ଭୁବନେଶ୍ବର: କଂଗ୍ରେସ କ୍ଷମତାକୁ ଆସିଲେ ଯୁବକଙ୍କୁ ମିଳିବ ବେକାରୀ ଭତ୍ତା । ମାସକୁ 3000 ଟଙ୍କାର ବେକାରୀ ଭତ୍ତା ଦେବ କଂଗ୍ରେସ । ପ୍ରତ୍ୟେକ ପରିବାରର ଜଣଙ୍କୁ ସରକାରୀ କିମ୍ବା ବେସରକାରୀ ସ୍ତରରେ ଚାକିରୀ ନ ମିଳିବା ପର୍ଯ୍ୟନ୍ତ ଏହି ଭତ୍ତା ଦିଆଯିବ ବୋଲି ରାଜ୍ୟ କଂଗ୍ରେସ ଆଜି (ରବିବାର) ନିଜର ଇସ୍ତାହାରରେ ପ୍ରକାଶ କରିଛି । ଏହା ସହ ଦଳ ମହିଳା, କୃଷକ, ଆଦିବାସୀଙ୍କ ପାଇଁ ମଧ୍ୟ ବିଭିନ୍ନ ପ୍ରତିଶୃତି ରଖିଛି ।
ଆଜି(ରବିବାର) ପିସିସି ସଭାପତି ନିରଞ୍ଜନ ପଟ୍ଟନାୟକ ଇସ୍ତାହାର ଘୋଷଣା କରି ରାଜ୍ୟରେ କଂଗ୍ରେସ ଶାସନାଧିନ ହେଲେ ଏସବୁ କାର୍ଯ୍ୟ କରାଯିବ ବୋଲି କହିଛନ୍ତି । ଇସ୍ତାହାର ପତ୍ରର ନାମ ‘ଆସିବ କଂଗ୍ରେସ ହସିବ ଓଡିଶା’ ରଖାଯାଇଛି । ଇସ୍ତାହାର ମାଧ୍ୟମରେ ରାଜ୍ୟ କଂଗ୍ରେସ ରାଜ୍ୟବାସୀଙ୍କ ଆଗରେ 19ଟି ପ୍ରତିଶୃତି ରଖିଛି ।
ଦାରିଦ୍ର୍ୟ ସୀମାରେଖା ତଳେ ଥିବା ପ୍ରତ୍ୟେକ ପରିବାରକୁ ରାହୁଲ ଗାନ୍ଧୀ ଘୋଷଣା କରିଥିବା ନ୍ୟାୟ(ନ୍ୟୁନତମ ଆୟର ଗ୍ୟାରେଣ୍ଟି) ଆଧାରରେ ମାସିକ 6 ହଜାର ଟଙ୍କା ଲେଖାଏଁ ଟଙ୍କା ଦିଆଯିବ ବୋଲି ଇସ୍ତାହାରରେ ପ୍ରତିଶୃତି ଦିଆଯାଇଛି । ଏହା ସହ ଏହି ଟଙ୍କା ପରିବାରର ମହିଳାଙ୍କ ଆକାଉଣ୍ଟକୁ ସିଧାସଳଖ ଯିବ ବୋଲି ଦର୍ଶାଯାଇଛି ।
ପ୍ରତି ପରିବାରରୁ ଜଣଙ୍କୁ ସରକାରୀ ତଥା ବେସରକାରୀ କ୍ଷେତ୍ରରେ ଚାକିରୀ ଯୋଗାଇ ଦିଆଯିବ ବୋଲି କୁହାଯାଇଛି । ଯେପର୍ଯ୍ୟନ୍ତ ଚାକିରି ମିଳିନାହିଁ ମାସିକ 3 ହଜାର ଟଙ୍କାର ଭତ୍ତା ଦିଆଯିବ ବୋଲି ମଧ୍ୟ ଏଥିରେ ଉଲ୍ଲେଖ ରହିଛି ।
ସମସ୍ତ ଚାକିରିକୁ ସ୍ଥାୟୀ କରାଯିବ ବୋଲି କଂଗ୍ରେସ ଇସ୍ତାହାରରେ ପ୍ରକାଶ କରିଛି । ଏହା ସହ ଭୂମିହୀନଙ୍କୁ ଭୂମି ଓ ବାସହୀନଙ୍କୁ ଘର ଯୋଗାଇଦେବ ବୋଲି ଦଳ କହିଛି ।
ସେହିପରି କୃଷକଙ୍କ ପାଇଁ 2 ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଛାଡ କରିବା ସହ ଯେଉଁ ଚାଷୀ ମାନେ ପଇସା ଦେଇଛନ୍ତି ସେମାନଙ୍କ ଟଙ୍କା ଫେରସ୍ତ କରାଯିବ ବୋଲି କୁହାଯାଇଛି । ଏହାଛଡା 3 ବର୍ଷ ପର୍ଯ୍ୟନ୍ତ ବର୍ଷକୁ 10 ହଜାର ଟଙ୍କା ଲେଖାଏଁ ଅତିରିକ୍ତ ଆର୍ଥିକ ସହାୟତା ଦିଆଯିବ ବୋଲି ଏଥିରେ ଦର୍ଶାଯାଇଛି ।
ଚାଷୀଙ୍କୁ ସୋଲାର ପମ୍ପ ଯୋଗାଇବା ସହ ଧାନ କ୍ବିଣ୍ଟାଲ ପିଛା 2600 ଟଙ୍କା ଦିଆଯିବ ବୋଲି କଂଗ୍ରେସ କହିଛି । ତେବେ ମହିଳାଙ୍କୁ ମଧ୍ୟ ଖୁସି କରିବା ପାଇଁ କଂଗ୍ରେସ ବିଭିନ୍ନ ଆଶା ଦେଖାଇଛି ।
ସରକାରୀ ଚାକିରିରେ ମହିଳାଙ୍କୁ 33 ପ୍ରତିଶତ ସଂରକ୍ଷଣ ଦେବ ବୋଲି ଦଳ କହିଛି । ଏହା ଛଡା ଝିଅ ମାନଙ୍କୁ ସବୁ ପର୍ଯ୍ୟାୟରେ ମାଗଣା ଶିକ୍ଷା ପ୍ରଦାନ କରାଯିବା ସହ ବିବାହ ପାଇଁ ଆର୍ଥିକ ସହାୟତା ଦିଆଯିବ ବୋଲି ଦଳ ଏଥିରେ ପ୍ରତିଶୃତି ଦେଇଛି ।
ଅଙ୍ଗନୱାଡି କର୍ମୀଙ୍କୁ ସ୍ଥାୟୀ କରିବା ସହ ମାସିକ 9000 ଟଙ୍କା ଦିଆଯିବ ବୋଲି ଦଳ କହିଥିବାବେଳେ ବିଧବା ମହିଳାଙ୍କୁ 2000 ଟଙ୍କା ପେନସନ ଦେବ ବୋଲି ଦଳ ଗୁରୁତ୍ବାରୋପ କରିଛି ।
ଏହା ସହ ଦଳ ଆଦିବାସୀଙ୍କ କଲ୍ୟାଣ, ଦଳିତଙ୍କ ଅଧିକାର, ଶିକ୍ଷା, ସ୍ବାସ୍ଥ୍ୟ, ଖାଦ୍ୟ, ପାନୀୟଜଳ ଆଦି ପ୍ରସଙ୍ଗକୁ ନିଜ ଇସ୍ତାହାରରେ ସ୍ଥାନ ଦେଇଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
