ଭୁବନେଶ୍ବର: ପୁଣି ମାନବିକତା ଦେଖାଇଲେ ସବ୍ୟସାଚୀ । ଜୀବନ ଫେରି ପାଇଲା ୨ ବର୍ଷର ଶିଶୁ । ବର୍ତ୍ତମାନ ସାରାଦେଶ କୋରୋନା କାୟାରେ ଜୁଝି ହେଉଛି । ଏହାରି ମଧ୍ୟରେ ଏକ ୨ ବର୍ଷ ଶିଶୁ କନ୍ୟାର ଜୀବନ ବଞ୍ଚାଇଛନ୍ତି ଦୁଇ ଅଭିନେତା ।
ବଲିଉଡ ଅଭିନେତା ସୁଶାନ୍ତ ସିଂ ଏବଂ ଓଲିଉଡ଼ ଅଭିନେତା ସବ୍ୟସାଚୀ ମିଶ୍ରଙ୍କ ପ୍ରୟାସରେ ଏକ ଶିଶୁର ଜୀବନ ବଞ୍ଚିଯାଇଛି । ପ୍ରଥମେ ଶିଶୁଟିର ବାପା ଓ ମାଆ କୋରୋନାରେ ଆକ୍ରାନ୍ତ ହୋଇଥିଲେ । ପରେ ତାଙ୍କର ୨ ବର୍ଷର ଶିଶୁ କୋରୋନାରେ ଆକ୍ରାନ୍ତ ହୋଇଥିଲା ।
୨୫ ତାରିଖ ରାତିରେ ହଠାତ ଶିଶୁର ଅମ୍ଳଜାନ ସ୍ତର ହ୍ରାସ ପାଇଁ ୮୩ରେ ପହଁଞ୍ଚିଥିଲା। ଯାହାକୁ ନେଇ ଶିଶୁଟିର ବାପା ଓ ମାଆ ବିଚଳିତ ହୋଇପଡିଥିଲେ । ଆଉ ଝିଅର ଜୀବନ ବଞ୍ଚାଇବାକୁ ଅନେକ ହସ୍ପିଟାଲ ସହିତ ଯୋଗାଯୋଗ କରିଥିଲେ । ହେଲେ ମେଡିକାଲ ଭର୍ତ୍ତି ପାଇଁ ଶିଶୁଟିକୁ ବେଡ଼ ମିଳିନଥିଲା ।
ଯାହାକୁ ନେଇ ସମ୍ପୂର୍ଣ୍ଣ ରୂପେ ନିରାଶ ହୋଇ ଭାଙ୍ଗିପଡିଥିଲେ ପତିପତ୍ନୀ । ଏନେଇ ସେମାନେ ପ୍ରଥମେ ସେ ବଲିଓଡ଼ ଅଭିନେତା ସୁଶାନ୍ତ ସିଂକୁ ଜଣାଇଥିଲେ । ସୁଶାନ୍ତ ସଙ୍ଗେ ସଙ୍ଗେ ସବ୍ୟସାଚୀ ମିଶ୍ରଙ୍କୁ ଟ୍ବିଟ କରିଥିଲେ।
ସବ୍ୟସାଚୀ ଖବର ପାଇ ଏନେଇ ଶିଶୁଟିକୁ ଆମ୍ରି ହସ୍ପିଟାଲରେ ଭର୍ତ୍ତି କରିଥିଲେ । ଶିଶୁଟି ଠିକ ସମୟରେ ଚିକିତ୍ସା ପାଇ ଥିବାରୁ ବର୍ତ୍ତମାନ ଶିଶୁଟି ସୁସ୍ଥ ଥିବା ଜଣାପଡିଛି ।
ଶିଶୁଟିର ଠିକ୍ ସମୟରେ ଚିକିତ୍ସା ଯୋଗାଇଥିବାରୁ ସୁଶାନ୍ତ ସିଂ ଡାକ୍ତର ଓ ସବ୍ୟସାଚୀଙ୍କୁ କୃତଜ୍ଞତା ଜଣାଇଛନ୍ତି । ଏହାସହ ସବ୍ୟସାଚୀ ଡାକ୍ତର ପାଟଜୋଷୀଙ୍କ ସମେତ ତାଙ୍କ ଟିମକୁ କୃତଜ୍ଞତା ଜଣାଇଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
