ଭୁବନେଶ୍ବର: ଅନ୍ୟ ରାଜ୍ୟ ତୁଳନାରେ କୋରୋନା ମୁକାବିଲାରେ ଓଡିଶାର ସ୍ଥିତି ନିୟନ୍ତ୍ରଣରେ ରହିଛି । 25 ଦିନରୁ ଲାକଡାଉନର ନିୟମ ଓଡିଶାବାସୀ ପାଳନ କରିଥିବାରୁ ଏହା ରାଜ୍ୟ ପାଇଁ ଲାଭବାନ ହୋଇଛି । କୋରୋନା ନିୟନ୍ତ୍ରଣରେ ରହିବାର ସମ୍ପୂର୍ଣ୍ଣ ଶ୍ରେୟ ଓଡ଼ିଶାବାସୀଙ୍କୁ ଦେଇଛନ୍ତି ବରିଷ୍ଠ ସ୍ବାସ୍ଥ୍ୟ ଅଧିକାରୀ ଶାଳିନୀ ପଣ୍ଡିତ ।
ଅନ୍ୟ ରାଜ୍ୟ ତୁଳନାରେ ଓଡି଼ଶାରେ ଆକ୍ରାନ୍ତଙ୍କ ସଂଖ୍ୟା 60ରେ ରହିଛି । ମହାରାଷ୍ଟ୍ର, ଦିଲ୍ଲୀ ତାମିଲନାଡୁ ଆଦି ରାଜ୍ୟରେ ଅଧିକ କୋରୋନା ଆକ୍ରାନ୍ତ ରହିଥିବା ବେଳେ ଓଡିଶା ଶେଷରେ ରହିଛି। ଓଡ଼ିଶାର ଜନସଂଖ୍ୟା ସାଢ଼େ 4 କୋଟି । ଓଡ଼ିଶାରେ ଯେଉଁ ଅନୁଶାସନ ଅଛି ଯେଉଁ ଶୃଙ୍ଖଳା ଅଛି, ସେହି କାରଣରୁ ସଂକ୍ରମଣ ଅଧିକ ହୋଇନାହିଁ । ବର୍ତ୍ତମାନ ଓଡ଼ିଶାରେ 60ଟି କୋଭିଡ କେସ ରଅଛି । ସେଥିମଧ୍ୟରୁ 18 ଜଣ ସୁସ୍ଥ ହୋଇଥିବା ବେଳେ ଜଣଙ୍କର ମୃତ୍ୟୁ ହୋଇଛି ।
5500 ଟେଷ୍ଟ କରାଯାଇଛି ଯେଉଁଥିରୁ 60ଟି ନମୁନା ପଜିଟିଭ ହୋଇଛି । ପ୍ରତି 100ଟି ଟେଷ୍ଟରେ ମାତ୍ର 1.08 ପଜିଟିଭି ରହୁଛନ୍ତି । ଓଡ଼ିଶାବାସୀ ଯେଭଳି ଭାବେ ଶୃଙ୍ଖଳା ବଜାୟ ରଖିଛନ୍ତି ତାହା କୋଭିଡ ମୁକାବିଲାରେ ବେଶ ସହାୟକ ହୋଇଛି ବୋଲି କହିଛନ୍ତି ଶାଳିନୀ ପଣ୍ଡିତ ।
ସୁବର୍ଣପୁରରେ 200 ଶଯ୍ୟା ବିଶିଷ୍ଟ କୋଭିଡ ହସ୍ପିଟାଲ କାର୍ଯ୍ୟକ୍ଷମ କରାଯାଇଛି । 19ଟି ଜିଲ୍ଲାରେ 21ଟି କୋଭିଡ ହସ୍ପିଟାଲ ପ୍ରସ୍ତୁତ ହୋଇଥିବା ବେଳେ ରାଜ୍ୟରେ ସମସ୍ତ କୋଭିଡ ହସ୍ପିଟାଲରେ 3620ଟି ଶଯ୍ୟା ରହିଛି । ରାଜାଧନୀରେ ସଂକ୍ରମଣ ପ୍ରତିହତ କରିବା ପାଇଁ 6ଟି ବରିଷ୍ଠ ଅଧିକାରୀଙ୍କୁ ନିଯୁକ୍ତି କରାଯାଇଛି। ରାଜଧାନୀର 3ଟି ଜୋନରେ ନିଯୁକ୍ତ ଏହି ଅଧିକାରୀ ମାନେ କାର୍ଯ୍ୟ ଆରମ୍ଭ କରିଛନ୍ତି । 77 ହଜାର ଶ୍ରମଜୀବିଙ୍କ ପାଇଁ 2553 ଟି ଶିବିର କାର୍ଯ୍ୟକାରୀ କରାଯାଇଛି । 5387 ଗ୍ରାମ ପଞ୍ଚାୟତରେ ରନ୍ଧାଖାଦ୍ୟ ଦିଆଯାଉଛି। । ଜନସାଧାରଣ ସହଯୋଗ ଜାରି ରଖନ୍ତୁ ସମସ୍ତେ ମିଶି କୋରୋନାକୁ ନିଶ୍ଚୟ ହରାଇ ପାରିବା କହିଛନ୍ତି ପଣ୍ଡିତ ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
