ଭୁବନେଶ୍ବର: ଆସନ୍ତା 15ରୁ ଆରମ୍ଭ ହେବାକୁ ଯାଉଛି ରାଜ୍ୟର ଚତୁର୍ଦ୍ଦଶ ତୋଷାଳି ହସ୍ତଶିଳ୍ପ ମେଳା । ରାଜଧାନୀର ଜନତା ମଇଦାନ ଠାରେ ଅନୁଷ୍ଠିତ ହେବାକୁ ଥିବା ଏହି ମେଳାରେ ଚଳିତବର୍ଷ 380 ଗୋଟି ଷ୍ଟଲରେ ଉଭୟ ହସ୍ତତନ୍ତ ଓ ହସ୍ତଶିଳ୍ପର ସାମଗ୍ରୀ ପ୍ରଦର୍ଶିତ ହେବ ।
ଏହି ତୋଷାଳି ମେଳାରେ ସାରା ଦେଶରୁ ଆସିଥିବା 280ଜଣ ହସ୍ତଶିଳ୍ପ କାରିଗର ଓ ବୁଣାକାର ଅଂଶଗ୍ରହଣ କରିବେ । ସେମାନଙ୍କ ଦ୍ବାରା ପ୍ରସ୍ତୁତ ସାମଗ୍ରୀ ପ୍ରଦର୍ଶନ କରିବା ସହିତ ବ୍ୟବସାୟର ସୁଯୋଗ ପାଇବେ । ଏହା ସହିତ ଏହି ମେଳାରେ ବିଭିନ୍ନ ପ୍ରକାର ପାରମ୍ପରିକ ଓଡ଼ିଆ ଖାଦ୍ୟ ପରିବେଷଣ ନିମନ୍ତେ 40ଟି ଫୁଡ଼ଷ୍ଟଲ ସ୍ଥାପନ କରାଯାଉ ଥିବା ରାଜ୍ୟ ବୟନ ଓ ହସ୍ତଶିଳ୍ପ ବିଭାଗ ମନ୍ତ୍ରୀ ଶ୍ରୀମତୀ ପଦ୍ମିନୀ ଦିଆନ ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି ।
ଆସନ୍ତା 15 ରୁ 27 ତାରିଖ ଯାଁଏ 13 ଦିନ ଧରି ଚାଲିବାକୁ ଥିବା ଏହି ମେଳାରେ ପ୍ରତିଦିନ ସନ୍ଧ୍ୟାରେ ବିଭିନ୍ନ ପ୍ରକାର ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବାର ବ୍ୟବସ୍ଥା ରହିଛି । ଏହି ମେଳାରେ ସୁରକ୍ଷା ଓ ପରିବେଶକୁ ଦୃଷ୍ଟିରେ ରଖି ସମସ୍ତ ପ୍ରକାର ବନ୍ଦୋବସ୍ତ କରାଯାଇଛି ।
ଗତବର୍ଷ ଏହି ମେଳାରେ 20 କୋଟି ବ୍ୟବସାୟ କରିଥିବାବେଳେ ଚଳିତବର୍ଷ ମଧ୍ୟ ସେଭଳି ଭଲ ବ୍ୟବସାୟ ଆଶା କରାଯାଉଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
