ଭୁବନେଶ୍ବର: ସ୍ମାର୍ଟସିଟି ଭୁବନେଶରରେ ପ୍ଲାଷ୍ଟିକ କଟକଣା କାମ ଦେଉନି । ଗାନ୍ଧୀ ଜୟନ୍ତୀଠାରୁ ପଲିଥିନକୁ ନିଷିଦ୍ଧ କରାଯିବା ନେଇ ରାଜ୍ୟ ସରକାରଙ୍କ ପକ୍ଷରୁ ଘୋଷଣା କରାଯାଇଛି । ହେଲେ ଏହି ନିୟମର କାର୍ଯ୍ୟକାରିତା ନେଇ ଉଠିଛି ପ୍ରଶ୍ନବାଚୀ । ଏବେବି ରାସ୍ତା କଡରେ ଚାଟ୍ ଦୋକାନୀ ଠାରୁ ବଡ ବଡ ସପିଂ ମଲରେ ପୁଳା ପୁଳା ପଲିଥିନ ଖୁଲମଖୁଲା ବ୍ୟବହାର ହେଉଛି । ଯାହା ସରକାରଙ୍କ ପାରିବା ପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ବୁଧବାର ବିଏମସି ସେଣ୍ଟ୍ରାଲ ସ୍କ୍ବାଡ ପକ୍ଷରୁ ବାପୁଜୀ ନଗର ଠାରୁ ପଲିଥିନ ନେଇ ଚଢ଼ାଉ ଆରମ୍ଭ କରାଯାଇଥିଲା । ଏଜି ଛକ, ବରମୁଣ୍ଡା ହୋଇ ଏମସ ମେଡିକାଲ ପର୍ଯ୍ୟନ୍ତ ସ୍କ୍ବାଡ ଚଢ଼ାଉ ଜାରି ରଖିଥିଲେ । ପାଖାପାଖି ୪୦ କେଜିରୁ ଊର୍ଦ୍ଧ୍ବ ପଲିଥିନ ସିଜ୍ କରିଥିବା ବେଳେ ପ୍ରାୟ ୧୦ ହଜାର ଟଙ୍କାର ଫାଇନ ଆଦାୟ କରାଯାଇଛି । ଏ ଚଢ଼ାଉ ଆଗକୁ ଜାରି ରହିବ । ଆଉ ପଲିଥିନ ବ୍ୟବହାର ଉପରେ ସଚେତନତା ବି କରାଯିବ ବୋଲି ବିଏମସି ଏନଫୋରସମେଣ୍ଟ ସ୍କ୍ବାଡ ଇନିସ୍ପେକ୍ଟର ସନ୍ତୋଷ ସାମଲ କହିଛନ୍ତି ।
ଏକକ ପ୍ଲାଷ୍ଟିକର ବ୍ୟବହାର ନେଇ ରାଜ୍ୟ ସରକାରଙ୍କ ପକ୍ଷରୁ କଟକଣା ଜାରି କରାଯାଇଥିବା ବେଳେ ଜନସାଧାରଣ ଏହାକୁ ଭ୍ରୁକ୍ଷେପ ନକରି ପଲିଥିନ ବ୍ୟବହାର କରୁଛନ୍ତି । ବିଏମସି ପକ୍ଷରୁ ଏନେଇ ସଚେତନତା କରାଯାଉଛି ସତ, ହେଲେ ଏହା ଉପରେ କିଛି ପ୍ରଭାବ ପଡୁନି । ଆଗକୁ ସମୟ କହିବ ଏ କଟକଣା କେତେ କାର୍ଯ୍ୟକାରୀ ହେଉଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
