ଭୁବନେଶ୍ବର: ଶିକ୍ଷା, ସଫଳତାର ଚାବିକାଠି। ସୁସ୍ଥ ସମାଜ ଗଠନରେ ଶିକ୍ଷାର ଭୂମିକା ଅତ୍ୟନ୍ତ ଗୁରୁତ୍ବପୂର୍ଣ୍ଣ। ମାତ୍ର କୋରୋନା ମହାମାରୀରେ କବଳିତ ସାରା ବିଶ୍ବ ଅବ୍ୟବସ୍ଥିତ ହୋଇପଡ଼ିଥିବାବେଳେ ଶିକ୍ଷା ବ୍ୟବସ୍ଥା ମଧ୍ୟ ଏଥିରେ ପ୍ରଭାବିତ ହୋଇଛି।
ଗତ ୬ ମାସ ହେଲା ସ୍କୁଲ ବନ୍ଦ। ତେଣୁ ଶ୍ରେଣୀଗୃହର ବିକଳ୍ପ ପନ୍ଥା ଭାବେ ଶିକ୍ଷକଙ୍କ ପାଠପଢ଼ା ଏବେ ଅନ୍ଲାଇନ୍କୁ ଚାଲିଆସିଛି। ସେଥିପାଇଁ ମୋବାଇଲ ଫୋନ୍ର ଚାହିଦା ଅନେକ ମାତ୍ରାରେ ବୃଦ୍ଧି ପାଇଛି । ସମସ୍ତଙ୍କ ପକ୍ଷରେ ଏହା କିଣିବା ସମ୍ଭବ ନୁହେଁ।
ଏଥିପାଇଁ ଲେଡିଜ୍ ଫୋରମ୍ ୟୁସିସିଆଇ ଭୁବନେଶ୍ବର ସହଯୋଗର ହାତ ବଢ଼ାଇଛି। ଉପକୃତ ହେଲେ ୮ ଦୃଷ୍ଟିହୀନ ଛାତ୍ରଛାତ୍ରୀ । ଭାବଗ୍ରାହୀ ଆଦର୍ଶ ଦୃଷ୍ଟିହୀନ ବିଦ୍ୟାଳୟର ୮ ଜଣ ଦୃଷ୍ଟିହୀନ ଛାତ୍ରଛାତ୍ରୀଙ୍କୁ ଏହି ଫୋରମ୍, ମୋବାଇଲ ଫୋନ୍ ବଣ୍ଟନ କରିଛି। ଏହି କାର୍ଯ୍ୟକ୍ରମକୁ ଫୋରମ୍ ସଭାପତି ଡକ୍ଟର ଗୀତାରାଣୀ ପାଢ଼ୀ, ସମ୍ପାଦକ ଡକ୍ଟର ଭାରତୀ ବେହେରା ଓ ଅନ୍ୟ ସଦସ୍ୟମାନେ ସଫଳ କରାଇଥିଲେ। ଏହି ଅବସରରେ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ସନ୍ନ୍ୟାସୀ ବେହେରା ମଧ୍ୟ ଉପସ୍ଥିତ ଥିଲେ।
ବ୍ୟୁରୋ ରିପୋର୍ଟ, ଇଟିଭି ଭାରତ
