ଭୁବନେଶ୍ବର: ଅଧିକ ସଂଖ୍ୟାରେ ସଦସ୍ୟଙ୍କୁ ଆକୃଷ୍ଟ କରିବା ପାଇଁ ଅଣ୍ଟା ଭିଡିଲାଣି ବିଜୁ ଜନତା ଦଳ । ନୂତନ ସଦସ୍ୟଙ୍କୁ ଏହି ସଭ୍ୟ ସଂଗ୍ରହ ଅଭିଯାନରେ ଗୁରୁତ୍ବ ଦିଆଯିବ । ତେବେ ନୂଆକରି ଯୋଡି ହୋଇଥିବା ସଦସ୍ୟଙ୍କ ନିକଟରେ ପହଞ୍ଚିବ ଇମେଲ ଓ ମେସେଜ । ଏଥିପାଇଁ ବ୍ୟବସ୍ଥା କରିଛନ୍ତି ଦଳର ସୁପ୍ରିମୋ ନବୀନ ପଟ୍ଟନାୟକ ।
ନିର୍ବାଚନ ମଣ୍ଡଳୀର ବିଧାୟକ ବିଧାୟିକା, ଅଞ୍ଚଳର ସାଂସଦ, କାର୍ଯ୍ୟକର୍ତ୍ତାଙ୍କ ଠାରୁ ଜିଲ୍ଲା ପର୍ଯ୍ୟବେକ୍ଷକଙ୍କ ସମନ୍ଵୟରେ ଯଥାଶୀଘ୍ର ଜିଲ୍ଲା କମିଟି ବୈଠକ କରି ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସଭ୍ୟ ସଂଗ୍ରହ ଅଭିଯାନ ଲକ୍ଷ୍ୟକୁ ଆଗେଇବ । ସଭ୍ୟ ସଂଗ୍ରହ ଅଭିଯାନ ପ୍ରତ୍ୟେକ ସ୍ତରରେ କିପରି ପରିଚାଳନା କଲେ ସେନେଇ ବିଶେଷ ତଥ୍ୟ ମାନ୍ୟବର ରାଜ୍ୟ ସଭାପତିଙ୍କୁ ଅବଗତ କରାଯିବ । ପ୍ରତ୍ୟେକ ବିଧାୟକ ତାଙ୍କ ଅଞ୍ଚଳ ପାଇଁ ଜଣେ ଡାଟା ଏଣ୍ଟ୍ରି ସଂଯୋଜକ ନାଁ ଇମେଲ bijujanatadala@gmail.com ଓ ୯୩୩୭୪୧୪୭୯୬ ରେ ଯୋଗାଯୋଗ କରିପାରିବେ।
ଦଳର ସଦସ୍ୟତା ଗ୍ରହଣ କାର୍ଯ୍ୟକ୍ରମ ଆସନ୍ତା 2 ସେପ୍ଟେମ୍ବର ରୁ 31 ଅକ୍ଟୋବର ପର୍ଯ୍ୟନ୍ତ ବଳବତ୍ତର ରହିବ। ତେବେ ୱେବ ଲିଙ୍କରେ ଆବଶ୍ୟକତା ଅନୁଯାୟୀ ତଥ୍ୟ ଗୁଡିକ 31 ଅକ୍ଟୋବର କିମ୍ବା ତା ପୂର୍ବରୁ ପୂରଣ କରିବା ଅତ୍ୟନ୍ତ ଆବଶ୍ୟକ ରହିଛି। ଜଣେ ଡାଟା ଏଣ୍ଟ୍ରିରେ ସଂଯୋଜକଙ୍କ ନାଁ ଇମେଲ ଓ ଯୋଗାଯୋଗ କରିବାର ନମ୍ବର ଦିଆଯାଇଛି ।
ନୂତନ ସଦସ୍ୟଙ୍କୁ ଏହି ସଭ୍ୟ ଗ୍ରହଣ ଅଭିଯାନରେ ଗୁରୁତ୍ବାରୋପ କରିବା ସହ ଦଳର ନୀତି ପ୍ରତି ଅନୁରକ୍ତ ବ୍ୟକ୍ତି ବିଶେଷଙ୍କୁ ଚିହ୍ନଟ କରି ଦଳର ସଭ୍ୟଯୁକ୍ତ କରିବା ପାଇଁ ଆବଶ୍ୟକ ରହିଛି। ଏଥିରେ ବିଶେଷ କରି ମହିଳା, ଯୁବକମାନଙ୍କୁ ଗୁରୁତ୍ବ ଦିଆଯିବା ସହ ସମାଜରେ ବିଭିନ୍ନ ବର୍ଗର ପ୍ରତିନିଧିତ୍ବ କରାଯିବ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
