ଭୁବନେଶ୍ବର: ରାଜସ୍ବ ବିଭାଗ ଅଧୀନରେ ଥିବା ଜାଗାରେ ନିର୍ମାଣ ହୋଇଥିବା ସରକାରୀ ସ୍କୁଲ ଓ କଲେଜ ମହାବିଦ୍ୟାଳୟ ନେଇ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି କ୍ୟାବିନେଟ (Cabinet meeting) । ସରକାରୀ ଜମିର ଅନଧିକୃତ ଦଖଲକୁ ନିୟମିତ କରିବା ପାଇଁ ନୀତିକୁ କ୍ୟାବିନେଟର ମୋହର ମାରିଛନ୍ତି । ଏନେଇ ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି ସୂଚନା ଦେଇଛନ୍ତି ।
ରାଜ୍ୟ ସରକାର ୧୯୭୭ ମସିହାରେ ବିଭିନ୍ନ ସ୍ଥାନରେ ମହାବିଦ୍ୟାଳୟ ପ୍ରତିଷ୍ଠା ପାଇଁ ସହରାଞ୍ଚଳରେ ୧୦ ଏକର ଏବଂ ଗ୍ରାମାଞ୍ଚଳରେ ୧୫ ଏକର ସରକାରୀ ଜମି ବିନାମୂଲ୍ୟରେ ଯୋଗାଇଦେବା ପାଇଁ ନୀତିଗତ ନିଷ୍ପତ୍ତି ନେଇଥିଲେ । ସେହିପରି ମଧ୍ୟ ଇଂରାଜୀ ବିଦ୍ୟାଳୟ ଏବଂ ମାଧ୍ୟମିକ ବିଦ୍ୟାଳୟ ପ୍ରତିଷ୍ଠା ପାଇଁ ସହରାଞ୍ଚଳରେ ଯଥାକ୍ରମେ ୨ ଏକର ଏବଂ ୩ ଏକର ଏବଂ ଗ୍ରାମାଞ୍ଚଳରେ ୩ ଏକର ଏବଂ ୫ ଏକର ସରକାରୀ ଜମି ବିନାମୂଲ୍ୟରେ ଯୋଗାଇଦେବା ପାଇଁ ମଧ୍ୟ ନିଷ୍ପତ୍ତି ନେଇଥିଲେ । ଏହି ନିଷ୍ପତ୍ତିକୁ ୧୯୯୮ ମସିହାରେ ମଧ୍ୟ ମାଧ୍ୟମିକ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟ ପ୍ରତିଷ୍ଠା ପାଇଁ ଦୋହରାଇଥିଲେ । ଏଯାବତ ଓଡ଼ିଶାରେ ୫୧ ଟି ସରକାରୀ ମହାବିଦ୍ୟାଳୟ ଏବଂ ୬୪୪ ଟି ଅନୁଦାନ ପ୍ରାପ୍ତ ମହାବିଦ୍ୟାଳୟ ଦଖଲରେ ଯଥାକ୍ରମେ ୧୮୦ ଏକର ଏବଂ ୧୭୧୩ ଏକର ସରକାରୀ ଜମିରେ ଅଛି । ଏହାର ଆନୁମାନିକ ମୂଲ୍ୟ ୨୫୦୦ କୋଟି ଟଙ୍କା ହେବ । ସେହିପରି ୧୨୭୪ ଟି ଉଚ୍ଚ ବିଦ୍ୟାଳୟ ଦଖଲରେ ଥିବା ସରକାରୀ ଜମିର ଆନୁମାନିକ ମୂଲ୍ୟ ୧୫୦୦ କୋଟି ଟଙ୍କା ହେବ ।
ଏଣୁ ରାଜ୍ୟରେ ଶିକ୍ଷା ବ୍ୟବସ୍ଥାକୁ ସୁଦୃଢ କରିବା ନିମନ୍ତେ ଏହି ନୀତିଗତ ନିଷ୍ପଷି ସରକାରଙ୍କ ବିଚାରାଧୀନ ଥିଲା । ଏହି କ୍ରମରେ ରାଜ୍ୟ ସରକାର ନିମ୍ନଲିଖିତ ନିଷ୍ପତ୍ତି ନେଇଛନ୍ତି ।
1- ସରକାରୀ ଡିଗ୍ରୀ କଲେଜଗୁଡିକ (ସ୍ଵୟଂଶାସିତ ଏବଂ ଅଣ- ସ୍ଵୟଂଶାସିତ ସରକାରୀ କଲେଜ ) ଏବଂ ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡିକ ଦଖଲରେ ଥିବା ସମସ୍ତ ସରକାରୀ ଜମି, ଯଥାକ୍ରମେ ଉଚ୍ଚଶିକ୍ଷା ବିଭାଗ ଏବଂ ବିଦ୍ୟାଳୟ ଓ ଗଣଶିକ୍ଷା ବିଭାଗ ନାମରେ ସଂପୃକ୍ତ ଡିଗ୍ରୀ କଲେଜ/ଉଚ୍ଚ ମାଧ୍ୟମିକ ବିଦ୍ୟାଳୟ ମାରଫତରେ ରହି ରେକର୍ଡ ହେବ । କିନ୍ତୁ ମିଶ୍ରିତ କଲେଜଗୁଡିକ କ୍ଷେତ୍ରରେ ଦଖଲ ଭୁକ୍ତ ଜମିର ପରିମାଣ ଅନୁଯାୟୀ ପୃଥକ ଭାବରେ ରେକର୍ଡ୍ କରାଯିବ । ଅର୍ଥାତ ଡିଗ୍ରୀ କଲେଜ ଅଧୀନରେ ଥିବା ଜମି ଉଚ୍ଚଶିକ୍ଷା ବିଭାଗ ନାମରେ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟ ଅଧୀନରେ ଥିବା ଜମି ବିଦ୍ୟାଳୟ ଓ ଗଣଶିକ୍ଷା ବିଭାଗ ନାମରେ ରେକର୍ଡ ହେବ । ଅବଶ୍ୟ ଯେଉଁଠାରେ ବ୍ୟବହାରିକ ସମସ୍ୟା ଏବଂ ଅସୁବିଧା ହେତୁ ଜମିର ବିଭାଜନ ସମ୍ଭବ ନୁହେଁ, ସମଗ୍ର ଜମି ଉଚ୍ଚ ଶିକ୍ଷା ବିଭାଗ ନାମରେ ରେକର୍ଡ ହେବ ।
2- ସ୍ବୟଂଶାସିତ ଏବଂ ଅଣ- ସ୍ବୟଂଶାସିତ ଅନୁଦାନ ପ୍ରାପ୍ତ ସରକାରୀ କଲେଜ ଏବଂ ଅନୁଦାନ ପ୍ରାପ୍ତ ଉଚ୍ଚ ମାଧ୍ୟମିକ ବିଦ୍ୟାଳୟରେ ଅନୁଦାନ ପ୍ରାପ୍ତ ହୋଇଥିବା ଡିଗ୍ରୀ କଲେଜ ଗୁଡିକ ସଂପୃକ୍ତ ଶିକ୍ଷାନୁଷ୍ଠାନ ମାରଫତରେ ରହିବା ସହିତ ଯଥାକ୍ରମେ ଉଚ୍ଚଶିକ୍ଷା ବିଭାଗ ଏବଂ ବିଦ୍ୟାଳୟ ଓ ଗଣଶିକ୍ଷା ବିଭାଗ ନାମରେ ରେକର୍ଡ ହେବ । ଯେଉଁଠାରେ ଏକ ଉଚ୍ଚ ମାଧ୍ୟମିକ ବିଦ୍ୟାଳୟ ସହିତ ଏକ ଡିଗ୍ରୀ କଲେଜ ସହଭାଗୀ ହୁଏ, ସେହି ଜମିକୁ ଯଥାକ୍ରମେ ଉଚ୍ଚଶିକ୍ଷା ବିଭାଗ ଏବଂ ବିଦ୍ୟାଳୟ ଓ ଗଣଶିକ୍ଷା ବିଭାଗ ନାମରେ ସଂପୃକ୍ତ ଶିକ୍ଷାନୁଷ୍ଠାନ ମାରଫତରେ ରହି ଜମି ରେକର୍ଡ କରାଯିବ । ମାତ୍ର ଯେଉଁଠାରେ ବ୍ୟବହାରିକ ସମସ୍ୟା ଏବଂ ଅସୁବିଧା ହେତୁ ଜମିର ବିଭାଜନ ସମ୍ଭବ ନୁହେଁ, ସେହି ଜମି ଉଚ୍ଚଶିକ୍ଷା ବିଭାଗ ନାମରେ ରେକର୍ଡ ହେବ ।
3- ସରକାରୀ ଉଚ୍ଚ ବିଦ୍ୟାଳୟ ଗୁଡିକ ଦଖଲରେ ଥିବା ସମସ୍ତ ଜମି ସଂପୃକ୍ତ ଶିକ୍ଷାନୁଷ୍ଠାନ ମାରଫତରେ ରହିବା ସହିତ ବିଦ୍ୟାଳୟ ଓ ଗଣଶିକ୍ଷା ବିଭାଗ ନାମରେ ରେକର୍ଡ କରାଯିବ ।
4- ସେହିପରି ପରକାରୀ ଅନୁଦାନ ପ୍ରାପ୍ତ ଉଚ୍ଚ ବିଦ୍ୟାଳୟ ଗୁଡିକ ଦଖଲରେ ଥିବା ସରକାରୀ ଜମି ସଂପୃକ୍ତ ଶିକ୍ଷାନୁଷ୍ଠାନ ମାଫିତରେ ରହିବା ସହିତ ବିଦ୍ୟାଳୟ ଓ ଗଣଶିକ୍ଷା ବିଭାଗ ନାମରେ ରେକର୍ଡ କରାଯିବ ।
5- ରେକର୍ଡ ହେବାକୁ ଥିବା ଜମି ଲିଜ୍ ଯୋଗ୍ୟ, ଅଣ ଜଙ୍ଗଲ କିସମ, DLC ଲିଷ୍ଟରେ ନ ଥାଇ ଅବରୋଧ ମୁକ୍ତ ଓ ବିବାଦ ମୁକ୍ତ ହୋଇଥିବା ଆବଶ୍ୟକ ।
6- ଏହି ଜମି ବିନା ମୂଲ୍ୟରେ ଜିଲ୍ଲାପାଳଙ୍କର ଅନୁମୋଦନ କ୍ରମେ ତହସିଲଦାର ରେକର୍ଡ କରିବେ । ଏଥି ନିମନ୍ତେ ଓଡ଼ିଶା ସରକାରୀ ଜମି ବନ୍ଦୋବସ୍ତ ଆଇନର ଆବଶ୍ୟକୀୟ ସଂଶୋଧନ ରାଜସ୍ବ ବିଭାଗ ଦ୍ବାରା କରାଯିବ ।
7- ଯେଉଁଠାରେ ଡିଗ୍ରୀ କଲେଜ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟ ନାମରେ ପୃଥକ ରେକର୍ଡ କରିବାର ଆବଶ୍ୟକତା ଥିବ, ସ୍ଥାନୀୟ ତହସିଲଦାର ଜମିର ମାପ କରାଇ ସମ୍ପୃକ୍ତ ଅଧ୍ୟକ୍ଷଙ୍କ ପରାମର୍ଶକ୍ରମେ ରେକର୍ଡ କରିବେ ।
8- ଉକ୍ତ ଜମି ଉପରେ ଦରଜ ହୋଇଥିବା ସମସ୍ତ ଜବରଦଖଲ ମାମଲା ମଧ୍ୟ ବନ୍ଦ କରାଯିବ । ଏହାର ମୂଲ୍ୟାଙ୍କନ ପାଇଁ ଟୋକନ ପରିମାଣ ପ୍ରତିବର୍ଷ ପ୍ରତି ଏକର ପିଛା ଏକ ଟଙ୍କା ହିସାବରେ ଏବଂ ଜୋରିମାନା ପ୍ରତିବର୍ଷ ପ୍ରତି ଏକର ପିଛା ଦଶ ଟଙ୍କା ହିସାବରେ ଆଦାୟ କରାଯିବ । ବକେୟା ରାଶି ଉପରେ ଯଦି କୌଣସି ସୁଧ ଥାଏ ତାହା ମଧ୍ୟ ଛାତ କରାଯିବ ।
9- ସରକାରୀ ଜମି ଦାଖଲ କରିବାର ଧାର୍ଯ୍ୟ ତାରିଖ ୧୧ ୨୦୨୦ ବୋଲି ନିଷ୍ପତ୍ତି ନିଆଯାଇଛି । ଏହି ନୀତିଗତ ନିଷ୍ପତି ଏକ ମାଇଲ ଖୁଣ୍ଟ ରୂପେ ସାବ୍ୟସ୍ତ ହେବ ।
ଭୁବନେଶ୍ବରରୁ ଭବାନୀଶଙ୍କର ଦାସ, ଇଟିଭି ଭାରତ
