ଭୁବନେଶ୍ବର: ଶ୍ରୀମନ୍ଦିର ପରିଚାଳନା କମିଟିର ବୈଠକ ପରେ ଗଜପତି ମହାରାଜ ପ୍ରତ୍ରିକ୍ରିୟା ରଖିଛନ୍ତି। ‘26 ଅପ୍ରେଲରୁ ରଥ ନିର୍ମାଣ ହେବା କଥା । ରଥ ନିର୍ମାଣ କାର୍ଯ୍ୟ ଦୁଇ ମାସ ଚାଲେ । ହେଲେ ଏଥର କାର୍ଯ୍ୟ ଆରମ୍ଭ ହୋଇପାରିନାହିଁ । ନୂତନ ଗାଇଡଲାଇନକୁ ଅନୁଧ୍ୟାନ କରିଛୁ । ମୁଁ ସ୍ପଷ୍ଟ କରିବାକୁ ଚାହେଁ ରଥ ନିର୍ମାଣ କାର୍ଯ୍ୟ ରିଲିଜିୟସ କାର୍ଯ୍ୟ ନୁହେଁ । ଏହା ଏକ ନିର୍ମାଣ କାର୍ଯ୍ୟ । ରଥଯାତ୍ରା ଏକ ରିଲିଜିଅସ ପର୍ବ । ତେଣୁ ରଥ ନିର୍ମାଣରେ କୌଣସି ଅସୁବିଧା ନାହିଁ ବୋଲି ପରିଚାଳନା କମିଟି ନିଷ୍ପତି ନେଇଛି ।’
ସେହିପରି ପୁରୀ ଗ୍ରୀନ ଜୋନରେ ଅଛି । ଗ୍ରୀନ ଜୋନରେ ନିର୍ମାଣ କାର୍ଯ୍ୟ ହୋଇପାରିବ ବୋଲି ଗାଇଡ ଲାଇନରେ ଉଲ୍ଲେଖ ଅଛି । ତେଣୁ ଆମେ ରଥ ନିର୍ମାଣ କରି ପାରିବୁ ବୋଲି ନିଷ୍ପତି ନେଇଛୁ । ରାଜ୍ୟ ସରକାରଙ୍କୁ ଜଣେଇଛୁ । ରଥ ନିର୍ମାଣ ଓ ରଥ ଯାତ୍ରା ନିଷ୍ପତି ରାଜ୍ୟ ସରକାର ନେବେ । ସରକାର ଆସନ୍ତାକାଲି ସୁଦ୍ଧା ଆମକୁ ଅନୁମତି ଦେଲେ ଆମେ ନିର୍ମାଣ କାର୍ଯ୍ୟ ଆସନ୍ତାକାଲି କିମ୍ବା ମଙ୍ଗଳବାର ଆରମ୍ଭ କରିବୁ । ଯଦି କୌଣସି ପରିସ୍ଥିତିରେ ରଥଯାତ୍ରା ବନ୍ଦ ହୁଏ, ତେବେ ଏହା ରୋଷ କାମରେ ଲାଗିବ ବୋଲି ଗଜପତି ଦିବ୍ୟସିଂହ ଦେବ କହିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
