ଭୁବନେଶ୍ବର: ଏଥର ଡିଜିଟାଲ ମାଧ୍ୟମରେ ହେବ କେଳୁଚରଣ ମହାପାତ୍ର ସମ୍ମାନ ଉତ୍ସବ।ଆସନ୍ତା 5 ତାରିଖରୁ 9 ତାରିଖ ପର୍ଯ୍ୟନ୍ତ ହେବାକୁ ଥିବା ଏହି ଉତ୍ସବକୁ ବଲିଉଡର ସୁନାମଧନ୍ୟ ଅଭିନେତ୍ରୀ ହେମାମାଳିନୀ ଉଦ୍ଘାଟନ କରିବେ।
26 ବର୍ଷରେ ପଦାର୍ପଣ କରିଥିବା ଏହି ଅନୁଷ୍ଠାନ ପକ୍ଷରୁ ଓଡ଼ିଆ ସିନେ ଜଗତର ପ୍ରସିଦ୍ଧ କ୍ୟାମେରା ମ୍ୟାନ ରାଜୁ ମିଶ୍ରଙ୍କୁ ଗୁରୁ କେଳୁ ଚରଣ ମହାପାତ୍ର ସମ୍ମାନରେ ସମ୍ମାନିତ କରାଯିବ ବୋଲି ସୃଜନ ଅନୁଷ୍ଠାନ ପକ୍ଷରୁ କୁହାଯାଇଛି । ଏହି ଅବସରରେ ଅନ୍ୟ ଦୁଇଜଣ ଯୁବ ପ୍ରତିଭା ପ୍ରଭାତ କୁମାର ସ୍ୱାଇଁ ଓ ହିମାଂଶୁ ଶେଖର ସ୍ୱାଇଁ ଙ୍କୁ ଗୁରୁ କେଳୁ ଚରଣ ମହାପାତ୍ର ଯୁବ ପ୍ରତିଭା ସମ୍ମାନ ରେ ସମ୍ମାନିତ କରାଯିବ ବୋଲି ସୃଜନ ର ମୁଖ୍ୟ ରତିକାନ୍ତ ମହାପାତ୍ର ପ୍ରକାଶ କରିଛନ୍ତି।
ଏହି ସମସ୍ତ ସମ୍ମାନ ଉତ୍ସବର ଶେଷ ସନ୍ଧ୍ୟାରେ ମାନ୍ୟବର ରାଜ୍ୟପାଳ ପ୍ରଫେସର ଗଣେଶି ଲାଲଙ୍କ ଦ୍ଵାରା ପ୍ରଦାନ କରାଯିବ ବୋଲି ସେ କହିଛନ୍ତି। ପଞ୍ଚ ଦିବସୀୟ ଏହି ଉତ୍ସବରେ ବହୁ ବିଶିଷ୍ଟ ନୃତ୍ୟ ଓ ସଂଗୀତଶିଳ୍ପୀ ମାନେ ଯୋଗ ଦେଇ ସେମାନଙ୍କ କଳା ଓ ନୈପୁଣ୍ୟର ପ୍ରଦର୍ଶନ କରିବେ ବୋଲି ସେ ସୂଚନା ଦେଇଛନ୍ତି। ଯାହାକି ଫେସବୁକ ଲାଇଭ ଓ ୟୁ ଟ୍ୟୁବ ମାଧ୍ୟମରେ ଦର୍ଶକମାନେ ଘରେ ରହି ଉପଭୋଗ କରି ପାରିବେ ବୋଲି ସେ କହିଛନ୍ତି।
ଭୁବନେଶ୍ୱରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
