ଭୁବନେଶ୍ବର: ପୁଣି ଥରେ ମହଙ୍ଗା ପଡିଛି ହସ୍ପିଟାଲରେ କାର୍ଯ୍ୟରତ ସମୟରେ ଟିକ୍ଟକ୍ ଭିଡିଓ ପ୍ରସ୍ତୁତ କରିବା । ମାମଲାରେ ସମ୍ପୃକ୍ତ 2 କର୍ମଚାରୀଙ୍କ ବିରୋଧରେ ରାଜ୍ୟ ଏଡ୍ସ ନିୟନ୍ତ୍ରଣ ସମିତି (ଓସାକ୍ସ) ପକ୍ଷରୁ କଡା କାର୍ଯ୍ୟାନୁଷ୍ଠାନ ନିଆଯାଇଛି । ଉଭୟଙ୍କୁ କାରଣ ଦର୍ଶାଅ ନୋଟିସ ଦେବା ସହ ଅନ୍ୟତ୍ର ବଦଳି କରାଯାଇଛି ।
ରାଜଧାନୀ ଭୁୁବନେଶ୍ବରର ଏଆରଟି ସେଣ୍ଟର(ଆଣ୍ଟି ରେଟ୍ରୋଭାଇରାଲ ଥେରାପି ସେଣ୍ଟର) 2 କର୍ମଚାରୀ କାଉନସଲର ସରିତା ପତ୍ର ଓ ପୂର୍ଣ୍ଣଚନ୍ଦ୍ର ମହାନ୍ତି ହସ୍ପିଟାଲର ନିଜ ଚାମ୍ବରରେ ଟିକଟକ୍ ଭିଡିଓ ପ୍ରସ୍ତୁତ କରିବା ସହ ଜଣେ ଏଚଆଇଭି ରୋଗୀଙ୍କ ସହ ଦୁର୍ବ୍ୟବହାର କରିଥିବା ଅଭିଯୋଗ ହୋଇଥିଲା । ଅଭିଯୋଗକୁ ଭିତ୍ତି କରି ସରିତା ପତ୍ରଙ୍କୁ ଅନୁଗୋଳ ଏବଂ ପୂର୍ଣ୍ଣଚନ୍ଦ୍ର ମହାନ୍ତିଙ୍କୁ ନବରଙ୍ଗପୁରକୁ ବଦଳି କରାଯାଇଛି । ଏଥିସହ ଟିକ୍ଟକ କରୁଥିବା ଯୁବକକୁ ଛଟେଇ କରିବାକୁ ସମ୍ପୃକ୍ତ ସଂସ୍ଥାକୁ ନୋଟିସ୍ ଦିଆଯାଇଛି । ଏଭଳି ଘଟଣାର ଯେପରି ପୁନରାବୃତ୍ତି ନଘଟେ ସେ ନେଇ ସଚେତନ ରହିବାକୁ ଚେତାବନି ଦିଆଯାଇଛି । ମାମଲାରେ ସମ୍ପୃକ୍ତ ଥିବା ସମସ୍ତେ ନିଜର ଭୁଲ ସ୍ବୀକାର କରିଛନ୍ତି ।
ସେପଟେ ଘଟଣାକୁ ନେଇ ଓସାକ୍ସର ପ୍ରକଳ୍ପ ନିର୍ଦ୍ଦେଶକ ପୁନମ ଗୁହା ଦୁଃଖ ପ୍ରକାଶ କରିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
