ଭୁବନେଶ୍ବର: ସମ୍ପତ୍ତି ଲୋଭରେ ମାଆକୁ ପର କଲା ପୁଅ । ତିନି ତିନୋଟି ପୁଅ ହେଲେ ମାଆକୁ ରଖିବାକୁ କେହି ରାଜି ନୁହେଁ । ଏହା ପଛର କାରଣ ଜମିବାଡି ଆଉ ସମ୍ପତ୍ତି । ଏମିତି ଏକ ଦୃଶ୍ୟ ଆଜି ଦେଖିବାକୁ ମିଳିଥିଲା ରାଜଧାନୀରେ । ଘରୁ ମାଆକୁ ତଡି ଦେଇଛନ୍ତି ତିନି ପୁଅ । ଶେଷରେ ନ୍ୟାୟ ପାଇଁ ମାନବାଧିକାର କମିଶନ ନିକଟରେ ଗୁହାରି କରିଛନ୍ତି ବୃଦ୍ଧା ଜଣକ ।
ବୟସର ଶେଷ ଅବସ୍ଥାରେ ସମସ୍ତେ ଥାଇ ବି କେହି ନାହାଁନ୍ତି । ସ୍ବାମୀଙ୍କ ମୃତ୍ୟୁ ପରେ ତାଙ୍କର 3 ପୁଅ ଓ ଝିଅ ଥାଇ ବି ଅନାହାରରେ ରହୁଛନ୍ତି । ତିନି ପୁଅଙ୍କ ସରକାରୀ ଚାକିରୀ ଥାଇ ମଧ୍ୟ ବୁଢ଼ୀ ମାଆକୁ ପଚାରୁନାହାଁନ୍ତି । ମାଡ଼ ମାରି ଘରୁ ବାହାର କରିଦେଇଛନ୍ତି ତିନି ପୁଅ।
ବୃଦ୍ଧା ଜଣକ ହେଲେ ନିୟାଶା ବେହେରା, ବୟସ 70 । ଘର କଟକ ଜିଲ୍ଲାର ବଡମ୍ବା ବଡ଼ବାରସିଂହ ଗ୍ରାମରେ। ସ୍ବାମୀଙ୍କ ମୃତ୍ୟୁ ପରେ ନିୟାଶା କେତେବେଳେ ଝିଅ ଘରେ ତା ଆଉ କେତେବେଳେ ଗାଁ ଗଣ୍ଡାର ଆଉ କାହା ଘରେ ଦିନ କାଟୁଛନ୍ତି । ସମ୍ପତ୍ତି ଲୋଭରେ ତିନି ପୁଅ ମନେ ବାପାଙ୍କ ଦଶାହ କାର୍ଯ୍ୟ କରିଲେ ନାହିଁ । ବୃଦ୍ଧାଙ୍କ କହିବା କଥା ହେଲା, ଦୀର୍ଘ ଦିନ ହେଲା ତିନି ପୁଅ ପଚାରୁନାହାଁନ୍ତି । ସମସ୍ତେ ଚାକିରି କରିଛନ୍ତି ହେଲେ ବୁଢୀ ମାଆକୁ ଅଣଦେଖା କରୁଛନ୍ତି ।
ନିଜର ଭରଣ ପୋଷଣ ଓ ସୁରକ୍ଷା ପାଇଁ ଗ୍ରାମସଭା ଠାରୁ ପଞ୍ଚାୟତ, ସ୍ଥାନୀୟ ଭଦ୍ରଲୋକ, ଥାନା ଓ ଜିଲ୍ଲାପାଳଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ଶେଷରେ ଅନେକ ଆଶା ନେଇ ରାଜ୍ୟ ମାନବାଧିକାର କମିଶନଙ୍କ ନିକଟରେ ହାଜର ହୋଇଛନ୍ତି ନିୟାଶା।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
