ଭୁବନେଶ୍ବର: ମଣିଷ ନିକଟରେ ଏପରି ଏକ ଶକ୍ତି ଅଛି ଯାହା ବଳରେ ସେ ଅନେକ କଥା ମନେ ରଖିପାରିବା ସହିତ ତାହାକୁ ସଠିକ ସମୟରେ କାର୍ଯ୍ୟରେ ଲଗାଇ ସଫଳତାର ଶିଖରକୁ ପହଞ୍ଚି ପାରୁଛି ଯାହାକୁ ସ୍ମରଣଶକ୍ତି କୁହାଯାଏ। କିନ୍ତୁ ସମସ୍ତଙ୍କ ନିକଟରେ ଏହା ସଠିକ ପରିମାଣରେ ନ ଥିବାରୁ ଅନେକ କାର୍ଯ୍ୟରେ ବିଫଳ ହୋଇଥାନ୍ତି। ଯାହା ପାଇଁ ସେମାନେ ଅନେକ ସମୟରେ ନିଜ ଭାଗ୍ୟକୁ ଦୋଷ ଦେଇଥାନ୍ତି। ଆଜିର ଦିନରେ କିପରି ସହଜରେ ନିଜ ସ୍ମରଣ ଶକ୍ତି ବୃଦ୍ଧି କରିବା ସହିତ ଅନେକ ଜିନିଷକୁ ଅକ୍ଳେଶରେ ମନେ ରଖାଯାଇପାରିବ ସେ ବିଷୟରେ ପିଲାମାନଙ୍କୁ କୌଶଳ ଶିକ୍ଷା ଦେଇଛନ୍ତି ଦେଶର ସୁନାମଧନ୍ୟ ମେମୋରୀ ଗୁରୁ ବିରେନ୍ଦ୍ର ମେହେଟା।
ସ୍ଥାନୀୟ ସାମନ୍ତରାୟପୁର ଠାରେ ଥିବା ସ୍ପିରିଚୁଆଲ ଏକାଡେମୀ ଠାରେ ଛାତ୍ରଛାତ୍ରୀଙ୍କ ସ୍ମରଣଶକ୍ତି ବୃଦ୍ଧି ନିମନ୍ତେ ଦୁଇ ଦିନିଆ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଯେଉଁଥିରେ ବିଭିନ୍ନ ବିଦ୍ୟାଳୟରୁ ଅଂଶଗ୍ରହଣ କରିଥିବା 200 ରୁ ଉର୍ଦ୍ଧ୍ବ ଛାତ୍ରଛାତ୍ରୀଙ୍କୁ ବିରେନ୍ଦ୍ର ମେହେଟା ବିଭିନ୍ନ ସଂଖ୍ୟା, ସ୍ଥାନ, ବସ୍ତୁ ଆଦିର ନାମକୁ ସହଜରେ ମାନେ ରଖିବା ଉପାୟ ବିଷୟରେ ଶିକ୍ଷା ଦେଇଥିଲେ। ଯାହାକୁ ସେମାନେ ପରବର୍ତ୍ତୀ ସମୟରେ ତାହାର ଉତ୍ତର ଖୁବଶିଘ୍ର ନିର୍ଭୁଲ ଭାବରେ ଦେଉଥିବା ମଧ୍ୟ ଦେଖିବାକୁ ମିଳିଛି। ଏମିତିକି ପିଲାମାନେ 10 ମିନିଟରେ 200 ଶବ୍ଦ ମନେ ରଖି ସଠିକ ଉତ୍ତର ଦେଇଛନ୍ତି ।
ଏହି ଅବସରରେ ମେହେଟା ଫଟୋ ମାଧ୍ୟମରେ ବିଭିନ୍ନ ଜିନିଷକୁ ପିଲାମାନେ ମନେ ରଖିବାକୁ ସହଜ ହୋଇଥାଏ । ବୈଦିକ ଉପାୟରେ ଶିକ୍ଷା ଦେଲେ ପିଲାମାନଙ୍କର ଏକାଗ୍ରତା ବୃଦ୍ଧି ପାଇଥାଏ ବୋଲି କହିଛନ୍ତି। ଏହା ସେମାନଙ୍କୁ ବହୁତ ପରିମାଣରେ ସାହାଯ୍ୟ କରିବ ବୋଲି ସେ କହିଛନ୍ତି।ଏହି କାର୍ଯ୍ୟକ୍ରମରେ ଭାଗନେଇଥିବା ପିଲାମାନେ ମଧ୍ୟ ଏହି ପଦ୍ଧତିକୁ ବେଶ ଭଲ ଓ ଏହା ଭବିଷ୍ୟତରେ ସେମାନଙ୍କୁ ଅନେକ ସାହାଯ୍ୟ କରିବ ବୋଲି ପ୍ରକାଶ କରିଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ,ଇଟିଭି ଭାରତ
