ଗୁରୁତର। ବାଲିଯାତ୍ରା ପଡିଆରେ ଘଟିଥିବା ଏହି ଅଘଟଣର ଶିକାର ହୋଇଛନ୍ତି ନୂଆପଡା ଅଞ୍ଚଳର ଯୁବତୀ ଚିନ୍ମୟୀ ସାହୁ। ସେ ତାଙ୍କ ଦାଦାଙ୍କ ସହ ବାଲିଯାତ୍ରା ଦେଖିବାକୁ ଆସିଥିବାବେଳେ ବାଲିଯାତ୍ରାର ଏକ ଗେଟର ତୋରଣଟି ତାଙ୍କ ଉପରେ ପଡି ଯାଇଥିଲା । ତୁରନ୍ତ ତାଙ୍କୁ ସେଠାରେ ଥିବା ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲେ ବି ସେଠାରେ ଆମ୍ବୁଲାନ୍ସ ସେବା ନଥିବାରୁ ତାଙ୍କୁ ଅଗ୍ନିଶମ ଗାଡ଼ିରେ ଏସସିବି ପଠାଯାଇଛି। ତେବେ ପ୍ରଶାସନ ର ଏଭଳି କାମକୁ ନେଇ ଦର୍ଶକ ସମାଲୋଚନା କରିଛନ୍ତି।
ବାଲିଯାତ୍ରା ପଡ଼ିଆରେ ଅଘଟଣ। ଦାଦା ଓ ଝିଆରୀ ବାଲିଯାତ୍ରା ଦେଖିବା ପାଇଁ ପଡ଼ିଆରେ ପ୍ରବେଶ କରୁଥିବା ସମୟରେ ତୋରଣ ପଡି ଯୁବତୀ ଗୁରୁତର । ସବୁଠାରୁ ବଡ ଆଉ ଆଶ୍ଚର୍ଯ୍ୟକର କଥା ହେଲା, ସରକାର ବାଲିଯାତ୍ରାକୁ ସରକାରୀ ମାନ୍ୟତା ମିଳିବାର ଡିଣ୍ଡିମ ପିଟୁଥିବାବେଳେ କୌଣସି ଜରୁରୀକାଳୀନ ପରିସ୍ଥିତି ପାଇଁ ଏତେ ବଡ ଆୟୋଜନରେ ସାମିଲ ନାହିଁ ‘ଆମ୍ବୁଲାନ୍ସ’ । ସେପଟେ ତୋରଣକୁ ଠିକ ଭାବରେ ବନ୍ଧା ଯାଇନଥିବାରୁ ତାହା ପଡି ଯାଇଥିବାର ଅଭିଯୋଗ କରିଛନ୍ତି ଯୁବତୀଙ୍କ ସମ୍ପର୍କୀୟ ।
ଯୁବତୀଙ୍କ ପଛ ମୁଣ୍ଡ ଓ ଆଖିର ଉପରି ଭାଗରେ ତୋରଣ ପଡିବାରୁ ଯୁବତୀ ଜଣକ ଗୁରୁତର ଭାବେ ଆହତ ହୋଇଥିଲେ। ତେବେ ସେଠାରେ ଥିବା ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇ ପ୍ରାଥମିକ ଚିକିତ୍ସା କରାଯାଇଥିଲା। ହେଲେ ଅବସ୍ଥା ଗୁରୁତର ହେବାରୁ ତାଙ୍କୁ ଅଗ୍ନିଶମ ଗାଡି ଯୋଗେ ଏସସିବି ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିଲା । ହେଲେ ଆମ୍ବୁଲାନ୍ସ ବଦଳରେ ଥିଲା ଅଗ୍ନିଶନ ବିଭାଗର ଗାଡି । ତେବେ ଏଠାରେ ପ୍ରଶ୍ନ, ଏତେ ବଡ଼ ଐତିହାସିକ ବାଲିଯାତ୍ରାରେ ଯଦି ଆମ୍ବୁଲାନ୍ସର କାମ ଅଗ୍ନିଶମ ଗାଡି କରୁଛି..ଅଗ୍ନିଶମ ବିଭାଗ କାମ କରିବ କିଏ ?
ଗୋଟିଏ ପଟେ ଐତିହାସିକ କଟକ ବାଲିଯାତ୍ରାକୁ ରାଜ୍ୟସ୍ତରୀୟ ସରକାରୀ ମାନ୍ୟତା ଦେବାକୁ ସଜବାଜ ଚାଲିଥିବା ବେଳେ ଏମିତି ଏକ ଅଘଟଣ ଘଟିବା ଓ ପାଖରେ ଆମ୍ବୁଲାନ୍ସ ନଥିବା ପ୍ରସଙ୍ଗ ଅତ୍ୟନ୍ତ ନିନ୍ଦନୀୟ ।
କଟକରୁ ନାରାୟଣ ସାହୁଙ୍କ ରିପୋର୍ଟ, ଇଟିଭି ଭାରତ
