ଆଜି ବିଶ୍ବ ଯୋଗ ଦିବସ । ଯୋଗମୁଦ୍ରାରେ ସାରା ବିଶ୍ବ । ଦେଶର କୋଣ ଅନୁକୋଣରେ ପାଳିତ ହେଉଛି ଅନ୍ତର୍ଜାତୀୟ ଯୋଗ ଦିବସ । ପଲ୍ଲୀ ଠାରୁ ଦିଲ୍ଲୀ ସବୁଠି ଯୋଗର ଝଲକ । ସୁସ୍ଥ ରହିବା ନିମନ୍ତେ ଯୋଗ ଅପରିହାର୍ଯ୍ୟ । ଡେରିରେ ହେଉ ପଛେ ଯୋଗର ମାହାତ୍ମ୍ୟ ବୁଝି ପାରିଛି ଆଧୁନିକ ମଣିଷ ସେଥିପାଇଁ ତ ସାରା ବିଶ୍ବରେ ପାଳିତ ହେଉଛି ଯୋଗ ଦିବସ । ଚଳିତ ବର୍ଷର ଯୋଗର ଥିମ୍ ରହିଛି ୟୋଗା ଫର ହାର୍ଟ । ରାଜ୍ୟର ମଧ୍ୟ କୋଣ ଅନୁକୋଣରେ ମଧ୍ୟ ଯୋଗ କରିଛନ୍ତି ସଭିଏଁ ।
ଭିଡିଓ ସୌଜନ୍ୟ: ବ୍ୟୁରୋ, ଇଟିଭି ଭାରତ
- ଭୁବନେଶ୍ବର: ଆଜି ରାଜଧାନୀର ବିଭିନ୍ନ ସ୍ଥାନରେ ଯୋଗ ଦିବସ ପାଳନ ହେଉଛି । ଭୁବନେଶ୍ବର ସ୍ଥିତ ରେଳ କମ୍ୟୁନିଟି କେନ୍ଦ୍ରରେ ପାଖାପାଖି 5 ଶହ ଲୋକ ଯୋଗ କରିଥିଲେ । ଏହି ଶିବିରକୁ ଉଦଘାଟନ କରିଥିଲେ ପୂର୍ବତଟ ରେଳବାଇର ଅତିରିକ୍ତ ମହାପ୍ରବନ୍ଧକ ସୁଧୀର କୁମାର ।
- ସେହିପରି ବିଏସଏଫ, ସିଆରପିଏଫ, ସିଆଇଏସଏଫ୍, ଆଇଟିବିପି, ଜୁନିୟର ଓ ସିନିୟର୍ ଅଧିକାରୀ ମାନେ ଏକତ୍ରିତ ହୋଇ ଯୋଗ କରିଥିଲେ । ସିଆରପିଏଫର ଷ୍ଟାଡିୟମ ଅନୁଷ୍ଠିତ ହୋଇଥିଲା । ଯେଉଁଥିରେ ପ୍ରାୟ 600ରୁ ଊର୍ଦ୍ଧ୍ବ କର୍ମଚାରୀ ସାମିଲ ହୋଇ ଯୋଗ କରିଥିଲେ ।
- ରାଉରକେଲା: ଇସ୍ପାତ ନଗରୀ ରାଉରକେଲା ମଧ୍ୟ ପାଳିଛି ଯୋଗ ଦିବସ । ହଜାର ହଜାର ଲୋକ ଏକତ୍ରିତ ହୋଇ ଯୋଗ କରିଥିଲେ । ଆବାଳବୃଦ୍ଧବନିତା ଏକତ୍ରିତ ହୋଇ ଯୋଗ କରିଥିଲେ । ଆମ ପୂର୍ବଜମାନେ ଯୋଗ ଦ୍ୱାରା ନିରୋଗ ରହୁଥିଲେ କିନ୍ତୁ ଏହାକୁ ବିଶ୍ୱସ୍ତରରେ ପ୍ରଚଳିତ କରିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଛନ୍ତି ବୋଲି ମତ ପ୍ରକାଶ ପାଇଥିଲା ।
- କେନ୍ଦୁଝର: ଜିଲ୍ଲାରେ ମଧ୍ୟ ବିଭିନ୍ନ ସ୍ଥାନରେ ଯୋଗ ଦିବସ ପାଳିତ ହୋଇଯାଇଛି । ତେବେ କେନ୍ଦୁଝର ସହରରେ ଯୋଗ ମହୋତ୍ସବ କମିଟି ପକ୍ଷରୁ ସରସ୍ଵତୀ ଶିଶୁ ମନ୍ଦିର, ବିବେକାନନ୍ଦ କେନ୍ଦ୍ର ପକ୍ଷରୁ ଗୁଜୁରାଟୀ ସମାଜ, ପତଞ୍ଜଳୀ କେନ୍ଦ୍ର ପକ୍ଷରୁ ଏନଏସ ପୋଲିସ ହାଇସ୍କୁଲରେ ଯୋଗ ଶିବିର ଆୟୋଜନ କରାଯାଇଥିଲା। ଏହି ଶିବିରରେ ସହରର ଶତାଧିକ ଶିକ୍ଷାର୍ଥୀ ସାମିଲ ହୋଇଥିଲା ।
- କୋରାପୁଟ: ସୀମା ସୁରକ୍ଷା ବାହିନୀ ( ବିଏସଏଫ) କ୍ୟାମ୍ପରେ ଆଜି ଅନ୍ତର୍ଜାତୀୟ ଯୋଗ ଦିବସ ପାଳିତ ହୋଇଛି । ବିଏସଏଫ, ଇଣ୍ଡିଆ ରିଜର୍ଭ ବାଟାଲିୟନ ଏବଂ ଓଏସପିର ଶତାଧିକ ଯବାନ ନିଜେ ସୁସ୍ଥ ରହିବା ସହ ସମଗ୍ର ଦେଶବାସୀଙ୍କ ଉନ୍ନତ ସ୍ୱାସ୍ଥ୍ୟ କାମନା କରି ଯୋଗାଭ୍ୟାସ କରିଥିଲେ ।
ଭୁବନେଶ୍ବରରୁ ସଞ୍ଜୀବ ରାୟ ଓ ବିକାଶ ଦାସ, ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, କେନ୍ଦୁଝରରୁ ସନ୍ତୋଷ ମହାପାତ୍ର ଓ କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
