ଭୁବନେଶ୍ବର:ସବୁ ପରୀକ୍ଷା ନିରୀକ୍ଷା ସରିଲା । ସଫଳ ବି ହେଲା । ଏବେ ସାରା ରାଜ୍ୟରେ ଚାଲିବ ହ୍ଵାଟ୍ସଆପ ମାଧ୍ୟମରେ ପାଠପଢ଼ା । ଖୋର୍ଦ୍ଧା ଜିଲ୍ଲାରେ ପ୍ରଥମେ ଏହା ପରୀକ୍ଷାମୂଳକ ଭାବରେ ଲାଗୁ ହୋଇଥିଲା ।
ମହାମାରୀ କୋରୋନା ଯୋଗୁଁ ସମ୍ପୂର୍ଣ୍ଣ ଭାବରେ ଠପ ହୋଇଥିବା ଶିକ୍ଷା ବିଭାଗକୁ ସକ୍ରିୟ କରିବା ପାଇଁ ଗତ ଏପ୍ରିଲ ୧୯ରୁ ଭୁବନେଶ୍ବର ସମେତ ଖୋର୍ଦ୍ଧା ଜିଲ୍ଲାର ୧୦ଟି ବ୍ଲକର ସମସ୍ତ ବିଦ୍ୟାଳୟରେ ଶିକ୍ଷା ସଂଯୋଗ ଆରମ୍ଭ କରାଯାଇଥିଲା । ଜିଲ୍ଲାରେ ଦ୍ବିତୀୟ ଶ୍ରେଣୀରୁ ୧୦ମ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ହ୍ବାଟ୍ସଆପ ମାଧ୍ୟମରେ ଇ-ଶିକ୍ଷା ଯୋଗାଇବା ପଦକ୍ଷେପ ସଫଳ ହୋଇଛି । ଏବେ ଆସନ୍ତା ୪ ତାରିଖରୁ ସାରା ରାଜ୍ୟରେ ଶିକ୍ଷା ସଂଯୋଗ ମାଧ୍ୟମରେ ଏହି ସେବା ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି । ଏ ନେଇ ଓଡିଶା ରାଜ୍ୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ ପ୍ରକଳ୍ପ ନିର୍ଦ୍ଦେଶକ ଭୂପେନ୍ଦ୍ର ସିଂ ପୁନିଆ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ଚିଠି ଲେଖିଛନ୍ତି ।
ଶିକ୍ଷା ସଂଯୋଗ ଦ୍ବାରା ହ୍ବାଟ୍ସଆପ୍ ଗ୍ରୁପରେ ଛାତ୍ରଛାତ୍ରୀମାନଙ୍କୁ ପ୍ରତ୍ୟେକ ବିଷୟର ଗୋଟିଏ ଅଧ୍ୟାୟକୁ ପିଡିଏଫ ଫାଇଲ ଭାବେ ପ୍ରଦାନ କରାଯିବ । ପ୍ରତିଦିନ ୪୫ ମିନିଟ୍ରୁ ୧ ଘଣ୍ଟା ଅବଧିରେ ୪ଟି କ୍ଲାସ ରହିବ। ଏହି ପ୍ରୋଗ୍ରାମ୍ ଆସନ୍ତା ଜୁନ୍ ୧୩ ତାରିଖ ଯାଏଁ ମୋଟ୍ ଛଅ ସପ୍ତାହ ପର୍ଯ୍ୟନ୍ତ ଚାଲିବ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ,ଇଟିଭି ଭାରତ
