ଭୁବନେଶ୍ବର: ପୁରୀ ବଗଲା ଧର୍ମଶାଳା ଜମିକୁ ଜିଲ୍ଲାପାଳ ପ୍ଲଟିଙ୍ଗ କରି ବିକ୍ରି କରିଦେବା ପ୍ରସଙ୍ଗକୁ ନେଇ ରାଜ୍ୟ କଂଗ୍ରେସର ତୁମ୍ବି ତୋଫାନ ଜାରି ରହିଛି । ବିନା ସରକାରୀ ନୋଟିଫିକେସନରେ ଲୋକମାନଙ୍କୁ ଭୁଆଁ ବୁଲାଇ ତାଙ୍କ ଜମି ହଡପ କରାଯିବା ସହ ତାହାକୁ ବିକ୍ରି କରାଯାଇଥିବା ଦଳ ଅଭିଯୋଗ ପରେ ମଧ୍ୟ ସରକାରଙ୍କ ବିରୋଧରେ ଗର୍ଜନ ଆରମ୍ଭ କରିଛି ।
ଆଜି ( ବୁଧବାର) ଏପ୍ରସଙ୍ଗରେ ରାଜ୍ୟ କଂଗ୍ରେସର ଏକ ପ୍ରତିନିଧି ଓ ପୁରୀ କଂଗ୍ରେସର ସଦସ୍ୟ ରାଜ୍ୟପାଳଙ୍କୁ ଦାବିପତ୍ର ଦେଇଛନ୍ତି । ଦଳ ଅଭିଯୋଗ କରିଛି 1905 ମସିହାରେ ବଦାନ୍ୟ ବ୍ୟକ୍ତିଙ୍କ ଦ୍ୱାରା ଦାନ ସୂତ୍ରରେ ତୀର୍ଥଯାତ୍ରୀଙ୍କ ସୁବିଧା ନିମନ୍ତେ କରାଯାଇଥିବା ଏହି ଧର୍ମଶାଳାକୁ ସରକାରୀ କଳର ଜ୍ଞାତସାରରେ ବିକ୍ରି କରାଯାଇଛି । ସେହିଭଳି ଏପର୍ଯ୍ୟନ୍ତ ଜମି ହରାଇଥିବା ବ୍ୟକ୍ତିବିଶେଷ କ୍ଷତି ପୂରଣ ପାଇ ନାହାନ୍ତି।
ତେଣୁ ରାଜ୍ୟପାଳ ଏଦିଗରେ ହସ୍ତକ୍ଷେପ କରି ହୋଇଥିବା ଜମିଜମା କିଣାବିକାକୁ ରଦ୍ଦ କରିବା ପାଇଁ ସ୍ମାରକପତ୍ରରେ ଉଲ୍ଲେଖ କରିଛି ଦଳ । ଅନ୍ୟପଟେ ଏନେଇ ସରକାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ନକଲେ ଆଗାମୀ ଦିନରେ ଏହାକୁ ନେଇ କଂଗ୍ରେସ ଆନ୍ଦୋଳନକୁ ଓଲ୍ଲାଇବ ବୋଲି ପୁରୀ ଜିଲ୍ଲା କଂଗ୍ରେସ ସଭାପତି ଅମୀୟ ପଟ୍ଟନାୟକ କହିଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
