ଭୁବନେଶ୍ବର: ଘାତକ କୋରୋନା ଭାଇରସ ମୁକାବିଲା ପାଇଁ ଆଡଭାଇଜରି ଜାରି କରିଛି ରାଜ୍ୟ ସ୍ବାସ୍ଥ୍ୟ ବିଭାଗ । ଭାଇରସ ମୁକାବିଲା ପାଇଁ ଓଡିଶା ସରକାର ପ୍ରସ୍ତୁତ ରହିଛନ୍ତି । ରାଜ୍ୟରେ ସ୍କ୍ରିନିଂ ୟୁନିଟ ବସାଇବାକୁ ପ୍ରସ୍ତୁତି ଚାଲିଛି । ଏହା ସହ କୋରୋନା ଭାଇରସ ଚିହ୍ନଟ ଓ ମୁକାବିଲା ନେଇ ପ୍ରସ୍ତୁତ ରହିବାକୁ ବିଭିନ୍ନ ହସ୍ପିଟାଲକୁ ଚିଠି ଲେଖିଛି ସ୍ବାସ୍ଥ୍ୟ ବିଭାଗ । ଏପରିକି ଏଭଳି କେସ ଆସିଲେ କେମିତି ଚିକିତ୍ସା କରିବେ କଣ ପଦକ୍ଷେପ ନେବେ ସେମାନେ ତାଙ୍କ ସ୍ତରରେ ନିଷ୍ପତି ନେବେ । କିଭଳି ଆକ୍ରାନ୍ତଙ୍କୁ ଅଲଗା ରଖାଯିବ ଆଉ ଚିକିତ୍ସା କରାଯିବ । ସେ ବ୍ୟବସ୍ଥା କରିବେ। ଏସସିବି, ଭିଏସଏସ ଓ କ୍ୟାପିଟାଲ ହସ୍ପିଟାଲ ନୋଡାଲ ସେଣ୍ଟର ଭାବେ କାର୍ଯ୍ୟ କରିବ ବୋଲି ଆଡଭାଇଜରି ଜାରି କରିଛନ୍ତି ରାଜ୍ୟ ସରକାର ।
ହେଲେ ଏହି ସବୁ ଆଡଭାଇଜରିକୁ ଶକ୍ତ ଚାପୁଡା ମାରିଛନ୍ତି ଖୋଦ ରାଜଧାନୀର କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷ । ଆଜି( ଶନିବାର) ଜଣେ ଚୀନ ଫେରନ୍ତା ଓଡିଆ ଯୁବକ କ୍ୟାପିଟାଲ ହସ୍ପିଟାଲକୁ ଆସିଥିଲେ ନିଜ ସ୍ବାସ୍ଥ୍ୟ ପରୀକ୍ଷା ପାଇଁ । କିନ୍ତୁ ହସ୍ପିଟାଲ କର୍ତ୍ତୃପକ୍ଷ ତାଙ୍କୁ ଚିକିତ୍ସା କରିବା ବଦଳରେ ତାଙ୍କୁ ଆମେ ଏହି କୋରୋନା ଭାଇରସ କଣ ଜାଣିନାହୁଁ । କିଛି କରିପାରିବୁ ନାହିଁ । ତୁମେ ଯାଅ । ଏମିତି କହି ଫେରାଇ ଦେଇଛନ୍ତି ।
ଘଟଣା ଏମିତି ପୁରୀ କାକଟପୁର ଅଞ୍ଚଳର ସମ୍ବିତ ନାୟକ ଦୀର୍ଘ ଦିନ ହେବ ଚୀନର ସାଂଘାଇ ସହରରୁ 2ଶହ କିମି ଦୂର ‘ଉଷୀ’ ସହରରେ ଅବସ୍ଥାନ କରୁଛନ୍ତି । ତେବେ କୋରୋନା ଭାଇରସକୁ ନେଇ ଚୀନରେ ସ୍ଥିତି ଗମ୍ଭୀର ହେଉଥିବାରୁ ସମ୍ବିତ ଚୀନରୁ ଫେରିଆସିଛନ୍ତି । ଶୁକ୍ରବାର କୋଲକାତାରେ ପହଞ୍ଚିବା ପରେ ସେଠାରେ ତାଙ୍କର ଆବଶ୍ୟକ ସ୍ବାସ୍ଥ୍ୟ ପରୀକ୍ଷା କରାଯାଇଥଲା । ପରେ ସେ ଓଡିଶା ଆସି ଘରେ ପହଞ୍ଚିଥିଲେ । ହେଲେ ନିଜେ କୋରୋନା ଭାଇରସରେ ଆକ୍ରାନ୍ତ ଥିବା ଆଶଙ୍କା କରି ଶନିବାର ସ୍ବାସ୍ଥ୍ୟ ପରୀକ୍ଷା ପାଇଁ କ୍ୟାପିଟାଲ ହସ୍ପିଟାଲ ଆସିଥିଲେ । କାରଣ ସମ୍ବିତ ବର୍ତ୍ତମାନ ଥଣ୍ଡା, ଖାସରେ ପୀଡିତ ଅଛନ୍ତି । ଯେଉଁଥିରୁ ସେ ଆଶଙ୍କା କରୁଛନ୍ତି । ଏହାର ପରୀକ୍ଷା ପାଇଁ ଶନିବାର ଯେତେବେଳେ କ୍ୟାପିଟାଲ ହସ୍ପିଟାଲ ଆସିଥିଲେ ହସ୍ପିଟାଲ ତାଙ୍କର ସ୍ବାସ୍ଥ୍ୟାବସ୍ଥା ଯାଞ୍ଚ କରିବା ପରିବର୍ତ୍ତେ ତାଙ୍କୁ ଆମେ କିଛି ଜାଣିନାହୁଁ ଏହି ଭାଇରସ ବିଷୟରେ କିଛି କରିପାରିବୁ ନାହିଁ ବୋଲି ଶୁଣାଇଛନ୍ତି । ଯାହାକୁ ନେଇ ରାଜ୍ୟ ସ୍ବାସ୍ଥ୍ୟ ବିଭାଗର କଥା ଓ କାମକୁ ନେଇ ପ୍ରଶ୍ନ ଉଠାଇବା ସହ ଅସନ୍ତୋଷ ପ୍ରକାଶ କରିଛନ୍ତି ।
ଏଠି ପ୍ରଶ୍ନ ଉଠୁଛି ଶନିବାର ରାଜ୍ୟ ସ୍ବାସ୍ଥ୍ୟ ବିଭାଗ ଏହି ଭାଇରସକୁ ନେଇ ସମସ୍ତ ହସ୍ପିଟାଲକୁ ଆଡଭାଇଜରି ଜାରି କରୁଛି । ଅଥଚ ସେହିଦିନ ରାଜ୍ୟର ପ୍ରମୁଖ ହସ୍ପିଟାଲରେ କୌଣସି ଚିକିତ୍ସା ଆମେ ଜାଣିନୁ କହି ହାତ ଟେକି ଦେଉଛନ୍ତି । ତେବେ ଜାରି ହୋଇଥିବା ଆଡଭାଇଜରିର ଉଦ୍ଦେଶ୍ୟ କଣ ? ଖାଲି ଗଣମାଧ୍ୟମରେ ପ୍ରଚାର ପାଇଁ ଏହା ଉଦ୍ଦିଷ୍ଟ ନୁହେଁ ତ ? ବିଶ୍ବବ୍ୟାପୀ ଏହି ମାରାତ୍ମକ ଭାଇରସକୁ ନେଇ ବିଭିନ୍ନ ପଦକ୍ଷେପ ନେଉଥିବା ବେଳେ ରାଜ୍ୟ ସ୍ବାସ୍ଥ୍ୟ ବିଭାଗ ଏତେ ପଛରେ କାହିଁକି ? ଭୁବନେଶ୍ବର ଏକ ପ୍ରମୁଖ ସହର ହୋଇଥିବା ବେଳେ ପ୍ରତିଦିନ ଦେଶ ବିଦେଶରୁ ଅନେକ ଲୋକ ଯିବା ଆସିବା କରୁଛନ୍ତି । ଜାରି ହୋଇଥିବା ଆଡଭାଇଜରି ଅନୁସାରେ ଆସୁଥିବା ଲୋକଙ୍କର ସ୍ବାସ୍ଥ୍ୟ ଯାଞ୍ଚ ହେଉଛି ନା ନାହିଁ ତାହା ଏବେ ବଡ ପ୍ରଶ୍ନବାଚୀ ସୃଷ୍ଟି କରିଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
