ଭୁବନେଶ୍ବର: ଇଫକୋ ଦ୍ବାରା ନାନୋ ୟୁରିଆ (ତରଳ) ସାର, ଗୁଜୁରାଟର କଲ୍ଲୋଳ କାରଖାନାରୁ ଓଡିଶା ପାଇଁ ଯୋଗାଣର କାର୍ଯ୍ୟକ୍ରମର ଶୁଭାରମ୍ଭ ହୋଇଛି । କାର୍ଯ୍ୟକ୍ରମକୁ ଭିସି ଯୋଗେ ଶୁଭାରମ୍ଭ କରିଛନ୍ତି କୃଷିମନ୍ତ୍ରୀ ଅରୁଣ ସାହୁ । ସ୍ଵଦେଶୀ ଜ୍ଞାନ କୌଶଳ ଦ୍ବାରା ପ୍ରସ୍ତୁତ ଏହି ସାର ୟୁରିଆର ବିକଳ୍ପ ଭାବରେ ବ୍ୟବହାର କରାଯାଇ ପାରିବ । ଏହି ସାରର ପ୍ରୟୋଗ ଫଳରେ ଫସଲର ଉତ୍ପାଦନ ଖର୍ଚ୍ଚ କମିବ, ଫଳରେ ଚାଷୀର ଅଧିକ ଲାଭ ହୋଇ ପାରିବ ବୋଲି କୃଷି ମନ୍ତ୍ରୀ କହିଛନ୍ତି ।
ଏହା ଗଛର ବା ଫସଲର ଆବଶ୍ୟକତା ଅନୁଯାୟୀ ଧୀରେ ଧୀରେ ଏବଂ ଅନବରତ ଭାବରେ ପୋଷାକତତ୍ତ୍ଵ ଯୋଗାଇବ । ଫସଲ ଏହାକୁ ଖୁବଶୀଘ୍ର ଗ୍ରହଣ କରିବ, ତେଣୁ ଅମଳ ମଧ୍ୟ ବଢିବ । ଏହି ସାରର ପ୍ରୟୋଗ ଫଳରେ ଫସଲର ଫଟୋସିନ୍ଥେସିସ ଭଲ ଭାବରେ ସକ୍ଷମ ତଥା ତ୍ବରାନ୍ବିତ ହେବ । ଏହି ସାର ପ୍ରୟୋଗର ପରବର୍ତ୍ତୀ ଅବସ୍ଥାରେ ମୃତ୍ତିକାରେ କୌଣସି ଅବଶିଷ୍ଟାଂଶ ରୁହେନାହିଁ, ଫଳରେ ମୃତ୍ତିକାର ଉର୍ବରତା ବଜାୟ ରଖିବ। ନାନୋ ୟୁରିଆ ପ୍ରୟୋଗ ଫଳରେ ଫସଲର ମରୁଡି ସହନଶୀଳତା ବୃଦ୍ଧିପାଏ । ମୃତ୍ତିକାରୁ ସବୁଜଗୃହ ଗ୍ୟାସ ନିର୍ଗତ ମଧ୍ୟ ବହୁଳ ମାତ୍ରାରେ କମିଯାଏ, ଫଳରେ ବିଶ୍ବ ଉତ୍ତାପନ କମ ହେବାରେ ଏହା ଯଥେଷ୍ଟ ମାତ୍ରାରେ ସହାୟକ ହେବ ।
ମୃତ୍ତିକା, ଜଳ ଓ ବାୟୁ ପ୍ରଦୂଷଣ ମଧ୍ୟ ଏହିଁ ସାର ପ୍ରୟୋଗ ଫଳରେ କମ କରାଯାଇ ପାରିବ । ଯଦି ଏହାର ପରିମାଣ ବିଷୟରେ କହିବା,ତାହାଲେ ଏହାର କେବଳ ୫ ଶହ ମିଲି.ଲିଟର ପ୍ରୟୋଗ ଗୋଟିଏ ବ୍ୟାଗ ୟୁରିଆ ପ୍ରୟୋଗ ସହ ସମାନ ବୋଲି ଜଣାପଡିଛି । ତରଳ ନାନୋ ୟୁରିଆ ଓଡ଼ିଶାର କୃଷକ ଭାଇ ଓ ଭଉଣୀଙ୍କ ପାଇଁ ଏକ ଗୌରବର ବିଷୟ ବୋଲି କହିଛନ୍ତି କୃଷିମନ୍ତ୍ରୀ ଅରୁଣ ସାହୁ । ସମଗ୍ର ବିଶ୍ଵ ବର୍ତ୍ତମାନ ଜଳବାୟୁ ପରିବର୍ତ୍ତନର ଶିକାର ହେଉଛି । ପାଣିପାଗର ଅନିୟମିତତା କୃଷି କାର୍ଯ୍ୟକୁ ଏକ ବଡ ବିପଦ ଭିତରକୁ ଠେଲି ଦେଉଛି । ତରଳ ନାନୋ ୟୁରିଆ ସାରର ପ୍ରୟୋଗ ନିଶ୍ଚିତ ରୂପେ ଏକ ବିକଳ୍ପ ଭଳି କାମ କରିବ ବୋଲି ମନ୍ତ୍ରୀ ଆଶାବାଦୀ ଅଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
