କଟକ: ରାଜ୍ୟସ୍ତରୀୟ ସିଙ୍ଗଲ ୱିଣ୍ଡୋ କ୍ଲିୟରାନ୍ସ ବୈଠକରେ 1753 କୋଟି ଟଙ୍କାର ପୁଞ୍ଜି ନିବେଶ ପ୍ରସ୍ତାବକୁ ମିଳିଛି ମଞ୍ଜୁରୀ । ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ଏହି ମଞ୍ଜୁରୀ ମିଳିଛି ।
ମଞ୍ଜୁର ଅର୍ଥରାଶି ଇସ୍ପାତ, ବୟନ ଶିଳ୍ପ, ପର୍ଯ୍ୟଟନ, ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ନିବେଶ ହେବ । ଏଥିରେ ମୋଟ 5,566 ନିଯୁକ୍ତି ସୁଯୋଗ ସୃଷ୍ଟି ହେବ ।
ଶ୍ରୀ ଜଗନ୍ନାଥ ଷ୍ଟିଲ ଆଣ୍ଡ ପାୱାର କେନ୍ଦୁଝର କାରଖାନାର ସମ୍ପ୍ରସାରଣ କରିବା ସହ 835 କୋଟି ଟଙ୍କା ନିବେଶ କରିବ । ଯେଉଁଥିରେ 500 ନିଯୁକ୍ତି ସୁଯୋଗ ସୃଷ୍ଟି ହେବ । ସେହିପରି ଯାଜପୁର କଳିଙ୍ଗ ନଗରରେ ଇମ୍ଫା ଏକ ଫେରୋକ୍ରମ ୟୁନିଟ ବସାଇବ । ଏଥିରେ 547 କୋଟି ଟଙ୍କା ଲଗାଇବା ସହ 900 ଜଣ ରୋଜଗାର ପାଇବେ । ପେଜ ଇଣ୍ଡଷ୍ଟ୍ରିଜ ଖୋର୍ଦ୍ଧାରେ ଏକ ଜକି ବ୍ରାଣ୍ଡ ପୋଷାକ ତିଆରି କାରଖାନା ବସାଇବ ସହ 257 କୋଟି ନିବେଶ ହେବ ଏବଂ ଏଥିରେ 3500 ଜଣ ନିଯୁକ୍ତି ପାଇବେ ।
ଯାଜପୁର କଳିଙ୍ଗ ନଗରରେ ଥିବା ଡ଼ିଓ ରେସିଡେନ୍ସି ଆଣ୍ଡ ରିସର୍ଟ ସମ୍ପ୍ରସାରଣ କରିବା ପାଇଁ 53 କୋଟି 69 ଲକ୍ଷ ପୁଞ୍ଜି ନିବେଶ କରିବ । ଯେଉଁଥିରେ 90 ଜଣ ନିଯୁକ୍ତି ପାଇବେ । ଜୟ ଭାରତ ସ୍ପାଇସେସ କଟକରେ ଏକ ଖାଦ୍ୟ ପ୍ରକ୍ରିୟାକରଣ ୟୁନିଟ ବସାଇବ ଯେଉଁଥିରେ 50 କୋଟି ନିବେଶ ହେବ ଆଉ 550 ଜଣ ନିଯୁକ୍ତି ପାଇବେ । ଖୋର୍ଦ୍ଧାରେ ସେଞ୍ଚୁରୀ ମ୍ୟାଟ୍ରେସ ଏକ ୟୁନିଟ ପ୍ରତିଷ୍ଠା କରିବ ପ୍ରତିଷ୍ଠା କରିବା ନେଇ ସୂଚନା ରହିଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
