ଭୁବନେଶ୍ବର: ଦିନକୁ ଦିନ କୁହୁଳିବାରେ ଲାଗିଛି ପିଇଓ ସ୍ମିତାରାଣୀଙ୍କ ଆତ୍ମହତ୍ୟା ଘଟଣା । ପୋଲିସ ସ୍ମିତାଙ୍କ ମୃତ୍ୟୁକୁ ଆତ୍ମହତ୍ୟା କହିବା ସହ ଆତ୍ମହତ୍ୟା ପାଇଁ ପ୍ରବର୍ତ୍ତାଇବା ଘଟଣାରେ ସରପଞ୍ଚଙ୍କ ସ୍ବାମୀ ରୂପେଶ ଭଦ୍ରକୁ ଗିରଫ କରିଛି । ଏପଟେ ପୋଲିସ ତଦନ୍ତକୁ ନେଇ ପ୍ରଶ୍ନ ଉଠାଇଛି ବିଜେପି । ଘଟଣା ଦିନ ଗେଷ୍ଟ ହାଉସରେ 5ଜଣ ଉପସ୍ଥିତ ଥିବାବେଳେ ଅନ୍ୟମାନଙ୍କୁ କାହିଁକି ଗିରଫ କରାଯାଇନାହିଁ ବୋଲି ଦଳ ଜବାବ ମାଗିଛି ।
ଅନ୍ୟପଟେ ଯାଜପୁର ଏସପି ମୃତକ ସ୍ମିତାରାଣୀଙ୍କ ଚରିତ୍ର ହନନ କରିବା ସହ ତଦନ୍ତକୁ ପ୍ରଭାବିତ କରିଛନ୍ତି । ଜଣେ ସରକାରୀ କାର୍ଯ୍ୟରତ ସରକାରୀ ଅଫିସରଙ୍କୁ ହତ୍ୟା କରିବା ପରେ ବି ରାଜ୍ୟସରକାର ନୀରବ ରହିବା ଅତ୍ୟନ୍ତ ର୍ଦୁଭାଗ୍ୟଜନକ । ହରିଦାସପୁରରେ ପିଇଓ ଭାବେ ସ୍ମିତାରାଣୀ କାର୍ଯ୍ୟ କରୁଥିଲେ । ଏହି ପରିପ୍ରେକ୍ଷୀରେ ରାଜ୍ୟସରକାର ତାଙ୍କର ବ୍ୟକ୍ତିଗତ ଜୀବନକୁ ନେଇ ତଦନ୍ତ ନକରି ବୃତ୍ତିଗତ ଆଧାରରେ ତଦନ୍ତ କରନ୍ତୁ ବୋଲି ରାଜ୍ୟ ବିଜେପି ଉପସଭାପତି ସମୀର ମହାନ୍ତି ଦାବି କରିଛନ୍ତି ।
ସେ କହିଛନ୍ତି, ରାଜ୍ୟସରକାର ମହିଳା ସଶକ୍ତିକରଣ, ମୋ ସରକାର, ମୋ ପୋଲିସ ଏବଂ ୫‘ଟି’ କଥା କହୁଥିବାବେଳେ ଏକ ସରକାରୀ ମହିଳାଙ୍କ ମୃତ୍ୟୁପରେ ଜଣେ ବି ସରକାରୀ ଅଧିକାରୀ ତାଙ୍କ ପରିବାରକୁ ନଭେଟିବା ଅତ୍ୟନ୍ତ ନିନ୍ଦନୀୟ ଘଟଣା । ମୃତ ସ୍ମିତାରାଣୀଙ୍କ ମୃତ୍ୟୁ ପରେ ଯାଜପୁର ଏସ୍ପି ଘଟଣାକୁ ଚପେଇ ଦେବା ପାଇଁ ବିଭିନ୍ନ ପ୍ରକାର ଅପଚେଷ୍ଟା କରିଛନ୍ତି । ମହିଳା କମିଶନ ଘଟଣାସ୍ଥଳକୁ ଯାଇଥିଲେ ବି ପରିବାର ଲୋକଙ୍କ ସହ ଏ ପର୍ଯ୍ୟନ୍ତ ଭେଟିନାହିଁନ୍ତି । ପୋଲିସ ଡିଜି ମଧ୍ୟ ମୃତକ ସ୍ମିତାରାଣୀଙ୍କ ସ୍ବାମୀଙ୍କୁ ଦେଖା କରିବାକୁ ସମୟ ଦେଇ ନହାଁନ୍ତି । ଘଟଣାକୁ ୭ ଦିନ ବିତିଥିଲେ ବି ରାଜ୍ୟ ସରକାର, ଜିଲ୍ଲା ପୋଲିସ, ଜିଲ୍ଲା ପ୍ରଶାସନ ଏର୍ପ୍ୟନ୍ତ ବାକି ଅଭିଯୁକ୍ତମାନଙ୍କୁ ଗିରଫ ନକରିବା ଅତ୍ୟନ୍ତ ର୍ଦୁଭାଗ୍ୟଜନକ ।
ଏହାସହ ସେ ଆହୁରି କହିଛନ୍ତି କି, ରାଜ୍ୟସରକାର ସମ୍ବେଦନହୀନ ହୋଇ କାର୍ଯ୍ୟ କରୁଛନ୍ତି । କୌଣସି ସରକାରୀ ସ୍କିମ୍ ଓ ପ୍ରଧାନମନ୍ତ୍ରୀ ଆବାସ ଯୋଜନାରେ ନାମ ଯୋଡିବା ଲାଗି ତାଙ୍କୁ ଜୋରଜବରଦସ୍ତି କରାଯାଇଛି । କୌଣସି କାରଣରୁ ତାଙ୍କ ଉପରେ ଚାପ ପଡିଛି ସେ ସେଥିରେ ରାଜି ହୋଇ ନ ହେବାରୁ ତାଙ୍କୁ ରୂପେଶ ଭଦ୍ର ଏବଂ ତାଙ୍କ ସହେଯାଗୀ ହତ୍ୟା କରିଛନ୍ତି ବୋଲି ତାଙ୍କ ସ୍ବାମୀ ମାନବଧିକାର କମିଶନଙ୍କ ପାଖରେ ଅଭିଯୋଗ କରିଛନ୍ତି । ସ୍ମିତାରାଣୀର ହତ୍ୟା ବେଳେ ଗେଷ୍ଟ ହାଉସରେ ଥିବା ବିଜେଡି ନେତା ଏବଂ ରାମକୋ ଅଧିକାରୀଙ୍କୁ ଜେରା ନକରି ପୋଲିସ ମୃତକଙ୍କ ସ୍ବାମୀଙ୍କୁ ଜେରା କରୁଥିବା ନେଇ ସେ ପ୍ରଶ୍ନ ଉଠାଇଛନ୍ତି ।
ଯେଉଁ ଗେଷ୍ଟ ହାଉସରେ ଏଭଳି ହତ୍ୟାକାଣ୍ଡ ଘଟିଛି ସେ ଘରକୁ ପୋଲିସ ଏପର୍ଯ୍ୟନ୍ତ ସିଲ୍ କରିନାହିଁ । ସେହିପରି ମୃତଦେହ ବୁହା ହୋଇଥିବା ସ୍କର୍ପିଓ ଗାଡିକୁ ପୋଲିସ ଜବତ କରିନାହିଁ । ଏହି ହତ୍ୟାକାଣ୍ଡରେ ରାମକୋ ଅଧିକାରୀଙ୍କ ହାତ ରହିଛି ବୋଲି ସନ୍ଦେହ ହେଉଛି । ତେଣୁ ଏହା ମଧ୍ୟ ଅନୁସନ୍ଧାନ ପରିସରଭୁକ୍ତ କରି ତଦନ୍ତ କରିବାକୁ ବିଜେପି ଦାବି କରିଛି । ଅନ୍ୟପଟେ ଯାଜପୁର ଏସପି ସ୍ମିତାଙ୍କ ଚରିତ୍ର ହନନ କରିଥିବା ବିଜେପି ଅଭିଯୋଗ କରି ଆସନ୍ତା 26 ତାରିଖରେ ଏସପିଙ୍କ ଚରଣ ସିଂହ ମୀନାଙ୍କ ନାମରେ ଫୌଜଦାରୀ ମାମଲା ରୁଜ୍ଜୁ କରାଯିବ ବୋଲି ଯାଜପୁର ଜିଲ୍ଲା ସଭାପତି ଗୌତମ ରାୟ ସୂଚନା ଦେଇଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
