ଭୁବନେଶ୍ବର: କଥା ଦେଇଥିଲେ କଥା ରଖିଲେ । ପୂର୍ବରୁ ଘୋଷଣା କରିଥିବା ପ୍ରତିଶ୍ରୁତି ପାଳନ କଲେ । ଆମେ କହୁଛୁ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କଥା । ଆଗାମୀ ନିର୍ବାଚନରେ ଲୋକସଭା ଆସନର ୩୩ ପ୍ରତିଶତ ସଂରକ୍ଷଣ ମହିଳାଙ୍କ ପାଇଁ ଘୋଷଣା କରିଥିଲେ ନବୀନ । ଆଉ ଏବେ ପ୍ରାର୍ଥୀ ଘୋଷଣା କରି ଏହି କଥା ପୂରଣ କରିଛନ୍ତି ।
ଦେଶର ପ୍ରଥମ ରାଜ୍ୟ ଭାବେ ଏପରି ନିଷ୍ପତ୍ତି ନେଇଥିଲା ଓଡିଶା । ଏହାପରେ ଓଡିଶାକୁ ପଶ୍ଚିମବଙ୍ଗ ଅନୁସରଣ କରିଥିଲା । ପ୍ରାର୍ଥୀ ଘୋଷଣା ବେଳେ ନବୀନ 7ଟି ଲୋକସଭା ଆସନରେ ମହିଳା ପ୍ରାର୍ଥୀଙ୍କୁ ମୈଦାନରେ ଓହ୍ଲାଇଛନ୍ତି । ପ୍ରଥମ ପର୍ଯ୍ୟାୟରେ ୯ଟି ଲୋକସଭା ପ୍ରାର୍ଥୀ ବିଜେଡି ଘୋଷଣା କରିଥିବାବେଳେ ଏଥିରେ ୩ ଜଣ ମହିଳା ପ୍ରାର୍ଥୀ ଥିଲେ । ଏଥିରେ ଥିଲେ ଆସ୍କା ଲୋକସଭା ଆସନ ପାଇଁ ପ୍ରମିଳା ବିଶୋୟୀ, କୋରାପୁଟ ଆସନ ପାଇଁ କୌଶଲ୍ୟା ହିକ୍କା ଏବଂ ସୁନ୍ଦରଗଡ ଆସନରେ ପୂର୍ବତନ ମୁଖ୍ୟମନ୍ତ୍ରୀ ହେମାନନ୍ଦ ବିଶ୍ବାଳଙ୍କ ଝିଅ ସୁନୀତା ବିଶ୍ବାଳ ।
ପରବର୍ତ୍ତୀ ପର୍ଯ୍ୟାୟରେ ଘୋଷଣା ହୋଇଥିବା ୯ଟି ଲୋକସଭା ଆସନରୁ ମଧ୍ୟ ୩ ଜଣ ମହିଳାଙ୍କୁ ମୈଦାନକୁ ଓହ୍ଲାଇଥିଲା ଦଳ । ଯାଜପୁରରୁ ଶର୍ମିଷ୍ଠା ସେଠୀ, ଜଗତସିଂହପୁରରୁ ତିର୍ତ୍ତୋଲ ବିଧାୟିକା ରାଜଶ୍ରୀ ମଲ୍ଲିକ ଏବଂ ଭଦ୍ରକ ଆସନରୁ ମଞ୍ଜୁଲତା ମଣ୍ଡଳଙ୍କୁ ଦଳ ପ୍ରାର୍ଥୀ କରିଥିଲା । ଏହାପରେ ଆଉ ଗୋଟିଏ ଆସନ ପାଇଁ ଦେଖାଦେଇଥିଲା ଉତ୍କଣ୍ଠା । କାହାକୁ କେଉଁଠାରୁ ପ୍ରାର୍ଥୀ କରାଯିବ ସେନେଇ ସମସ୍ତେ ଉତ୍ସାହୀ ଥିଲେ ।
ଶେଷରେ ଆଜି ନିଜ ବାକି ପ୍ରତିଶ୍ରୁତି ପୂରଣ କରିଥିଲେ ନବୀନ । କେନ୍ଦୁଝରରୁ ଚନ୍ଦ୍ରାଣି ମୂର୍ମୁଙ୍କୁ ପ୍ରାର୍ଥୀ କରି 33 ପ୍ରତିଶତ ସଂରକ୍ଷଣର କଥା ରଖିଥିଲେ ବିଜେଡି ସୁପ୍ରିମୋ । ଏହି ଘୋଷଣା ସ୍ପଷ୍ଟ କରିଛି ଯେ ରାଜ୍ୟର ଦକ୍ଷିଣରୁ ଉତ୍ତର ପର୍ଯ୍ୟନ୍ତ ପ୍ରତ୍ୟେକ ଅଞ୍ଚଳରେ ବିଜେଡି ମହିଳାଙ୍କୁ ପ୍ରାର୍ଥୀ ଭାବେ ସାମ୍ନାକୁ ଆଣିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
