ଭୁବନେଶ୍ବର: ମାଟ୍ରିକ ପରୀକ୍ଷାରେ ଫର୍ମଫିଲପ୍ କରି ଛାତ୍ରଛାତ୍ରୀ ପରୀକ୍ଷା ନଦେବା ପ୍ରସଙ୍ଗ । ପ୍ରତିକ୍ରିୟା ରଖିଲେ ବିଦ୍ୟାଳୟ ଓ ଗଣିଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ । 8ମରୁ ଦଶମ ପର୍ଯ୍ୟନ୍ତ ପିଲା ସିଧାସଳଖ ଯାଇଥିବାରୁ ସମସ୍ତଙ୍କ ଫର୍ମଫିଲପ କରାଗଲା । ତେବେ ଫର୍ମଫିଲପ ହୋଇଥିବା ପିଲା କାହିଁକି ପରୀକ୍ଷା ଦେଲେନି, ତଦନ୍ତ ହେବ । ପରୀକ୍ଷାରେ ଅନୁପସ୍ଥିତ କାରଣ ପାଇଁ ଡିଇଓ ଓ ବିଇଓଙ୍କୁ ତଦନ୍ତ ନିର୍ଦ୍ଦେଶ ହୋଇଛି ବୋଲି ସେ କହିଛନ୍ତି ।
ଏ ନେଇ ମନ୍ତ୍ରୀ କହିଛନ୍ତି ଯେ, "କୋଭିଡ଼ ଯୋଗୁଁ ସବୁ ପିଲାଙ୍କ ଫର୍ମଫିଲପ୍ ଫି ଛାଡ଼ କରିଥିଲେ ସରକାର । ରାଜ୍ୟରେ କୋରୋନା ମହାମାରୀ ପାଇଁ ସମସ୍ତ ଶ୍ରେଣୀର ପିଲାଙ୍କୁ ବିନା ପରୀକ୍ଷାରେ ପରବର୍ତ୍ତୀ ଶ୍ରେଣୀକୁ ଉତ୍ତୀର୍ଣ୍ଣ କରାଯାଇଥିଲା । ପ୍ରତ୍ୟେକ ବର୍ଷ ଫର୍ମଫିଲପ୍ ସମୟରେ ଛାତ୍ରଛାତ୍ରୀଙ୍କୁ ଦେୟ ଦେବାକୁ ପଡୁଥିଲା । ଯେହେତୁ ୨ ବର୍ଷ ଧରି କୋରୋନା ମହାମାରୀ ଲାଗି ରହିଛି, ତେଣୁ ସମସ୍ତ ପରୀକ୍ଷାର ଫର୍ମଫିଲପ୍ ବିନା ଦେୟରେ କରାଯାଇଛି । କୌଣସି ଦେୟ ଛାତ୍ରଛାତ୍ରୀ ଦେବେ ନାହିଁ । ଏହି ଦେୟ ରାଜ୍ୟ ସରକାର ବହନ କରିବେ ବୋଲି କହିଥିଲେ ମୁଖ୍ୟମନ୍ତ୍ରୀ ।"
ଯାହା ଫଳରେ ବିନା ଦେୟରେ ଫର୍ମଫିଲପ୍ କରାଯାଉଥିବାରୁ ସମସ୍ତ ଛାତ୍ରଛାତ୍ରୀ ଫର୍ମଫିଲପ୍ କରିଥିଲେ। ତେବେ ପରୀକ୍ଷା ସମୟରେ ଜଣାପଡିଲା ଯେ ଅଧିକାଂଶ ପିଲା ପରୀକ୍ଷା ଦେଇନାହାନ୍ତି । ଏନେଇ ଡିଇଓ ଏବଂ ବିଇଓଙ୍କୁ ନିର୍ଦ୍ଦେଶ ଦିଆଯାଇଛି ଯେ, ଏତେ ପିଲା ଅନୁପସ୍ଥିତ ରହିଲେ କାହିଁକି ? ପ୍ରତି ପିଲାର ଅନୁପସ୍ଥିତି ସଂପର୍କରେ ଠୋସ୍ କାରଣ କ’ଣ ? ପିଲା ଏବେ କେଉଁଠି ଅଛନ୍ତି ଓ କ’ଣ କରୁଛନ୍ତି ? ବର୍ତ୍ତମାନ ସେମାନଙ୍କର ସ୍ଥିତି କଣ ରହିଛି ? ଏହାକୁ ନେଇ ବିଭାଗ ତର୍ଜମା କରୁଛି ବୋଲି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ କହିଛନ୍ତି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
