ଭୁବନେଶ୍ୱର: କଟକ ବଡ ମେଡିକାଲରେ ଥିବା ନିଦାନ ବିଭାଗ ଗୁଡିକରେ ନିର୍ଭୁଲ ଓ ଠିକ୍ ସମୟରେ ସେବା ଯୋଗାଇ ଦେବା ପାଇଁ ଆଜି(ବୁଧବାର) ସ୍ଵାସ୍ଥ୍ୟ ମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକ ହୋଇଛି । ଏହି ବୈଠକରେ କଟକ ବଡମେଡିକାଲରେ ଆବଶ୍ୟକୀୟ ଯନ୍ତ୍ରପାତି ଓ ଖାଲି ପଡିଥିବା ପଦବୀ ନିଯୁକ୍ତି ପାଇଁ ତ୍ଵରିତ ପଦକ୍ଷେପ ପାଇଁ ନିଷ୍ପତ୍ତି ନିଆଯାଇଛି ।
ଏନେଇ ଡିଏମଇଟିଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇ ତୁରନ୍ତ କାର୍ଯ୍ୟ ଶେଷ କରିବାକୁ ନିଷ୍ପତ୍ତି ହୋଇଛି । ଏହାସହ ପରିକ୍ଷଣ ରିପୋର୍ଟ ତୁରନ୍ତ ଦେବାର ବ୍ୟବସ୍ଥା କରାଇବା ପାଇଁ ମଧ୍ୟ ନିଷ୍ପତ୍ତି ହୋଇଥିବା ଜଣାପଡିଛି ।
ତେବେ କେବଳ ଏତିକି ନୁହେଁ ଏହାସହ କଟକ ଶିଶୁ ଭବନକୁ ଅଧିକ କ୍ରିୟାଶୀଳ କରିବା ପାଇଁ ମଧ୍ୟ ବୈଠକରେ ନିଷ୍ପତ୍ତି ହୋଇଛି । ଏହି ବୈଠକରେ ଶିଶୁଭବନର ସମସ୍ୟା ବିଷୟରେ ବିସ୍ତୃତ ଆଲୋଚନା କରାଯାଇଥିଲା । ଆଇସିୟୁ ବେଡ୍, ଖାଲି ପଡିଥିବା ପଦବୀ, ଲାବ୍ରୋଟାେରୀ ଟେକନିସିଆନ୍ ଆଦି ପୂରଣ ପାଇଁ ତ୍ଵରିତ ପଦକ୍ଷେପ ପାଇଁ ମନ୍ତ୍ରୀ ନବଦାସ ନିର୍ଦ୍ଦେଶ ଦେଇଛନ୍ତି ।
ଭୁବନେଶ୍ୱରରୁ ତପନ ଦାସ, ଇଟିଭି ଭାରତ
