କଟକ: ଆଉ ଦିନ କେଇଟା ପରେ ଧରାପୃଷ୍ଠକୁ ଆସିବେ ମା । ଯାହାଙ୍କ ଆଗମନରେ ଚଳଞ୍ଚଳ ହୋଇଉଠିଛି ସିଲଭର ସିଟି କଟକ । ମଳ ମାସ ଶେଷ ହେବା ପରେ ମୂର୍ତ୍ତି କାମ ସାଙ୍ଗକୁ ରଙ୍ଗ ଲଗା କାମ ଆରମ୍ଭ ହୋଇଯାଇଛି । ମୂର୍ତ୍ତି ନିର୍ମାଣକୁ ନେଇ ହାଇକୋର୍ଟରେ ମାମଲା ଚାଲିଥିବାବେଳେ ଅନେକ ମଣ୍ଡପ ସାଜସଜ୍ଜା କାର୍ଯ୍ୟ ଆଗେଇ ଚାଲିଛି ।
ମୂର୍ତ୍ତି ଶିଳ୍ପୀମାନେ ମଣ୍ଡପରେ ମା’ଙ୍କୁ ବିଭିନ୍ନ ରଙ୍ଗରେ ସଜ୍ଜିତ କରୁଛନ୍ତି। କୋଭିଡ କଟକଣା ପାଇଁ ମୂର୍ତ୍ତିର ଆକାର ୪ ଫୁଟ କରାଯାଇଥିବା ବେଳେ ଏହା ଦ୍ବାରା ପ୍ରଭାବିତ ହୋଇଛନ୍ତି ମୂର୍ତ୍ତି କାରିଗର। ମୂର୍ତ୍ତିର ଆକାର ଛୋଟ ହେବା ଯୋଗୁଁ ସମୟ ଲାଗୁଛି। ସେହିପରି ମା’ଙ୍କ ବସ୍ତ୍ର, ଅଳଙ୍କାର ଆଦିକୁ ମାଟିରେ ନିର୍ମାଣ କରାଯାଉଥିବାରୁ ଅଧିକ ସମୟ ଲାଗୁଥିବା କାରିଗର କହିଛନ୍ତି।
ଅନେକ ପୂଜା ମଣ୍ଡପରେ ମୂର୍ତ୍ତି ରଙ୍ଗ କାମ ଆଜିଠାରୁ ଆରମ୍ଭ ହୋଇଛି। ହାତରେ କାମ ସମୟ ଥିବାରୁ ଦିନ ରାତି ଏକ କରି ମୂର୍ତ୍ତି ନିର୍ମାଣ କାମରେ ଲାଗି ପଡିଛନ୍ତି କାରିଗର। ତେବେ ଆସନ୍ତା ୨ ରୁ ୩ ଦିନ ଭିତରେ ମୂର୍ତ୍ତି କାମ ଶେଷ ହେବ ବୋଲି କାରିଗର କହିଛନ୍ତି।
କଟକରୁ ନାରାୟଣ ସାହୁ, ଇଟିଭି ଭାରତ
