ଭୁବନେଶ୍ବର: ଓଡ଼ିଶାକୁ ଛୁଇଁନି ଶୀତ । ଏପଟେ ଚିନ୍ତାରେ ଆଦିବାସୀ ମେଳାର ଶୀତ ବସ୍ତ୍ର ବେପାରୀ । ଭୁବନେଶ୍ବରର ଜନତା ମଇଦାନରେ ପ୍ରଥମ ଥର କେନ୍ଦ୍ର ସରକାରଙ୍କ ଜନଜାତି ମନ୍ତ୍ରଣାଳୟ ପକ୍ଷରୁ ଆରମ୍ଭ ହୋଇଛି ଆଦିବାସୀ ମେଳା 2019 ।
ଏହି ମେଳାରେ ଦେଶର ବିଭିନ୍ନ ରାଜ୍ୟର ଅନେକ ଆଦିବାସୀଙ୍କ ହାତ ତିଆରି ଜିନିଷପତ୍ର ପ୍ରଦର୍ଶନ ସହ ବିକ୍ରି କରାଯାଉଛି । ଆଉ ସେହି ଜିନିଷ ପତ୍ର ଭିତରେ ରହିଛି ଆସାମ, ସିକିମ ଭଳି ରାଜ୍ୟରୁ ଆସିଥିବା ଆଦିବାସୀ ମହିଳାଙ୍କ ହାତ ତିଆରି ସ୍ବେଟର, ଟୋପି, ମଫଲର ଏବଂ ବିଭନ୍ନ ପ୍ରକାରର ଶୀତ ବସ୍ତ୍ର ।
ଓଡ଼ିଶାରରେ ବର୍ତ୍ତମାନ ଶୁଦ୍ଧା ଶୀତ ଅନୁଭୂତ ହୋଇନାହିଁ । ତେଣୁ ଚିନ୍ତାରେ ଶୀତବସ୍ତ୍ର ବେପାରୀ । ଅନେକ ଦୂରରୁ ଓଡ଼ିଶା ଆସି ଭଲ ଦୁଇ ପଇସା ବେପାର କରିବାର ଆଶା ବାନ୍ଧିଥିବା ବେପାରୀଙ୍କ ମୁଣ୍ଡରେ ଚଡକ ପଡିଛି ।
ଏହି ଆଦିବାସୀ ମେଳାରେ ମୋଟ 104ଟି ଷ୍ଟଲ ରହିଥିବା ସହ 20ଟି ରାଜ୍ୟରୁ 204 ଜଣ କୁଶଳୀ କାରିଗର ଆସିଛନ୍ତି । ସାରା ଭାରତର ଆଦିବାସୀଙ୍କ ନିଜସ୍ବ ତିଆରି ଜିନିଷ ପତ୍ର ଏହି ମେଳାରେ ବିକ୍ରି କରାଯାଉଛି । ସାଧାରଣ ଲୋକେ ମଧ୍ୟ ଆଦିବାସୀ କୁଶଳି କାରିଗରୀ ସହ ଅବଗତ ହେଉଛନ୍ତି । ଏହି ମେଳା ଆଜିଠାରୁ ଆରମ୍ଭ ହୋଇ ଆଗାମୀ 11 ତାରିଖରେ ଶେଷ ହେବ ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
