ଭୁବନେଶ୍ବର: ପୂର୍ଣ୍ଣ ଟୀକାକରଣରେ ୯୦.୫% ପ୍ରତିଶତ ରେକର୍ଡ ସହ ଓଡ଼ିଶା ଜାତୀୟ ସ୍ତରରେ ସର୍ବାଗ୍ରେ ରହିଛି । ଷ୍ଟିଅରିଂ କମିଟି ବୈଠକରୁ ଏନେଇ ମିଳିଛି ସୂଚନା । ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା ଷ୍ଟିଅରିଂ କମିଟି ବୈଠକ । ରାଜ୍ୟରେ ଟୀକାକରଣ ମିଶନ ଇନ୍ଦ୍ରଧନୁଶ ୪.୦ ର ଆରମ୍ଭ ହୋଇସାରିଛି । ତିନିଟି ରାଉଣ୍ଡରେ ଟୀକାକରଣ ହେବା ନେଇ ନିଷ୍ପତ୍ତି ହୋଇଥିବା ବେଳେ ଏଥିରେ ଟୀକାକରଣରେ ସାମିଲ ହୋଇ ନଥିବା ଦୁଇ ବର୍ଷରୁ କମ୍ ଶିଶୁ ଏବଂ ଗର୍ଭବତୀ ମହିଳାଙ୍କୁ ଟିକା ସାମିଲ କରାଯିବ ।
ମିଶନର ପ୍ରଥମ ରାଉଣ୍ଡ ଟୀକାକରଣ ମାର୍ଚ୍ଚ ୭ ତାରିଖରୁ ଆରମ୍ଭ ହୋଇସାରିଛି । ୨ୟ ପର୍ଯ୍ୟାୟ ଏପ୍ରିଲ ୪ ତାରିଖରୁ ଓ ମେ ୨ରୁ ୩ୟ ପର୍ଯ୍ୟାୟ ଟୀକାକରଣ ଆରମ୍ଭ ହେବ । ଏହି ମିଶନରେ ପ୍ରାୟ ୧୨ ପ୍ରକାର ରୋଗର ପ୍ରତିଷେଧକ ଟିକା ମଧ୍ୟ ଦିଆଯିବ । କ୍ଷେତ୍ରସ୍ତରୀୟ ସମନ୍ୱୟ ରଖି ଶତ ପ୍ରତିଶତ ଲକ୍ଷ୍ୟ ହାସଲ ପାଇଁ ମୁଖ୍ୟ ଶାସନ ସଚିବଙ୍କ ନିର୍ଦ୍ଦେଶ ଦେଇଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
