ଭୁବନେଶ୍ବର: ପର୍ଯ୍ୟଟକଙ୍କ ପାଇଁ ଖୁସି ଖବର । ନନ୍ଦନକାନନରେ ପୁଣି ଗଡିବ ଟଏ ଟ୍ରେନ ଓ ଚାଲିବ ରୋପ ୱେ। ଡିସେମ୍ବର ୨୯ ପ୍ରତିଷ୍ଠା ଦିବସରେ ଏହାର ଆରମ୍ଭ ହେବା ନେଇ ସୂଚନା ରହିଛି। ଆସନ୍ତା ନନ୍ଦନକାନନ ପ୍ରତିଷ୍ଠା ଦିବସରୁ ଦୀର୍ଘ ସମୟ ଧରି ବନ୍ଦ ରହିଥିବା ଟଏ ଟ୍ରେନ ପୁଣି ଚାଲିବ । ନନ୍ଦନକାନନ ପ୍ରାଣୀ ଉଦ୍ୟାନ କର୍ତ୍ତୃପକ୍ଷଙ୍କ ପକ୍ଷରୁ ଏହି ସୂଚନା ଦିଆଯାଇଛି । ପର୍ଯ୍ୟଟକଙ୍କ ସୁବିଧା ପାଇଁ ଏବଂ ଅଧିକରୁ ଅଧିକ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଏଭଳି ଵ୍ୟଵସ୍ଥା ଆରମ୍ଭ କରାଯିବ ବୋଲି ନନ୍ଦନକାନନ କର୍ତ୍ତୃପକ୍ଷ ସୂଚନା ଦେଇଛନ୍ତି।
ପାଖାପାଖି 5 ରୁ 6 ବର୍ଷ ଧରି ପଡିରହିଥିବା ଟୟ ଟ୍ରେନ ଓ ରୋପ ୱେ ସେବାକୁ ପୁଣି କାର୍ଯ୍ୟକ୍ଷମ କରିବାକୁ ଯାଉଛି ନନ୍ଦନକାନନ ପ୍ରାଣୀ ଉଦ୍ୟାନ । କୋଲକାତାର ଏକ ଘରୋଇ କମ୍ପାନୀକୁ ଏହାର ଦାୟିତ୍ବ ଦିଆଯାଇଛି । ସମ୍ଭବତଃ ଆସନ୍ତା ନନ୍ଦନକାନନ ପ୍ରାଣୀ ଉଦ୍ୟାନ ପ୍ରତିଷ୍ଠା ଦିବସରେ ଏହାକୁ ଆରମ୍ଭ କରାଯିବ ବୋଲି ପ୍ରାଣୀ ଉଦ୍ୟାନର ନିର୍ଦ୍ଦେଶକ ଶଶୀ ପାଲ କହିଛନ୍ତି।
ରୋପ-ୱେ ପାଇଁ ପଶ୍ଚିମବଙ୍ଗର ଏକ ଘରୋଇ କମ୍ପାନୀକୁ ଦାୟିତ୍ବ ଦିଆଯାଇଛି । ବିଭିନ୍ନ ସମୟରେ ନନ୍ଦନକାନନ କର୍ତ୍ତୃପକ୍ଷ ରୋପ ୱେ ଏବଂ ଟଏ ଟ୍ରେନକୁ ଚାଲୁ କରିବା ପାଇଁ ଗଣମାଧ୍ୟମକୁ ସୂଚନା ଦେଇଥିଲେ ମଧ୍ୟ ପରବର୍ତ୍ତୀ ସମୟରେ ଏହା ସମ୍ଭବ ହୋଇନଥାଏ । ତେବେ ଏଥର ପ୍ରତିଷ୍ଠା ଦିବସରେ ଏହା କେତେଦୂର ସଫଳ ହେବ ତାହା ଉପରେ ସମସ୍ତଙ୍କ ନଜର।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
