ଭୁବନେଶ୍ବର: ଭାରତୀୟ ଗଣତନ୍ତ୍ରର ପ୍ରକୃଷ୍ଟ ଆଲୋଚନା ସ୍ଥଳ ଭାବେ ପରିଚିତ ସଂସଦର କାର୍ଯ୍ୟକଳାପ ସମୂହକୁ ଭବିଷ୍ୟତ ନାଗରିକଙ୍କୁ ଅବଗତ କରାଇବା ଉଦ୍ଦେଶ୍ୟରେ ରାଜ୍ୟସ୍ତରୀୟ ଯୁବ ସଂସଦ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି । ବୁଧବାର ରାଜଧାନୀର ଶିକ୍ଷକ ଶିକ୍ଷା ନିର୍ଦ୍ଦେଶାଳୟ ଓ ରାଜ୍ୟ ଶିକ୍ଷା ଗବେଷଣା ଏବଂ ପ୍ରଶିକ୍ଷଣ ପରିଷଦ ପକ୍ଷରୁ ରାଜ୍ୟର ବିଭିନ୍ନ ସ୍କୁଲର ୩୨ ଜଣ ଛାତ୍ର ଛାତ୍ରୀମାନଙ୍କୁ ନେଇ ଯୁବ ସଂସଦ ପ୍ରତିଯୋଗିତା ଆୟୋଜିତ ହୋଇଛି ।
ଏହି ଯୁବ ସଂସଦ ପ୍ରତିଯୋଗିତାରେ ଜିଲ୍ଲାସ୍ତରରୁ ବଛା ହୋଇ ଆସିଥିବା ମାଧ୍ୟମିକ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟର ପ୍ରତିଯୋଗୀମାନେ ଶାସକ ଓ ବିରୋଧୀ ଦଳର ନେତାମାନଙ୍କର ଭୂମିକା ଅତ୍ୟନ୍ତ ନିଖୁଣ ଭାବରେ ତୁଲାଇ ଥିଲେ । ଭାରତର ସାମ୍ପ୍ରତିକ ରାଜନୈତିକ ପଦକ୍ଷେପ ଭାବରେ କାଶ୍ମୀରରୁ ଧାରା ୩୭୦ ଉଚ୍ଛେଦ , ଘରୋଇ ଶିକ୍ଷାନୁଷ୍ଠାନ ମାନଙ୍କରେ ଟ୍ୟୁସନ ଫି ର ବୃଦ୍ଧି ଇତ୍ୟାଦି ପ୍ରସଙ୍ଗକୁ ଯୁବ ପ୍ରତିଯୋଗୀ ମାନେ ଖୁବ ନିଖୁଣ ଭାବରେ ଉପସ୍ଥାପନ କରିଥିଲେ । ଶେଷରେ କୃତ୍ତି ପ୍ରତିଯୋଗୀଙ୍କୁ ପୁରସ୍କାର ବିତରଣ କରଯାଇଥିଲା ।
ଏହି ଯୁବ ସଂସଦ ପ୍ରତିଯୋଗିତା ସ୍କୁଲ ପିଲାଙ୍କୁ ଉତ୍ସାହିତ କରିବ। ଆମ ସମ୍ବିଧାନ ହିସାବରେ ଗଣତନ୍ତ୍ରରେ ସରକାର କିଭଳି ଗଢା ହୁଏ ଏବଂ ସରକାର କିଭଳି ପରିଚାଳିତ ହୁଏ ନିଶ୍ଚିତ ଭାବେ ପିଲାମାନେ ଏ ପ୍ରତିଯୋଗିତାରୁ ଅବଗତ ହେବେ । ଆମ ଶିକ୍ଷା ବ୍ୟବସ୍ଥାରେ ପାଠ ପଢିବା ଏବଂ ତାକୁ ବାସ୍ତବରେ କାର୍ଯ୍ୟକାରୀ କରିବା ଅତ୍ୟନ୍ତ ଉପାଦେୟ । ଏହି ଯୁବ ସଂସଦ କାର୍ଯ୍ୟକ୍ରମ ସମ୍ପର୍କରେ ପିଲାମାନଙ୍କର ଜାଣିବାର ଆବଶ୍ୟକତା ରହିଛି ବୋଲି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି ।
ବଲାଙ୍ଗୀର ପାଟଣାଗଡ଼ ସ୍କୁଲର ୧୦ମ ଶ୍ରେଣୀ ଛାତ୍ର ଅଭିଳାଷ ପଣ୍ଡା ବାଚସ୍ପତି ଭୂମିକାରେ ଭାଗ ନେଇଥିଲେ । ତାଙ୍କ ମତରେ ଯୁବ ସଂସଦ ଖୁବ ମନୋରଞ୍ଜନ ଯୋଗାଇଛି । ଗଣତନ୍ତ୍ରର ମନ୍ଦିରରେ କିଭଳି କାର୍ଯ୍ୟକ୍ରମ ହୋଇଥାଏ ସେ ନେଇ ଆଜି ବାସ୍ତବ ଜ୍ଞାନ ଉପଲବ୍ଧ ହୋଇଛି । ସରକାର ଓ ବିରୋଧୀଦଳଙ୍କ କାର୍ଯ୍ୟକଳାପ ବିଷୟରେ ଜାଣିବାକୁ ମିଳିଛି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
