ଭୁବନେଶ୍ବର: କୋରୋନା ମହାମାରୀ ଯୋଗୁଁ ଭୁବନେଶ୍ବରେ ବରିଷ୍ଠ ନାଗରିକଙ୍କୁ ବ୍ୟାଙ୍କ ଯିବାକୁ ବାରଣ କଲା ବିଏମସି । ବରିଷ୍ଠ ନାଗରିକଙ୍କ ବ୍ୟାଙ୍କ ସମସ୍ୟା ସମ୍ପୃକ୍ତ ନାଗରିକଙ୍କ ଘରକୁ ଯାଇ ତୁଟାଇବାକୁ ବିଏମସି ପକ୍ଷରୁ ଏସଓପି ଜାରି ହୋଇଛି ।
୬୦ ବର୍ଷରୁ ଉର୍ଦ୍ଧ୍ବ ବ୍ୟକ୍ତିଙ୍କୁ ରହିଛି କୋରୋନା ସଂକ୍ରମଣର ଅଧିକ ଆଶଙ୍କା, ତେଣୁ ସାରା ଦେଶରେ ବରିଷ୍ଠ ନାଗରିକଙ୍କ ସୁରକ୍ଷାକୁ ଅଧିକ ପ୍ରାଧାନ୍ୟ ଦେବା ପାଇଁ କୁହାଯାଇଛି । ପ୍ରଧାନମନ୍ତ୍ରୀଙ୍କ ଠାରୁ ଆରମ୍ଭ କରି ମୁଖ୍ୟମନ୍ତ୍ରୀ ପର୍ଯ୍ୟନ୍ତ ସମସ୍ତେ ବୟସ୍କ ବ୍ୟକ୍ତିଙ୍କ ଖାସ ଯତ୍ନ ନେବା ପାଇଁ ଅପିଲ କରିଥିବା ବେଳେ ବିଏମସି ମଧ୍ୟ ଶୁକ୍ରବାର ଏନେଇ ନେଇଛି ଏକ ସ୍ବାଗତ ଯୋଗ୍ୟ ପଦକ୍ଷେପ ।
କୋରୋନା ସଂକ୍ରମଣରୁ ବରିଷ୍ଠ ନାଗରିକଙ୍କୁ ଦୂରେଇ ରଖିବା ପାଇଁ ବାହାରକୁ ଯିବାକୁ ବାରଣ କରାଯାଇଛି। ବ୍ୟାଙ୍କ ଅଧିକାରୀଙ୍କୁ ଘରକୁ ଘର ଯାଇ ନେଟ ବ୍ୟାଙ୍କିଙ୍ଗ ଓ ଡିଜିଟାଲ ବ୍ୟାଙ୍କିଙ୍ଗ ବିଷୟରେ ଅବଗତ କରାଇବକୁ କୁହାଯାଇଛି । ଏନେଇ ଶୁକ୍ରବାର ବିଏମସି ପକ୍ଷରୁ ଏକ ନିର୍ଦ୍ଦେଶନାମା ଜାରି କରାଯାଇଛି। ଯଦି କୌଣସି ବ୍ୟକ୍ତିଙ୍କ ବ୍ୟାଙ୍କ ସମସ୍ୟା ରହିଛି,ବ୍ୟାଙ୍କ କର୍ତ୍ତୃପକ୍ଷ ଏନେଇ ଘରେ ସମସ୍ତ ବ୍ୟାଙ୍କ ସୁବିଧା ଯୋଗାଇଦେବେ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
