ଭୁବନେଶ୍ବର: ମହାପ୍ରଭୁ ଲିଙ୍ଗରାଜଙ୍କ ବିବାହ ଯାତ୍ରା ପାଇଁ ମିଳିଲା ଅନୁମତି । ଲକଡାଉନ କଟକଣା ଭିତରେ ଶୀତଳ ଷଷ୍ଠୀ ଯାତ୍ରାକୁ ମିଳିଲା ଅନୁମତି । ବିନା ବର ଯାତ୍ରୀରେ ହେବ ଶିବ ବିବାହ । ଯାକ ଯମକ, ବାଜା ବାଣ ରୋଷଣୀ ବିନା ହେବ ଇଶ୍ବର ପାର୍ବତିଙ୍କ ବିବାହ ।
ବିଏମସି କମିଶନରଙ୍କ ପକ୍ଷରୁ ମିଳିଲା ଶିବ ବିବାହ ଯାତ୍ରାର ଅନୁମତି । ସୋମବାର ଭୁବନେଶ୍ୱରରେ ଲିଙ୍ଗରାଜ ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି । ଶୀତଳ ଷଷ୍ଠୀ ଯାତ୍ରା ନିର୍ଦ୍ଧିଷ୍ଟ କଟକଣା ମଧ୍ୟରେ ସମାପନ ହେବ। ବିନା ପ୍ରୋସେସନ ଓ ସାଜ ସଜ୍ଜାରେ ହେବ ଶିବ ବିବାହ । ସୀମିତ ସଂଖ୍ୟକ ସେବାୟତ, ବିନା ଭକ୍ତଙ୍କ ଉପସ୍ଥିତିରେ ଦେବ ବିବାହ । ଭୋଜିଭାତ, ରୋଷଣୀ, ବରଯାତ୍ରୀ ସମ୍ପୂର୍ଣ୍ଣ ମନା । ସାମାଜିକ ଦୂରତା ସହିତ ମାସ୍କ ପିନ୍ଧିବା ବାଧ୍ୟତାମୂଳକ । କୌଣସି ଥଣ୍ଡା, କାଶ, କଫ ଭଳି ଲକ୍ଷଣ ଥିଲେ ମିଳିବନି ଅନୁମତି । ଯେଉଁ ସେବାୟତମାନଙ୍କର ପାଳି ଥିବ ସେମାନେ ହି କେବଳ ନୀତି ସମାପନ ଦାୟିତ୍ୱରେ ସାମିଲ ହେବେ ।
ବୈଠକରେ ଲିଙ୍ଗରାଜ ମନ୍ଦିରର ଟ୍ରଷ୍ଟି ତଥା ବିଏମସି ଅତିରିକ୍ତ କମିଶନର ଅବନିକାନ୍ତ ପଟ୍ଟନାୟକ, ମନ୍ଦିର କାର୍ଯ୍ୟ ନିର୍ବାହୀ ଅଧିକାରୀ ପ୍ରସନ୍ନ ଦାଶ, ବିଭିନ୍ନ ନିଯୋଗର କର୍ମକର୍ତା ଉପସ୍ଥିତ ଥିଲେ ।
ଭୁବନଶ୍ବରରୁ ସଞୀବ ରାୟ, ଇଟିଭି ଭାରତ
