ଭୁବନେଶ୍ବର: ସାରା ବିଶ୍ବରେ କୋରୋନା ଭାଇରସ ଆତଙ୍କ ସୃଷ୍ଟି କରିଛି। ମାରାତ୍ମକ ଭାଇରସର ମୁକାବିଲା ପାଇଁ ବିଶ୍ବବ୍ୟାପୀ ଅଭିଯାନ ଆରମ୍ଭ ହୋଇଛି । ଦେଶର ସମସ୍ତ ବିମାନ ବନ୍ଦରରେ ମଧ୍ୟ ଏଥିପାଇଁ ସ୍ବତନ୍ତ୍ର ସ୍କ୍ରିନିଙ୍ଗ ବ୍ୟବସ୍ଥା କରାଯାଉଛି। ରାଜ୍ୟ ସରକାର ମଧ୍ୟ କୋରୋନା ଭାଇରସର ମୁକାବିଲା ପାଇଁ ପଦକ୍ଷେପ ଗ୍ରହଣ କରିଛନ୍ତି । ଏନେଇ ଆଜି ବିସ୍ତୃତ ସୂଚନା ଦେଇଛନ୍ତି ସ୍ବାସ୍ଥ୍ୟ ବିଭାଗ ସଚିବ । ବିଦେଶରୁ ବିଶେଷ କରି ଚୀନରୁ ଫେରୁଥିବା ନାଗରିକଙ୍କୁ ଏଥିପାଇଁ ବିମାନ ବନ୍ଦରରେ ଆବଶ୍ୟକ ଯାଞ୍ଚ କରିବା ସହ ଆବଶ୍ୟକ ହେଲେ ସେମାନଙ୍କୁ ହସ୍ପିଟାଲରେ ରଖି ତାଙ୍କ ସ୍ବାସ୍ଥ୍ୟବସ୍ଥାରେ ନଜର ରଖାଯିବ ।
ତେବେ ଗତ ଶନିବାର ଚୀନ ଫେରନ୍ତା କାକଟପୁର ଅଞ୍ଚଳର ଜଣେ ଯୁବକ ସମ୍ବିତ ନାୟକ ନିଜ ସ୍ବାସ୍ଥ୍ୟବସ୍ଥା ଅବନତି ହେବାରୁ କ୍ୟାପିଟାଲ ହସ୍ପିଟାଲ ଆସିଥିଲେ । ସମ୍ବିତ ଶୁକ୍ରବାର ଦିନ ଚୀନରୁ ଫେରିଥିଲେ । ତେବେ ସେହିଦିନ ରାଜ୍ୟ ସ୍ବାସ୍ଥ୍ୟ ବିଭାଗ କୋରୋନା ଭାଇରସ ପାଇଁ ଆଡଭାଇଜରି ଜାରି କରିଥିଲେ ମଧ୍ୟ ସମ୍ବିତଙ୍କୁ ଉକ୍ତ ଦିନ କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷ କୌଣସି ଚିକିତ୍ସା ନକରି ଫେରାଇ ଦେଇଥିଲେ । ଏହା ସହ ସମ୍ବିତଙ୍କୁ ଆଉଟ ଡୋରରେ ଡାକ୍ତରଙ୍କୁ ସାକ୍ଷାତ କରିବାକୁ ପରାମର୍ଶ ଦିଆଯାଇଥିଲା । ଏହାକୁ ନେଇ ସମ୍ବିତ ଅସନ୍ତୋଷ ପ୍ରକାଶ କରିବା ସହ ରାଜ୍ୟ ସରକାରଙ୍କ ଆଡଭାଇଜରି ଉପରେ ପ୍ରଶ୍ନ ଉଠାଇଥିଲେ । ଏନେଇ ଗତ ରବିବାର ବିସ୍ତୃତ ଭାବେ ‘ଇଟିଭି ଭାରତରେ’ ଖବର ପ୍ରକାଶ ପାଇଥିଲା । ଖବର ପ୍ରସାରଣ ଗୋଟିଏ ଦିନ ପରେ କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷଙ୍କ ଚେତା ପଶିଲା ।
ଶନିବାର ଚିକିତ୍ସା ପାଇଁ ଆସିଥିବା ଚୀନ ଫେରନ୍ତା ସମ୍ବିତଙ୍କ ଚିକିତ୍ସା ଆରମ୍ଭ କରିଛନ୍ତି ହସ୍ପିଟାଲ କର୍ତ୍ତୃପକ୍ଷ । ସମ୍ବିତଙ୍କ ସ୍ବାସ୍ଥ୍ୟବସ୍ଥା ଯାଞ୍ଚ କରିବା ସହ ଏକ ସ୍ବତନ୍ତ୍ର ଡାକ୍ତରୀ ଦଳ ତାଙ୍କ ସ୍ବାସ୍ଥ୍ୟ ଉପରେ ଏକ ମାସ ପର୍ଯ୍ୟନ୍ତ ନଜର ରଖିବେ । ଡାକ୍ତରୀ ଦଳ କୌଣସି ପ୍ରକାର ସ୍ବାସ୍ଥ୍ୟରେ ଅବନତି ଦେଖାଦେଲେ ତୁରନ୍ତ ଡାକ୍ତରଙ୍କୁ ଯୋଗାଯୋଗ କରିବାକୁ ସମ୍ବିତଙ୍କୁ ପରାମର୍ଶ ଦେଇଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
