ଭୁବନେଶ୍ବର: ଲଗାତାର ଭାବେ ପଞ୍ଚମ ଥର ପାଇଁ ନୂଆ ଓଡିଶାର ନାୟକ ହେଲେ ନବୀନ ପଟ୍ଟନାୟକ । ବୁଧବାର ରାଜଧାନୀର ଏକ ସ୍ବତନ୍ତ୍ର ସମାରୋହରେ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଭାବେ ଶପଥ ନେଇ ଥିବାବେଳେ ତାଙ୍କ ମନ୍ତ୍ରୀମଣ୍ଡଳ ବି ଶପଥ ଗ୍ରହଣ କରିଛନ୍ତି।
ଆରମ୍ଭ ହେଲା ନବୀନଙ୍କ ପଞ୍ଚମ ପାଳି । ଲଗାତାର ପଞ୍ଚମ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ନବୀନ ପଟ୍ଟନାୟକ । ଏହାସହ ତାଙ୍କ ମନ୍ତ୍ରିମଣ୍ଡଳର କ୍ୟାବିନେଟ ଓ ରାଷ୍ଟ୍ରମନ୍ତ୍ରୀ ଭାବେ ଶପଥ ନେଇଛନ୍ତି 20 ଜଣ ।
କ୍ୟାବିନେଟ ପାହ୍ୟାର ସଦସ୍ୟ ପ୍ରଫୁଲ୍ଲ ମଲ୍ଲିକ ପ୍ରଥମେ ଶପଥ ପାଠ କରିଥିଲେ । ଏହାପରେ ବିକ୍ରମ କେଶରୀ ଆରୁଖ, ରଣେନ୍ଦ୍ର ପ୍ରତାପ ସ୍ବାଇଁ, ନିରଞ୍ଜନ ପୂଜାରୀ, ପଦ୍ମନାଭ ବେହେରା, ପ୍ରତାପ ଜେନା, ଅରୁଣ ସାହୁ, ସୁଦାମ ମାରାଣ୍ଡି, ସୁଶାନ୍ତ ସିଂ, ନବ କିଶୋର ଦାସ ଏବଂ ଟୁକୁନି ସାହୁଙ୍କୁ ପଦ ଓ ଗୋପନୀୟତରା ଶପଥ ପାଠ କରାଇଥିଲେ ରାଜ୍ୟପାଳ । ତେବେ ସୁଦାମ ମାରାଣ୍ଡି ସାନ୍ତାଳି ଭାଷାରେ ଶପଥ ନେଇଥିବା ଦେଖିବାକୁ ମିଳିଥିଲା ।
ଅନ୍ୟପଟେ ରାଷ୍ଟ୍ରମନ୍ତ୍ରୀ ଭାବେ ଅଶୋକ ପଣ୍ଡା, ସମୀର ରଞ୍ଜନ ଦାସ, ଜ୍ୟୋତି ପ୍ରକାଶ ପାଣିଗ୍ରାହୀ, ଦିବ୍ୟଶଙ୍କର ମିଶ୍ର, ପ୍ରେମାନନ୍ଦ ନାୟକ, ରଘୁନନ୍ଦନ ଦାସ, ପଦ୍ମିନୀ ଦିଆନ, ତୁଷାରକାନ୍ତି ବେହେରା ଓ ଜଗନ୍ନାଥ ସାରକା ଶେଷରେ ଶପଥ ନେଇଥିଲେ ।
ତେବେ ବିଶ୍ବାସ ଓ ଭରସାର ସହିତ ମୁଖ୍ୟମନ୍ତ୍ରୀ ଯେଉଁ ଦାୟିତ୍ବ ଦେଇଛନ୍ତି ତାକୁ ସୂଚାରୁରୂପେ ପାଳନ କରିବେ ବୋଲି କହିଛନ୍ତି ମନ୍ତ୍ରୀମାନେ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
